رەسپۋبليكانىڭ سولتۇستىگى مەن باتىس ايماقتارىن قارعىن سۋ الىپ جاتقاندا وڭتۇستىك جۇرتى قاراپ قالمادى. دەرەۋ جىلۋ جيناپ, گۋمانيتارلىق كومەك جونەلتۋگە كىرىستى. سونداي جاردەم كەرۋەنى جۋىردا شىمكەنتتەن سۋ باسقان ءوڭىر اقتوبەنىڭ ويىل اۋدانىنا اتتاندى. قالالىق جاستار رەسۋرستىق ورتالىعىنان جولعا شىققان گۋمانيتارلىق كومەك كەرۋەنىندە قاجەتتىلىكتىڭ ءبارى قامتىلدى. جۇك كولىكتەرى حالىقتان جينالعان ازىق-ت ۇلىك, كيىم-كەشەك, سانيتارلىق-گيگيەنالىق زاتتارمەن, جامىلاتىن, توسەنەتىن جابدىقتارمەن تولىپ جولعا شىقتى.
جاستار رەسۋرستىق ورتالىعىندا جىلۋ جيناۋعا 130 ەرىكتى جاردەمدەستى. اتالعان ورتالىقتىڭ باسشىسىنىڭ ورىنباسارى باعلان ىلەسوۆ 10 تونناداي ماتەريالدىق كومەك جينالعانىن, وسىنداي قيىن ساتتە جۇدىرىقتاي جۇمىلعان شىمكەنتتىكتەر ازاماتتىق تانىتقاندارىن ايتادى.
سونىمەن بىرگە سۋ تاسقىنى باستالعان ساتتە ء«ۋاسيلا», «جانين» قايىرىمدىلىق قورلارى مەن «ازات نيۋس» اقپارات اگەنتتىگى بىرلەسىپ مەگاپوليستەن جىلۋ جينايتىن شتاب اشقان. كۇنى كەشە ولار دا گۋمانيتارلىق كومەكتى تاسقىننان زارداپ شەككەن ايماقتارعا جونەلتتى. ء«ۋاسيلا» قايىرىمدىلىق قورىنىڭ باسشىسى كايۋمجان ابدۋللاەۆتىڭ ايتۋىنشا, 1 فۋرا, 15 الفارد اۆتوكولىگى اقتوبە وبلىسىنا جولعا شىقتى. جىلۋ جيناسۋعا كومەك بەرگەندەر ىشىندە «اۆتونۇر» مەن «الاش» بازارلارىنىڭ جاردەمىن ەرەكشە اتاپ ءوتتى. ماسەلەن, اۆتونۇرلىق ساۋداگەرلەر ەكى گازەل, الاشتىقتار ءبىر گازەل اۆتوكولىگىنە سياتىن جاپ-جاڭا كيىم-كەشەكتەر جيىپ بەرگەن. قايىرىمدىلىق قورى الەۋمەتتىك جەلى ارقىلى توپتارعا تاراتۋدىڭ ناتيجەسىندە حالىق قولدان كەلگەنشە كومەك بەرۋگە ۇمتىلعان. ءبىرى زاتتاي جاردەم كورسەتسە, ەكىنشىسى اقشالاي اۋدارعان.
«سۋ شايعان ايماقتاردا دا شتابىمىز جۇمىس ىستەپ جاتىر. ول جاقتا دا ەرىكتىلەرىمىز بار. بارعان سوڭ كورەمىز, قاي ءوڭىر كوبىرەك زارداپ شەكسە سول جاققا قاراي كومەكتى جونەلتەمىز. ول باتىس قازاقستان نەمەسە قوستاناي وبلىسى بولۋى مۇمكىن. ءبىز توتەنشە جاعداي ورىن العان ايماقتاردان حابار الىپ تۇرمىز. قازىرگى تاڭدا ول جاقتا ازىق-ت ۇلىك قورى جەتكىلىكتى ەكەن. كيىم-كەشەك تە بارشىلىق. ەندىگى كەرەگى جەكە باس تازالىعىنا قاجەتتى گيگيەنالىق زاتتار ەكەن. جولدىڭ كوبىن سۋ شايىپ كەتكەن. كوپىرلەر وتۋگە جارامايدى. سوندىقتان سۋدىڭ ورتاسىندا قالىپ قويعان اعايىنعا جەرگىلىكتى «مۇعجيزا» قايىرىمدىلىق قورى موتورلى قايىقتارمەن كومەكتەرىمىزدى جەتكىزەدى», دەدى ك.ابدۋللاەۆ.
«جانين» قايىرىمدىلىق قورىنىڭ ەرىكتىسى مۇرات پەرنەبەكوۆ ەكى كۇننەن بەرى كۇن-ءتۇن دەمەي قوردىڭ شتابىندا جۇمىس ىستەپ جاتقانىن ايتادى. ءوزىنىڭ نەگىزگى ماماندىعى – ەلەكتريك. بىراق بوس ۋاقىتىندا وسىنداي قايىرىمدىلىق قورىندا جاردەمشى بولىپ تەگىن كومەكتەسەدى. ەرىكتىنىڭ مالىمدەۋىنشە, كەيىنگى ەكى كۇندە شتابتا جۇمىس كۇشەيگەن. ويتكەنى جان-جاقتان كەلىپ جاتقان قايىرىمدىلىق كومەك كوپ. ءتىپتى جيناستىرىپ, رەتتەۋگە ارەڭ ۇلگەرىپ جاتىر. بۇل دا بولسا, قيىن كەزدە جالعىز قالدىرمايتىن حالقىمىزدىڭ جاناشىر پەيىلى بولسا كەرەك-ءتى.
«ەلدىڭ سۋ تاسقىنىنان قينالعانى جۇرەگىمە قاتتى باتادى. بار دۇنيەڭنەن, جيعان-تەرگەنىڭنەن ءبىر پاستە ايىرىلىپ قالۋ وڭاي ەمەس, ارينە. ايتەۋىر باس امان بولسىن, سوعان دا شۇكىرشىلىك دەيىك. ال ءوزىم 3-4 جىلدان بەرى ەرىكتى بولىپ جۇمىس ىستەيمىن. بۇدان ماعان ەشقانداي پايدا كەلمەيدى. بىراق مەن مۇنىڭ ءبارىن ەلدىڭ رازىلىعى ءۇشىن جاساپ جاتىرمىن. ايتپەسە ماماندىعىم – ەلەكتريك. سول كاسىبىممەن شۇعىلدانىپ, پايدا ۇستىنە پايدا تاۋىپ جۇرە بەرسەم دە بولار ەدى. بىراق ءوز قامىڭدى ويلاي بەرمەي ەلدىڭ دە مۇقتاجدىعىنا كومەكتەسپەسەڭ, نەسىنە ەر-ازامات بولىپ ءجۇرمىز», دەدى زاتتاردى تاسي ءجۇرىپ بىزبەن اڭگىمەلەسكەن ەرىكتى جاس.
شىمكەنت