راديوەلەكترونيكا جانە بايلانىس اسكەري-ينجەنەرلىك ينستيتۋتىندا راديوتەحنيكالىق جانە ينفوكوممۋنيكاتسيالىق تەحنولوگيالاردىڭ وزەكتى ماسەلەلەرىنە ارنالعان حالىقارالىق عىلىمي-پراكتيكالىق كونفەرەنتسيا ءوتتى.
ءىس-شاراعا ەلىمىزدىڭ جانە قىرعىزستاننىڭ جوعارى اسكەري وقۋ ورىندارى, ۇلتتىق قورعانىس ۋنيۆەرسيتەتى, «گرانيت» ارنايى كونسترۋكتورلىق-تەحنولوگيالىق بيۋروسى» جشس, ءىىم الماتى اكادەمياسى, ءال-فارابي اتىنداعى قازاق ۇلتتىق ۋنيۆەرسيتەتى, حالىقارالىق اقپاراتتىق تەحنولوگيالار ۋنيۆەرسيتەتىنىڭ وكىلدەرى قاتىستى.
ديالوگكە جەتەكشى عالىمدار, اديۋنكتتەر, ماگيسترانتتار, دوكتورانتتار, اسكەري جانە قوس ماقساتتاعى پەرسپەكتيۆالى ينفوكوممۋنيكاتسيالىق تەحنولوگيالاردى ازىرلەۋمەن جانە مەڭگەرۋمەن اينالىساتىن كاسىپورىندار مەن مەكەمەلەردىڭ ينجەنەر-تەحنيك ماماندارى, سونداي-اق راديوتەحنيكالىق ماماندىقتاردىڭ ستۋدەنتتەرى مەن كۋرسانتتارى قوسىلدى.
– بايلانىس, باسقارۋ جانە راديوتەحنيكانى اۆتوماتتاندىرۋ سالاسىندا اسكەري كادرلاردى دايارلاۋ ءبىلىم بەرۋ ساپاسىن ارتتىرۋدى عانا ەمەس, ودان وزگە جوعارى وقۋ ورىندارى اراسىنداعى تىعىز بايلانىستى ۇيىمداستىرۋدى, ءبىلىم بەرۋ جانە اقپاراتتىق ءبىلىم بەرۋ تەحنولوگيالارىن جەتىلدىرۋدى دە قامتيدى, – دەدى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باسشىسى, پولكوۆنيك قايرات ءداۋىتوۆ.
كونفەرەنتسياعا قاتىسۋشىلاردىڭ باستى نازارى قورعانىس سالاسىندا تسيفرلىق تەحنولوگيالاردى قولدانۋ ماسەلەلەرىن تالقىلاۋعا باعىتتالدى. اتاپ ايتقاندا, ۇشقىشسىز باسقارىلاتىن قۇرىلعىلاردى انىقتاۋ ءۇشىن راديولوكاتسيالىق ستانسالاردى زەرتتەۋ جانە ازىرلەۋ توڭىرەگىندە بولدى. راديولوكاتسيالىق ستانسا جۇيەلەرىندە جاساندى ينتەللەكتتى قولدانۋ دا تالقىلاندى.
قارۋلى كۇشتەردى ساپالى راديوبايلانىسپەن قامتاماسىز ەتۋ ماسەلەلەرىنە نازار اۋدارىلدى. زاماناۋي تەحنولوگيالار اسكەري قىزمەتتىڭ وسى ماڭىزدى ەلەمەنتىن بارىنشا تۇراقتى ەتۋگە جانە قورعانىش قابىلەتىن ارتتىرۋعا مۇمكىندىك بەرەدى.
كونفەرەنتسيا اسكەري راديوتەحنيكا جانە بايلانىس سالاسىنداعى جەتەكشى ماماندار اراسىندا تاجىريبە جانە يدەيا الماسۋ الاڭىنا اينالدى. جيىن قورىتىندىسىندا بايلانىس جۇيەلەرىن ودان ءارى دامىتۋ جانە اسكەري كادرلاردى دايارلاۋدى جەتىلدىرۋ جونىندە ۇسىنىستار قابىلداندى.