قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆ ورازا ايت مەرەكەسىنە وراي Facebook جانە Instagram الەۋمەتتىك جەلىلەرىندە جازبا قالدىردى, دەپ حابارلايدى Egemen.kz.
«قۇرمەتتى دوستار! بارشاڭىزدى ورازا ايت مەرەكەسىمەن شىن جۇرەكتەن قۇتتىقتايمىن!
رامازان ايىنىڭ اياقتالعانىن بىلدىرەتىن بۇل مەيرام – كۇللى مۇسىلمان قاۋىمى ءۇشىن قاستەرلى.
ايت كۇندەرى مەيىرىمدىلىك, جاناشىرلىق, قامقورلىق سياقتى ىزگى قۇندىلىقتاردىڭ ماڭىزى ەسەلەنە تۇسەدى. ادامدار ءبىر-بىرىنە كومەك قولىن سوزىپ, قاسيەتتى ايدى يگى ىستەرمەن جالعاستىرادى. مۇنداي ءۇردىس ەلدىڭ بەرەكە-بىرلىگىن ارتتىراتىنى انىق.
بيىلعى ورازا ايت ەلىمىز ءۇشىن ۇلكەن سىناقپەن قاتار كەلىپ وتىر. وسىنداي سىن-ساعاتتا حالقىمىز قايىرىمدىلىق تانىتىپ, تاسقىننان زارداپ شەككەن وڭىرلەردىڭ تۇرعىندارىنا قولداۋ ءبىلدىرىپ, اۋىزبىرشىلىكتىڭ وزىق ۇلگىسىن كورسەتىپ وتىر. بۇل – يماندىلىق پەن ادامگەرشىلىكتىڭ جارقىن كورىنىسى.
قازىرگى تاڭدا مەملەكەت تاراپىنان دا تابيعي اپاتتىڭ سالدارىن جويۋ ءۇشىن بارلىق جاعداي جاسالىپ جاتىر. ازاماتتارىمىزدىڭ بەكەم بىرلىگى مەن پاراساتىنىڭ ارقاسىندا كوپ ۇزاماي بۇل سىناقتى دا ەڭسەرەمىز دەپ سەنەمىز.
ۇلىق مەرەكەمەن قۇتتىقتاي وتىرىپ, بارشاڭىزعا زور دەنساۋلىق, ءار وتباسىنا اماندىق جانە ەلىمىزگە تىنىشتىق تىلەيمىن!
ايتتان ايتقا امان-ەسەن جەتە بەرەيىك!», دەپ جازدى ماۋلەن اشىمباەۆ قۇتتىقتاۋ حابارلاماسىندا.