كەڭەس وداعىنىڭ باتىرى, ارميا گەنەرالى ساعادات نۇرماعامبەتوۆتىڭ تۋعانىنا – 100 جىل. وسىعان وراي ەلوردانىڭ 12 ۋنيۆەرسيتەتىندە ءبىر ساعاتتا ۇلت باتىرىنىڭ ءومىر جولى تۋرالى ءدارىس ۇيىمداستىرىلدى. اۋقىمدى ءىس-شاراعا 2,5 مىڭنان استام ستۋدەنت قاتىستى.
ەل پرەزيدەنتى قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا جانە اتىراۋ قالاسىندا وتكەن ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا حالقىمىزدىڭ كورنەكتى تۇلعالارىنىڭ تىنىس-تىرشىلىگىن زەردەلەۋ جانە ەستە ساقتاۋ جالپىۇلتتىق بىرەگەيلىكتى نىعايتۋعا ىقپال ەتەتىنىن اتاپ ءوتتى. وسى ماقساتتا ۇيىمداستىرىلعان ءىس-شارا «ساعادات» انىمەن باستالدى. سودان سوڭ ۇلتتىق قورعانىس ۋنيۆەرسيتەتىنىڭ وقىتۋشىلارى, توتەنشە جاعدايلار مينيسترلىگى, ۇلتتىق ۇلاننىڭ جوعارى وقۋ ورنىندا ءبىلىم الۋشى اسكەري قىزمەتشىلەرى ءدارىس وقىدى.
– سوعىس باتىرلارىنىڭ مەرەيتويلارىنا بايلانىستى مەملەكەت باسشىسىنىڭ ايتقان ءىس-شارالارىن جۇزەگە اسىرۋ ءۇشىن ۋنيۆەرسيتەتتىڭ پروفەسسورلىق-وقىتۋشىلار قۇرامى مەن ماگيسترانتتارى «س.ق.نۇرماعامبەتوۆتىڭ ءومىر جولى – جاۋىنگەرلىك ءداستۇر ساباقتاستىعىنىڭ تاريحى» دەگەن تاقىرىپتا ءدارىس دايىندادى. وسىنداي ءدارىستى بيىل قازان ايىندا حالىق قاھارمانى راحىمجان قوشقارباەۆتىڭ ءجۇز جىلدىعىنا وراي وتكىزۋدى دە جوسپارلاپ وتىرمىز, – دەدى ۇلتتىق قورعانىس ۋنيۆەرسيتەتىنىڭ باسشىسى, گەنەرال-مايور اسقار مۇستابەكوۆ.
ۇيىمداستىرۋشىلاردىڭ سوزىنشە, بۇل ءىس-شارا جاستاردىڭ بويىنداعى پاتريوتتىق رۋحتى وياتىپ, ومىرلىك باعدارىن ايقىنداۋعا سەپ بولادى. سوندىقتان ءدارىس ءبىر ۋاقىتتا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, قازاق ۇلتتىق ونەر ۋنيۆەرسيتەتى, قازاق ۇلتتىق حورەوگرافيا اكادەمياسى, س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى, «استانا» مەديتسينا ۋنيۆەرسيتەتى, Esil University, «تۇران-استانا» ۋنيۆەرسيتەتى, ەۋرازيا گۋمانيتارلىق ينستيتۋتى, Astana IT University, «استانا» حالىقارالىق ۋنيۆەرسيتەتى, قازاق تەحنولوگيا جانە بيزنەس ۋنيۆەرسيتەتى, دەنە شىنىقتىرۋ جانە بۇقارالىق سپورت اكادەمياسى جانە س.نۇرماعامبەتوۆ اتىنداعى اسكەري كوللەدجىندە ءوتتى.
– ساعادات نۇرماعامبەتوۆتىڭ تاعدىرى جارقىن ەستەلىكتەرگە تولى. ونىڭ ءومىر جولىندا بۇكىل الەمدى ءدۇر سىلكىندىرگەن, ميلليونداعان ادامنىڭ ءومىرىن جالماعان, تالاي تاعدىردى وزگەرتكەن سۇراپىل كەزەڭ بەينەلەنگەن. مەنى باتىردىڭ ۇشجىلدىق اسكەري ءبىلىمدى 3 ايدا الىپ شىققانى قاتتى تاڭعالدىردى. جاستاردىڭ ازاماتتىق ۇستانىمىنىڭ قالىپتاسۋىنا ۇلەس قوساتىن وسىنداي دارىستەردىڭ كوبىرەك وتكىزىلگەنى يگى, – دەيدى ستۋدەنت قاينار نۇريللا ۇلى.