ءبىر جەتىدەن بەرى قازاقتىڭ ۇلى دالاسى تەلەگەي تاسقىن اكەلگەن تابيعاتتىڭ كوزسىز اپاتىمەن الىسىپ, ەسىمىز – ەكەۋ, ءتۇسىمىز تورتەۋ بولىپ جاتقان اۋىر, ازاپتى كۇندەردىڭ بىرىندە استانادان ارقامىزدى ايازداي قارىعان سۋىق حابار كەلدى... جانىمىزدى جابىرقاتتى...
ومىربەك بايگەلدى ەسىمدى الىپ جۇرەكتى, ابىز ويلى اعامىز مىنا جارىق جالعانمەن قوشتاسىپتى...
وتكەن عاسىردىڭ سەكسەنىنشى جىلدارى...
مارقۇم نەسىپبەك داۋىتاەۆ تەلەفون سوعىپ: ء«اي, قۇرداس, ءبىزدىڭ قوردايدىڭ كوزى اشىلاتىن بولدى... اۋدانىمىزعا مىقتى باسشى كەلدى. سوزىمەن ەلدى ۇيىتىپ, ىسىمەن حالقىن ىرزا قىلاتىن ومىربەك اتتى اعامىز كەلدى!..» دەگەنى ەسىمدە... اۋەلى, وزىنەن بۇرىن قولىنا قالام ۇستاعان قاۋىمعا ومەكەڭنىڭ ءسوز سويلەسە «الىستان سەرمەپ, جاقىننان تەربەپ», باياعىنىڭ بيلەرىندەي اعىل-تەگىل ويىن ەمىن-ەركىن جەتكىزەتىن شەشەن ءتىلى مەن كوسەم مىنەزى تۋرالى اڭىزى جەتتى. ادەبيەت پەن ونەر تۋرالى, ەل تاريحى مەن قوعام مىنەزى جايىندا ايتقاندارىن ءجيى-ءجيى ەستىپ جۇردىك... ءىسى مەن ءسوزى ۇيلەسكەن, حالىق جۇرەگىنە جول تاپقان قايراتكەر تۇلعا, وبلىسقا ءبىرىنشى باسشى بولدى. ومەكەڭ تۋرالى ماعان تامسانىپ, ءسوز ايتقان ەكىنشى ادام – قازاقتىڭ زاڭعار ءبىتىمدى ۇلى جازۋشىسى ءابىش كەكىلباەۆ. «كونە تارازدىڭ تاريحىنا ءتىل بىتىرەر تۇلعالى ازاماتتىڭ وبلىس تىزگىنىن ۇستاعانى ورىندى بولدى. ومىربەك – زامانا رۋحىن تاپ باسىپ تانيتىن قايراتكەر تۇلعا! تاعلىمى مەن ءتالىمى, ءبىلىمى مەن بىلىگى مول ازامات!» دەپ ەدى ابەكەڭ...
سىرتتاي اتى مەن اتاعىنا قانىققان اكىم اعامىزبەن جاقىن تانىسۋ مۇمكىندىگى 1990 جىلدىڭ كوكتەمىندە, قازاق كسر جوعارعى كەڭەسىنىڭ ءحىى شاقىرىلىمىندا جۇرگەندە بولدى. ءسوزى نىق, ويى تەرەڭ, ايتارىن ءارى-ءسارى ەتپەي, جەرىنە جەتكىزىپ ايتا بىلەتىن, جاي ايتپاي, شەگەلەپ ايتاتىن, وسى ءبىر مىنەزگە باي, سۇڭعىلا جۇرەكتى شەشەن ءتىلدى كىسىمەن ءار كەزدەسكەن سايىن رۋحاني بايىپ, ءومىرتانۋ, قوعامتانۋ, ادامتانۋ دەيتىن جازۋسىز قاعيدانىڭ كەڭىستىگىن ارالاپ قايتقانداي بولۋشى ەدىم... تالاي-تالاي جيىنداردا ومەكەڭنىڭ ەل تاعدىرىن وڭ جولعا باستار باتىل-باتىل ۇسىنىستاردى ورنىمەن ايتىپ, تاۋەلسىز جۇرتىمىزدىڭ دامۋىنا ايانباي تەر توككەن كەزدەرىنىڭ سان كۋاسى بولدىق...
