دالا ديدارى

استانادا ۇلتتىق مۋزەيدىڭ 10 جىل­دىعىنا وراي «دالا كەسكىندەمەسى: رامىز­­دەر, بوياۋلار, بەينەلەر» اتتى كورمەنىڭ ­اشى­لۋ سالتاناتى ءوتتى. مەرەيتويلىق كور­مەدە مۋزەي قورىندا 10 جىل بويى جيناق­تال­عان بەينەلەۋ ونەرىنىڭ جاۋھارلارى ۇسىنىلعان. ولاردىڭ قاتارىندا ءابىلحان قاستەەۆ, اۋباكىر ىسمايىلوۆ, ورال تاڭسىقباەۆ, ساليحيتدين ايتباەۆ, ۇكى اجيەۆ, ايشا عالىمباەۆا, گۇلفايرۋس ىسمايىلوۆا, كاميل مۋللاشەۆ, اماندوس اقاناەۆ, ەربولات تولەپباي, الپىسباي قازىعۇلوۆ, اعىمسالى دۇزەلحانوۆ سىندى بەلگىلى قىلقالام شەبەرلەرىنىڭ تۋىندى­لارى بار. كورمەگە كەلگەن قوناقتار بارلىعى 50 اۆتوردىڭ 250 تۋىندىسىمەن تانىسۋعا مۇمكىندىك الدى. شارادا اڭىزعا اينالعان تۋىندىلارمەن قاتار تالانتتى جاس اۆتورلاردىڭ زاماناۋي دۇنيەلەرى ۇسىنىلعان. سونىمەن قاتار ءداستۇرلى قولونەر, زەرگەرلىك جانە توقىماشىلىق ونەر بۇيىمدارى, مۋزىكالىق اسپاپتار كورەرمەنگە كورسەتىلدى.

– بۇگىنگى كورمە – ۇلتتىق مۋزەيدىڭ 10 جىلدىق مەرەيتويى اياسىندا تاۋەل­سىز ساراپشىلاردىڭ قاتىسۋىمەن ۇيىم­داس­تىرىلىپ وتىرعان العاشقى كۋراتورلىق جوبا. ماقساتىمىز – كەلۋشىلەردى قازاق كەسكىندەمەسىنىڭ تاريحى مەن ونىڭ دامۋ جولىمەن تانىستىرىپ قانا قويماي, الەم­دىك ونەردەگى وزىندىك ورنىن كورسەتۋ. قازاق بەينەلەۋ ونەرىنىڭ تاريحى تەرەڭ, مۋزەيدە ءبىر عاسىردان استام ۋاقىت ساقتالىپ تۇر­­­عان سۋرەتتەرىمىز دە بار. سونداي-اق 2022-2023 جىلدارى بۇل قور­دى جاس سۋرەتشىلەر­دىڭ جۇمىستارىمەن تو­لىقتىردىق. بيىل ون جىلدىققا باي­لا­نىس­تى جىل سوڭىنا دە­يىن ءارتۇرلى كورمە ۇيىمداستىرۋ جوسپاردا بار, ونىڭ ىشىنە وتاندىق كورمەلەر­­مەن قاتار حالىقارالىق كورمەلەر دە كىرەدى. بۇگىندە ۇلتتىق مۋزەيدە 20-عا تارتا كوللەكتسيا, 200 مىڭنان استام جادىگەر ساقتاۋ­لى. ولاردىڭ بارلىعىن, ارينە, ەكسپوزيتسياعا كورسەتۋ مۇمكىن ەمەس. وسىنداي كورمەلەر ارقىلى بولاشاقتا قالا تۇرعىندارى مەن قوناقتار نازارىنا ۇسىنىپ وتىراتىن بولامىز, – دەيدى ۇلتتىق مۋزەي ديرەك­تورىنىڭ مىندەتىن اتقا­رۋشى ايبەك سىدىقوۆ.

ءىس-شارا بارىسى «قازاق كەس­كىن­دەمەسىندەگى تاريحي سيۋجەتتەر», «تابيعات بەينەلەرى – ­الۋان ءتۇرلى پەيزاجدىق موتيۆتەر», «قا­زاقستان ونە­رىندەگى سۋرەتشى ايەلدەر», «قازىرگى زامانعى ونەر – جاڭا ەسىمدەر» سياقتى تاقىرىپتىق ايماق­تارعا بولىنگەن. كورمە كۋراتورى, تەمىر­بەك جۇرگەنوۆ اتىنداعى قازاق ۇلت­تىق ونەر اكادەمياسىنىڭ ونەر تەوريا­سى مەن تا­ريحىنىڭ وقىتۋشىسى, ەلىمىزدىڭ سۋرەت ونەرى تۋرالى بىرنەشە كىتاپتىڭ اۆتو­رى ولگا باتۋرينا كورەرمەندەرگە تۋىن­دى­لار تاريحى جونىندە قۇندى ماعۇل­ما­ت­تار­مەن ءبولىستى.

– سۋرەتشىلەر نەعۇرلىم تالانتتى بول­­عان سايىن دۇنيەنىڭ جارقىن كورىنىسىن سو­عۇرلىم تەرەڭ كورە باستايدى. ماسەلەن, مى­نا سۋرەتتەگى ابرام چەركاسسكي – الدى­مەن قازاقستانعا جەر اۋدارىلىپ, بۇكىل ءومى­رى ەلىمىزبەن تىكەلەي بايلانىسقان سۋرەت­شى. ول الماتىعا كەلگەندە قالادا ­ال­عاشقى سۋرەتشىلەر ۋچيليششەسى اشىلادى. چەر­كاسسكي سوندا وقىتۋشى بولىپ, بۇ­گىنگى ءبىز تانيتىن كوپتەگەن كوري­فەيلەردى ۇياسى­نان قانات قاقتىردى. سو­لار­دىڭ ىشىن­دە سابىر مامبەەۆ سىندى ايگىلى سۋرەت­شى بار. بىلگەنگە, قازاقستان تەك دالا مەن تاۋلاردان تۇرمايدى. مىنە, ميحايل شاتا­لوۆتىڭ مىنا ءبىر سۋرەتىندە اسپانمەن اس­تاسقان تەڭىزدىڭ, قۇستار مەن ءزاۋلىم كەڭىستىكتىڭ بەي­نەسى كەلىستى كورىنىس تاپقان, – دەدى كۋراتور.

كورمەگە قويىلعان سۋرتتەردە ەلدىك رۋحتى كوتەرەتىن ۇلتتىق ناقىشتار, سال­قار دالا, سابىلعان كوش, شۇرقىراعان جىلقى­لار بەينەسى ءجيى كورىنىس تاپقان. ۇلى دالا­نىڭ كەربەزدىگى مەن كەڭدىگى بەينە­لەن­گەن تۋىن­دىلار ارقىلى ۇلت ءومىرىنىڭ كوركەم شە­جىرەسىنە قيال قاناتىمەن ەركىن ساپارلاۋعا بولادى.