وسىدان تۋرا 29 جىل بۇرىن 7 ساۋىردە پامير تاۋىنداعى پشيحاۆر شاتقالىندا بەس ساعاتقا سوزىلعان قارۋلى قاندى قاقتىعىس كەزىندە ىشكى اسكەردىڭ 17 جاۋىنگەرى ەرلىكپەن قازا تاۋىپ, 33-ءى اۋىر جاراقات الدى. سودان بەرى جىل سايىن 7 ءساۋىر – ەرلىك كۇنى بولىپ سانالادى. قازاقستان باتالونىنىڭ قۇرامىندا تاجىك-اۋعان شەكاراسىن كۇزەتكەن شەكاراشىلار قازا تاپقان جاۋىنگەرلەردىڭ ەسىمىن ۇلىقتاۋدى داستۇرگە اينالدىرعان.
ۇقك شەكارا قىزمەتى الماتى وبلىسى بويىنشا دەپارتامەنتىنىڭ قاراساي اۋدانى بويىنشا شەكارا باسقارماسىنىڭ جەكە قۇرامى تاجىك-اۋعان شەكاراسىنىڭ ارداگەرلەرىمەن بىرگە 7 ساۋىردە ەرلىكپەن قازا تاپقان ۇلتتىق ۇلاننىڭ 17 ساربازىن ەسكە الدى.
ءىس-شارادا ءسوز سويلەگەن زاپاستاعى پولكوۆنيك سەرىك جاعاباەۆ سول جىلى تاجىكستاننىڭ شەكاراسىن كۇزەتۋگە اتتانعان 7-ءنشى روتانىڭ دارىگەرى بولىپ تاعايىندالعان بولاتىن. شەكاراشى ساردار پشيحاۆر شاتقالىندا بەس ساعاتقا سوزىلعان قارۋلى قاندى قاقتىعىس تۋرالى ءوزىنىڭ ەستەلىكتەرىمەن ءبولىستى.
ءىس-شارا بارىسىندا ارداگەرلەر مەن شەكارا باسقارماسىنىڭ جەكە قۇرامى اتالعان قازا تاپقان جاۋىنگەرلەرگە ارنالعان ەسكەرتكىشكە گۇل شوقتارىن قويدى. ەرلىكپەن قازا تاپقان 17 ساربازدىڭ رۋحتارىنا تاعزىم ەتتى.
سونداي-اق ەرلىك كۇنىنە وراي وتكىزىلگەن ءىس-شارالار دەپارتامەنتتىڭ رايىمبەك اۋدانى بويىنشا شەكارا باسقارماسىندا دا ءوز جالعاسىن تاپتى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى