ءانشى ديماش قۇدايبەرگەن تۋعان جەرى اقتوبەگە باردى, دەپ حابارلايدى Egemen.kz.
ول ساياجاي اۋماعىندا تۇراتىن, بىراق قازىر باسپاناسىن تاستاپ 40 مەكتەپتە ۋاقىتشا تۇرىپ جاتقان تۇرعىندارمەن كەزدەستى. وسىلايشا, قيىن ساتتە جەرلەستەرىمەن بىرگە ەكەنىن جەتكىزىپ, قايىرىمدىلىق قورىنا قارجى اۋداردى.
Kazinform جازعانداي, ەلىمىزدە سۋ تاسقىنى باستالعان كەزدە حالىقتى سابىرعا شاقىرىپ, ءوزىنىڭ قاي ساتتە دە قولداۋعا ءازىر ەكەنىن جەتكىزگەن ءانشى ديماش قۇدايبەرگەن بۇگىن اقتوبە وبلىسىنا باردى. ول الدىمەن باسپاناسىنا سۋ كىرگەن قامكوڭىل جەرلەستەرىنە دەمەۋ بولىپ, ولاردىڭ جانىنان تابىلدى.
جىلى ءسوزىن ارناپ, مەملەكەت باسشىسى قاسىم-جومارت توقاەۆتىڭ تاپسىرماسى نەگىزىندە ەلدەگى اتقارىلىپ جاتقان ىستەرگە توقتالدى.
«بالا كەزدەن باستاپ تىلەۋىمدى تىلەپ, بيىككە قانات قاعىپ, قالىقتاپ ءجۇرسىن دەگەن تىلەك تىلەپ جۇرگەن جەرلەستەرىمنىڭ قال-جاعدايىن بىلمەي كەتە المادىم. جاڭالىقتاردان مەملەكەت تاراپىنان اۋقىمدى سومادا كومەك بەرىلىپ جاتىر دەگەندى وقىپ جاتىرمىن. ەڭ باستىسى, ەلىمىز امان بولسىن, جۇرتىمىز تىنىش بولسىن», – دەدى ءانشى.
ءوزى دە يگى ىستەن شەت قالماي, تۋعان جەرىنە ساپارى بارىسىندا قايىرىمدىلىق قورعا اقشا اۋداردى.