جىل باسىنان بەرى ۇلتتىق قوردان 1,4 ترلن تەڭگەدەن اسا قارجى جۇمسالىپتى. ونىڭ ىشىندە 1 ترلن تەڭگەسى – ەل بيۋدجەتىنە كەپىلدەندىرىلگەن ترانسفەرت. 411 ميلليارد تەڭگە نىسانالى ترانسفەرت بولسا, 1,6 ملرد تەڭگە قوردى باسقارۋعا, سونداي-اق جىل سايىنعى سىرتقى ءاۋديتتى جۇرگىزۋگە بايلانىستى شىعىستاردى جابۋعا جۇمسالعان شىعىندى قۇرايدى.
بىلتىر جىل سوڭىندا ۇلتتىق قوردان رەسپۋبليكالىق بيۋدجەتكە 2024-20026 جىلدارعا ارنالعان كەپىلدەندىرىلگەن ترانسفەرت مولشەرى بەلگىلەندى. پرەزيدەنت قول قويعان زاڭ بيىل 1 قاڭتاردان باستاپ كۇشىنە ەندى. زاڭمەن كەپىلدەندىرىلگەن ترانسفەرت مولشەرى جىل سايىن 2 ترلن تەڭگەدەن كەلەدى. بۇدان بولەك, قوردان جىل سايىن نىسانالى ترانسفەرتتەرگە دە قاراجات ءبولىنىپ تۇرادى. بيىل بۇعان بولىنەتىن سوما 1,6 ترلن تەڭگە دەپ بەكىتىلگەن. مۇنداي كولەمدەگى قارجى رەسپۋبليكالىق ماڭىزداعى ينفراقۇرىلىمدىق جوبالاردى قارجىلاندىرۋعا باعىتتالۋعا ءتيىس.
بىلتىر ۇلتتىق قوردان 3,97 ترلن تەڭگە الىنعان بولاتىن. ونىڭ 2,2 ترلن تەڭگەسى – بيۋدجەتكە كەپىلدىك بەرىلگەن ترانسفەرتتەر بولسا, 1,8 ترلن تەڭگەسى – نىسانالى ترانسفەرت. جىل باسىندا قوردا 29,1 ترلن تەڭگە جينالسا, سوڭعى 1 ساۋىردەگى ەسەپ بويىنشا قورداعى قارجى 28,8 ترلن تەڭگە دەپ كورسەتىلگەن. ناتيجەسىندە, ءۇش ايدا 280 ملرد تەڭگەگە ازايعان. ال بيىل ۇكىمەت ءۇش ايدىڭ ىشىندە كەپىلدەندىرىلگەن ترانسفەرتتىڭ جارتىسىنان استامىن جاراتىپ ۇلگەردى. جوعارىدا ايتىلعانداي, 1,4 ترلن تەڭگە قور قازىناسىنان الىندى.
مەملەكەت باسشىسى قاسىم-جومارت توقاەۆ بىلتىر ساۋىردەگى ۇكىمەتتىڭ كەڭەيتىلگەن وتىرىسىندا ۇلتتىق قورعا جارماسا بەرۋدى دوعارۋ كەرەگىن, ونىڭ كەلەشەك ۇرپاق ەنشىسى ەكەنىن ايتقان بولاتىن.
«ۇلتتىق قورعا جارماسا بەرۋدى دوعارۋ قاجەت. مەن بۇل تۋرالى وسىعان دەيىن دە تالاي رەت ايتتىم. ۇلتتىق قور – بولاشاق ۇرپاقتىڭ قارجىسى. ءبىز ونىڭ رەسۋرسىن قاجەت كەزدە, داعدارىس كەزىندە عانا پايدالانۋىمىز كەرەك. مەملەكەتتىك-جەكەمەنشىك ارىپتەستىك ينستيتۋتىن جانە جان باسىنا قارجىلاندىرۋدى, اسىرەسە الەۋمەتتىك ينفراقۇرىلىمعا ينۆەستيتسيا تارتۋدى تولىق پايدالانۋ كەرەك», دەدى پرەزيدەنت.
جىل باستالعالى ءۇش ايدا ۇلتتىق قورعا 1,17 ترلن تەڭگەدەي ءتۇسىم تۇسكەن. ونىڭ ىشىندە مۇناي سەكتورى ۇيىمدارىنان الىناتىن تىكەلەي سالىق (جەرگىلىكتى بيۋدجەتتەردىڭ ەسەبىنە جاتقىزىلاتىن سالىقتى قوسپاعاندا) 1,16 ترلن تەڭگەنى قۇراعان. قالعانى – رەسپۋبليكالىق مەنشىكتى جەكەشەلەندىرۋدەن (137 ملن تەڭگە), ۇلتتىق كومپانيالار مەن حولدينگتەردى باسەكەلەس ورتاعا بەرۋدەن (47 ملن تەڭگە), اۋىل شارۋاشىلىعى ۋچاسكەلەرىن ساتۋدان (10 ملن تەڭگە), وزگە دە تۇسىمدەر مەن كىرىستەردەن (770 مىڭ تەڭگە) تۇسكەن قاراجات بولىپ وتىر.
ايتا كەتەيىك, 2030 جىلعا دەيىن قورعا 100 ميلليارد دوللار جيناۋ ماقساتى بەلگىلەنگەن.