ول تاعدىرىن ءتورت ت ۇلىك پەن جەرگە بايلاعان, جاڭا زامان قالىپتاستىرعان تەحنولوگيا مەن عىلىمعا بەت بۇرعان قازاق ەسىمدى كەڭ مىنەز ەلدىڭ ادال پەرزەنتى رەتىندە, ۇرپاعىنىڭ, ۇلتىنىڭ مارتەبەسىن اسقاق ۇستاپ, ءوز ۇستانىمىمەن ءومىر ءسۇردى, ەڭبەك ەتتى, عۇمىر كەشتى. ومەكەڭ العاشقى رەسپۋبليكا سەناتىنىڭ توراعاسى بولدى. الىس-جاقىن شەتەلدەرمەن بايلانىستى جولعا قويىپ, ۇلت پارلامەنتىنىڭ كەڭ قانات جايىپ, ورنىعۋىنا زور ۇلەسىن قوستى. سەناتتا ءجۇرىپ ون التى جىل سابىرلى مىنەزى, سالماقتى ءجۇرىسى, دارا ءبىتىمدى قالىبىمەن زاڭگەرلىك بيلىكتىڭ پيراميدالدى تورىنە جاراسار تۇعىرلى تۇلعا, اقىلگوي اعا, ابىرويلى ساراپشى بولا ءبىلدى... سەناتتا ءجۇرىپ, بوزبالا كەزىنەن قيالىنا قانات ءبىتىرىپ, كوڭىلىنە تىنىم بەرمەگەن ەل تاريحى مەن ەل وتكەنى تۋرالى تامىرىن تەرەڭ-تەرەڭ عاسىرلار قويناۋىنان تارتاتىن تاريحقا دەگەن قۇمارلىعىن ۇزبەي, بايىتۋمەن بولدى.
كەمەل باسشى, حالىق ويى مەن جۇرەك قاعىسىن ءدال ۇستاپ وتىرار مەملەكەتشىل تۇلعا رەتىندە ومەكەڭ ساياسات الەمىندە سوزىنەن دە, جۇرىسىنەن دە جاڭىلماي, تاۋەلسىز قازاق ەلىنىڭ يىعىنا ارتقان اۋىر جۇگىن قايىسپاي كوتەرە ءبىلدى. قۋانىش سۇلتانوۆتىڭ سوزىمەن ايتقاندا, «ارقايسىسى ءبىر-ءبىر مارقاسقا» قاعيداتتى ماسەلەگە كەلگەندە شەگىنۋدى بىلمەيتىن وزبەكالى جانىبەك, ءابىش كەكىلباەۆ, شەرحان مۇرتازا, قاراتاي تۇرىسوۆ, كەنجەعالي ساعاديەۆ, مارات وسپانوۆ سەكىلدى كەشەگى ۇلت پارلامەنتىنىڭ كوركى بولعان, قازاقتىڭ ءورى مەن تورىنە جاراسقان تاعى ءبىر كەسەك ءبىتىمدى, ءور مىنەزدى, تاۋەلسىزدىك ءداۋىرى تۇساۋىن كەسكەن ءىرى تۇلعامىز باقيعا اتتانىپ بارادى.
باقۇل بولىڭىز, ەلگە تۇتقا بولعان ومەكە!
قوش, اعا!
يمانىڭىز سالامات بولسىن, ءورىستى ءداۋىردىڭ وركەندى تۇلعاسى!
نۇرلان ورازالين,
مەملەكەتتىك سىيلىقتىڭ لاۋرەاتى