شىمكەنتتە ايەلدى ۇرىپ-سوققان ەر ادام «بۇزاقىلىق» بابىمەن ءبىر جىلعا سوتتالدى

وقيعا بەينە جازباعا ءتۇسىپ قالعان. 

جابىرلەنۋشىنىڭ ايتۋىنشا, ول 2024 جىلدىڭ 13 اقپانىندا دوسىنىڭ تۋعان كۇنىنە بارا جاتقان. ول گۇل دۇكەنىنە كىرىپ, گۇل ساتىپ العان. كەيىن تاكسي شاقىرۋ ءۇشىن دۇكەننىڭ سىرتىنا شىعىپ تۇرعان. كەنەتتەن بەلگىسىز بىرەۋ ونى ارتىنان اياقپەن تەپكەنىن سەزگەن.

«ارتىما قاراسام, اياعىندا ارەڭ تۇرعان ەر ادامدى كوردىم. نەگە ەكەنى بەلگىسىز, ءبىر ورىندا قاتىپ قالدىم, ءۇن دە قاتا المادىم, ماعان بايقاۋسىزدا ءتيىپ كەتتى دەپ ويلادىم. بىراق ول ماعان جاقىنداپ باسىمنان قاتتى ۇردى. كوزىلدىرىگىمنىڭ قالاي ۇشىپ كەتكەنىن دە بايقاماي قالدىم», دەپ ەسىنە الدى ايەل.

جابىرلەنۋشىنىڭ ايتۋىنشا, ول كوشەدە ءوتىپ بارا جاتقان ادامداردان كومەك سۇراعان, الايدا وعان ەشكىم كومەكتەسپەگەن. 

«سول كەزدە دۇكەنگە كىرىپ كەتتىم. «پوليتسيا, كومەكتەسىڭدەر!» دەپ ايقايلاي باستادىم. ادامدار قاسىمنان مەنى كورمەگەندەي وتە بەردى. مەن جىلاپ جىبەردىم, ەسەڭگىرەپ قالدىم. ەرەسەك ايەلدەر «وعان نە ايتتىڭ؟» دەگەن سياقتى سۇراقتاردى قويدى. ۋچاسكەلىك پوليتسيا قىزمەتكەرلەرى دە سول سۇراقتى قويدى, نەگە ەكەنى بەلگىسىز, تەرگەۋشى مەن كريمينولوگ تا كىنا مەنەن دەپ ويلادى. ماعان شابۋىل جاساعان ادام دا پوليتسيانىڭ كوزىنشە مەنى تاۋىپ الىپ, ولتىرەمىن دەپ ايعايلادى», دەدى ول.

ايەلگە شابۋىل جاساعان ادامنىڭ جاسى 50-دە ەكەنى بەلگىلى بولدى. بويجەتكەننىڭ ايتۋىنشا, ول باسىنان العان سوققىنىڭ سالدارىنان ميى شايقالىپ, بەلى اۋىرىپ, تەرەڭ پسيحولوگيالىق جاراقات العان.

شىمكەنت قالالىق سوتى حابارلاعانداي, 50 جاستاعى ەر ادام «بۇزاقىلىق جاساعانى ءۇشىن» قاماۋعا الىندى.

«سوتتالۋشى و. 13 اقپان 2024 جىلى ساعات 18:00 شاماسىندا شىمكەنت قالاسى ءنۇرسات تۇرعىن الابىنىڭ №1 عيماراتىنىڭ جانىندا ورنالاسقان ء«نۇرسات-2» دۇكەنىنىڭ الدىندا ماس كۇيىندە جابىرلەنۋشىنى ۇرىپ-سوققان. ول جابىرلەنۋشىنى ارقاسىنان سەبەپسىز تەۋىپ, ودان كەيىن «بەت تۇسىنان جۇدىرىقپەن ۇرىپ, دەنساۋلىعىنا زيان كەلتىرگەن. سوتتالۋشىنىڭ كىناسى جابىرلەنۋشىنىڭ ايعاقتارىمەن, زاتتاي دالەلدەمەلەرىمەن, سوت-مەديتسينالىق ساراپتاماسىنىڭ قورىتىندىسىمەن, جانە ءىس بويىنشا جينالعان باسقا دا دالەلدەرمەن كەلتىرىلدى», دەپ حابارلادى شىمكەنت سوتى.

سوت ۇكىمىمەن ەر ادام بۇزاقىلىق جاساعانى ءۇشىن كىنالى دەپ تانىلىپ, 1 جىلعا باس بوستاندىعىنان ايىرىلدى.

سوتتىڭ ۇكىمى زاڭدى كۇشىنە ەنگەن جوق.