قارالى حاباردى جەتكىزۋ مۇنشاما قيىن بولار ما؟ اياقاستىنان قاتەرلى دەرتكە بوي الدىرىپ, تاياۋدا عانا تۇركيادا وتا جاساتىپ كەلگەن سوڭ, استانادا ەم الىپ جاتىر ەدى... ارداقتى دوسىمىز, جازۋشى, ساياحاتشى, قازاقستان جازۋشىلار وداعى احمەت بايتۇرسىن ۇلى اتىنداعى سىيلىعىنىڭ لاۋرەاتى سەرىك بايحونوۆقا ۋاقىت بولىپتى...
1973 جىلى جيىرما جاسىندا تۇڭعىش حيكاياتى «جالعاسىم مەنىڭ – جالعاسىم مەنىڭ» «جالىن» جۋرنالىندا جاريالانىپ, جازۋشى رەتىندە قاتارىنان ەرتە تانىلعان سەرىك بايحونوۆتىڭ «ەڭ ىستىق ماۋسىم», «قوس شاتىرلى ءۇي», «سال ۇستىندەگى ماۋسىم», «قۇيىلىستا», «عاجاپستانعا ساياحات», «التاي اسۋ», ت.ب. كوپتەگەن اڭگىمە, حيكايات, رومان جانە ساياحات كىتابى جارىق كورگەن. ول قازاق تەلەۆيدەنيەسى ارقىلى تانىلعان «جىگىتتىڭ سۇلتانى», «تايبۋرىل», «سيقىرلى قازان», «قازاقتىڭ قاجىمۇقانى» رەسپۋبليكالىق كونكۋرستىق باعدارلامالارىنىڭ اۆتورى بولدى. سەكەڭ كاسىبي ساياحاتشى رەتىندە «سال ۇستىندەگى ماۋسىم», «ارالعا – اراشا», «ارنالارعا ءتىل بىتسە», «وسىمدىكتەر جەلىسىنە ساياحات», «بەتپاقدالا – ءشول ەمەس» ەكسپەديتسيالارىن باسقاردى.
قارالى حاباردى قۇلاعىم ەستىسە دە, كوڭىلىم سەنبەي, «قوش, باقۇل بول» دەۋگە ەرنىمنىڭ يكەمى كەلمەي وتىر. ءومىرى ومىرىمىزبەن بىتە قايناسقان قالامگەر دوسىمىزدىڭ فانيدەگى ساپارى اياقتالىپ, ماڭگىلىك عۇمىرى باستالدى...
بايبوتا قوشىم-نوعاي,
اقىن