«سەرىك بايحونوۆ قايتىس بولدى!» دەگەن سۋىق حابار تاڭەرتەڭنەن ميىمدا شىڭىلداپ تۇر... ەڭ العاش 1971 جىلى:
«سەرىك دەگەن – جاي عانا لاقاپ اتىم,
حالىق – مەنىڭ شىن اتىم, ماحابباتىم!» دەپ, ءور مىنەزدى ولەڭىمەن كەلىپ تانىسىپ ەدى. سودان بىرەر جىلدان كەيىن «جالعاسىم مەنىڭ – جالعاسىم مەنىڭ» دەگەن تىرناقالدى تاماشا پوۆەسىمەن جارق ەتىپ, پروزا كوگىنەن كورىندى. ادەبيەت الەمى جالت قارادى. سول كەزدە:
«ولەڭدى بايبوتا ەكەۋىڭە بەردىم, مەن ەندى قاراسوزبەن بولامىن!», دەدى. ايتقانىندا تۇردى.
سەرىك بايحونوۆ سودان بەرگى جارتى عاسىر بويى كەسەك-كەسەك شىعارمالارىمەن قازاق ادەبيەتىنىڭ بيىگىنەن تۇسكەن جوق. قارا ءسوزدىڭ جىلىگىن شاعىپ, مايىن ىشكەن شەبەرىنە اينالدى. كوپ جىلدارىن تەلەۆيدەنيەگە سارپ ەتىپ, ساياحاتشىلىق جولىن تاڭداپ, ارال تاعدىرى, سىر بويى ماسەلەلەرى تۋرالى سوقتالى حابارلار ءتۇسىرىپ قالدىردى.
«قالامگەرلىگىڭمەن قالىڭ قازاعىڭدى مويىنداتتىڭ, ەندى كينواكتەر رەتىندە ءبىر جارق ەتسەڭشى!», دەيتىنمىن كەيدە كەزدەسكەندە. ءتۇر-تۇلعاسى, سىر-سىمباتى گولليۆۋد اكتەرلەرىن ەسكە سالاتىن كورىكتى ازامات ەدى.
جۇپتارى جازىلماعان كۋرستاسى عابيدەن قۇلاحمەتتى اۋزىنان تاستامايتىن, بايبوتا اقىنعا دەگەن قۇرمەتى ەرەكشە بولاتىن. ەكەۋمىزدىڭ وسكەمەننەن كەلە جاتىپ, عابيدەنمەن كەزدەسەمىز دەپ, ونىڭ تۋعان شولپان اۋلىنا بۇرىلىپ, قونىپ قالعانىمىز بار. تۇنىمەن ۇيىقتاماي, اۋىل ادامدارىمەن اڭگىمە-دۇكەن قۇرعان. ول سونداي ساپاردىڭ بارىندە كەلەشەك شىعارمالارىنا نەگىز سالىپ جۇرەتىن ىزدەنگىشتىگىن اڭعاردىم. كاتونقاراعايدا ۋاقىت ءبولىپ, كەرجاقتىڭ ءتاۋىپ كەمپىرىن ات ارىتىپ ىزدەپ بارىپ, التايدىڭ ەمدىك شوپتەرى مەن تامىرلارى تۋرالى تاپتىشتەپ سۇراپ, تىزبەلەپ, مۇقيات جازىپ العانىنا كۋا بولدىم. كەيىن سونىڭ ءبارى ساياحاتشى پرجەۆالسكي مەن ونىڭ سوناۋ تيبەتكە دەيىنگى قيىن-قىستاۋ ساپارلارىندا جولباسشى بولعان زايساندىق قازاق باتىرى مىرزاش الديار ۇلى تۋرالى رومانىن جازعاندا پايداعا استى.
ءبىز بۇگىن ءار شىعارماسىن ابدەن شيراتىپ جازاتىن اسا دارىندى قالامداس قاتارلاسىمىزدان قاپىدا ايىرىلدىق. ورنى تولماس قازا. جازمىشتان – وزمىش جوق.
وتباسىنا, ۇلى جالعاس باستاعان بالالارىنا, تۋعان-تۋىستارىنا, قالىڭ وقىرماندارىنا كوڭىل ايتامىن. الدىڭنان جارىلقاسىن, قالامداس دوس! نۇرىڭ پەيىشتە شالقىسىن!
ۇلىقبەك ەسداۋلەت,
مەملەكەتتىك سىيلىقتىڭ لاۋرەاتى, اقىن