ارناۋلى الەۋمەتتىك قىزمەت الاتىن 2,2 مىڭنان استام ازامات قىزمەت كورسەتۋ ۇدەرىستەرىن تسيفرلاندىرۋ جونىندەگى قاناتقاقتى جوباعا تارتىلدى. بۇل جونىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
قاراعاندى وبلىسىندا ارناۋلى الەۋمەتتىك قىزمەتتەردىڭ تيىمدىلىگى مەن اشىقتىعىن ارتتىرۋ ماقساتىندا قاناتقاقتى رەجىمدە 10 ستاتسيونارلىق ۇلگىدەگى ارناۋلى قىزمەتتەر كورسەتۋ ورتالىعىنىڭ بازاسىندا جۇمىس ۇدەرىستەرى تسيفرلاندىرىلىپ جاتىر. جوبا اياسىندا 2 258 ارناۋلى قىزمەت الۋشىنىڭ مەديتسينالىق كارتالارى تسيفرلاندىرىلىپ, كوپتەگەن جۇمىس ۇدەرىسى اۆتوماتتاندىرىلدى.
ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ مينيسترلىكتەرى مەن قاراعاندى وبلىسىنىڭ اكىمدىگى اراسىندا ارناۋلى الەۋمەتتىك قىزمەتتەر كورسەتۋ ورتالىقتارىنىڭ قىزمەتىن ترانسفورماتسيالاۋ بويىنشا ىنتىماقتاستىق تۋرالى مەموراندۋم جاسالدى.
سالانىڭ اقپاراتىنا سۇيەنسەك, بۇگىنگى تاڭدا ءوڭىردىڭ 10 ورتالىعىنان 358 قىزمەتكەر «سوتسيۋم» اقپاراتتىق جۇيەسىنە قوسىلعان. وندا ەلەكتروندىق فورماتتا 2 258 ارناۋلى الەۋمەتتىك قىزمەت الۋشىلاردى تىركەۋدەن, العاشقى تەكسەرۋدەن باستاپ كورسەتىلگەن قىزمەتتەر مەن الىنعان ءدارى-دارمەكتەرگە دەيىن جۇرگىزۋ جۇزەگە اسىرىلماق.
«قاناتقاقتى جوبا ارناۋلى الەۋمەتتىك قىزمەتتەر كورسەتۋ جۇيەسىندە تاۋەكەلدەردى دالىرەك باسقارۋعا ارنالعان قۇرالداردى ۇسىنادى. تسيفرلاندىرۋ كورسەتىلەتىن قىزمەتتەردىڭ ساپاسىن جانە الۋشىلاردىڭ قاناعاتتانۋ دەڭگەيىن ارتتىرۋعا ىقپال ەتەدى. بۇل جوبانىڭ باستى جەتىستىكتەرىنىڭ ءبىرى – اتاۋلىلىقتى قامتاماسىز ەتۋ», دەيدى ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قىزمەتتەر دەپارتامەنتىنىڭ ديرەكتورى سىرىم ءناسي.
ورتالىقتاردىڭ قىزمەتىن تسيفرلاندىرۋ الەۋمەتتىك قىزمەتتەر كورسەتۋ سالاسىنداعى بارلىق ءراسىمنىڭ, ستاندارت پەن تالاپتىڭ ورىندالۋىن اۆتوماتتى تۇردە باقىلاۋعا جانە قۇجاتتاۋعا مۇمكىندىك بەرەدى. بۇل ۇلتتىق زاڭنامانى قاتاڭ ساقتاۋعا, سونداي-اق بيۋدجەت قاراجاتىن جۇمساۋدىڭ اشىقتىعى مەن تيىمدىلىگىن ارتتىرۋعا ىقپال ەتەتىن بولادى.
بۇگىنگى كۇندە وبلىس دەڭگەيىندە جۇمىس ۇدەرىسىن, ماتەريالدىق-تەحنيكالىق رەسۋرستارمەن قامتاماسىز ەتىلۋىن, توسەكتىك ورىنداردىڭ تولىمدىلىعىن, كادرلارمەن قامتاماسىز ەتىلۋىن جانە ولاردىڭ بىلىكتىلىك دەڭگەيىن, ۆەدومستۆولىق باعىنىستى مەكەمەلەردىڭ شىعىندارىن مونيتورينگتەۋ مۇمكىندىگى بار.
جوبا ءبىراز ناتيجەگە قول جەتكىزىپ تە ۇلگەردى. ماسەلەن, قۇجاتتامانى تولتىرۋ ۋاقىتى قىسقارتىلعان, بارلىق قۇجاتتاما ەلەكتروندىق فورماتقا اۋىستىرىلعان, دارىلىك زاتتاردىڭ دەربەستەندىرىلگەن ەسەبى جانە وڭالتۋدىڭ جەكە باعدارلاماسىنىڭ ورىندالۋىن باقىلاۋ قامتاماسىز ەتىلىپ, العاشقى مەديتسينالىق-سانيتارلىق كومەككە جانە وبلىس ستاتسيونارلارىنا ەلەكتروندىق تاعايىنداۋ جۇزەگە اسىرىلىپ جاتىر.
جالپى, بۇل جوبا ورتالىقتاردىڭ جۇمىسىن جاقسارتىپ قانا قويماي, ارناۋلى الەۋمەتتىك قىزمەتتەر كورسەتۋ جۇيەسىنىڭ قولجەتىمدىلىگىن ارتتىرا تۇسپەك.