مەملەكەت باسشىسى قاسىم-جومارت توقاەۆ قازاقستان مەن وزبەكستان ۇكىمەتتەرى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە ەنگىزىلگەن وزگەرىستەر تۋرالى زاڭعا قول قويدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مەملەكەت باسشىسى «2000 جىلعى 7 شىلدەدەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى», دەلىنگەن اقوردا حابارلاماسىندا.
زاڭنىڭ ماقساتى – ەكى ەل اراسىنداعى دوستىق قاتىناستاردى ودان ءارى دامىتۋ, ازاماتتاردىڭ ساپارلارىن رەتتەۋ, سونداي-اق ءبىر مەملەكەت ادامدارىنىڭ ەكىنشى مەملەكەتتىڭ اۋماعىندا بولۋىنا قولايلى جاعداي جاساۋعا قۇقىقتىق نەگىز قالىپتاستىرۋ بولىپ تابىلادى.
«قۇجاتتا تاراپتار ازاماتتارىنىڭ وزگە ەلدە بولۋ كەزەڭى شەكارادان وتكەن ساتتەن باستاپ 30 كۇننەن اسپاسا, وندا سول ەلدىڭ اۋماعىندا قۇزىرەتتى ورگانداردا تىركەلمەي بولۋدىڭ وڭايلاتىلعان ءتارتىبى كوزدەلىپ وتىر. وسىلايشا, ەكى مەملەكەت ازاماتتاردىڭ ءوز اۋماقتارىندا ۋاقىتشا تىركەۋسىز ءجۇرۋدىڭ مەرزىمىن 5 كۇننەن 30 كۇنگە دەيىن ۇلعايتتى», دەلىنگەن 2024 جىلعى 21 اقپانداعى سەنات تالقىسىندا.