ەلىمىزدەگى كۇردەلى احۋالعا بايلانىستى شىمكەنت قالالىق قازاقستان حالقى اسسامبلەياسى دا قاراپ قالعان جوق. اسسامبلەيا مۇشەلەرى ورتادان بىرىگىپ, گۋمانيتارلىق كومەك جيناپ, تاسقىننان زارداپ شەككەن اتىراۋ وبلىسىنا قاراي اۆتوكولىك كەرۋەنىن جونەلتتى.
بۇل قايىرىمدىلىق ءىس-شارا «جۇرەكتەن – جۇرەككە» اكتسياسى اياسىندا ىسكە اسىرىلدى. قالالىق اسسامبلەيا شاھاردىڭ ەكى تۇسىنان ارنايى بەكەت اشىپ, ءتۇرلى ەتنوس وكىلدەرى ماتەريالدىق كومەك جيناعان. ونىڭ جالپى كولەمى 20 تونناعا جۋىقتادى. جيناقتالعان گۋمانيتارلىق جاردەم دەپ وتىرعانىمىز – ماكارون ونىمدەرى, اۋىزسۋ, باسقا دا ازىق-ت ۇلىك تاۋارلارى, تۇرمىستىق حيميا, گيگيەنالىق زاتتار, جىلى كيىمدەر, ەتىكتەر, كورپە-توسەك پەن پوليەتيلەن قاپشىقتارى. جونەلتىلگەن گۋمانيتارلىق كومەكتىڭ جالپى سوماسى 10 ملن تەڭگەدەن استى. ماتەريالدىق كومەكپەن بىرگە اسسامبلەيا مۇشەلەرى قارعىن سۋدان جاپا شەككەندەرگە ارناپ اشىلعان بانكتىك ەسەپشوتتارعا دا قارجىلاي كومەك اۋدارا باستادى.
شەشەن-ينگۋش ەتنومادەني بىرلەستىگىنىڭ توراعاسى رامازان ماتاەۆ ەلىمىزدىڭ سولتۇستىگى مەن باتىسىنداعى توتەنشە جاعدايعا بارشاسىنىڭ قابىرعاسى قايىسىپ وتىرعانىن, وسىنداي قيىن ساتتە بىرگە بولۋدى تىلەپ, ءاردايىم قولدان كەلگەنشە كومەك كورسەتەتىندەرىن جەتكىزدى.
وزبەك ەتنومادەني بىرلەستىگىنىڭ باسشىسى تاحيربەك نىشانباەۆ قالاداعى 14 ەتنومادەني ۇيىم ءبىر جاعادان باس, ءبىر جەڭنەن قول شىعارىپ, جىلۋ جيناۋعا اسسامبلەيادان ارنايى شتاب اشقانىن مالىمدەدى.
قالالىق كورەي ەتنومادەني بىرلەستىگىنىڭ توراعاسى يۋري پان «جۇرەكتەن جۇرەككە» اكتسياسى اياسىندا جىبەرىلگەن گۋمانيتارلىق كومەك قىزىل سۋدان جاپا شەككەن اتىراۋلىق تۇرعىنداردىڭ اجەتىنە جارار دەگەن ۇمىتتە.
ال قالالىق سلاۆيان ەتنومادەني بىرلەستىگىن باسقاراتىن ناتاليا رومانوۆا ەل باسىنا كۇن تۋعاندا بۇكىل حالىق جۇمىلا تۇسكەنىن جەتكىزدى. مۇنداي قيىن ساتتە شەت قالىپ قويۋعا بولمايتىنىن, ءار ازامات شاماسى كەلگەنشە جاردەم كورسەتۋ كەرەگىن بايان ەتتى.
شىمكەنت