اقتوبە قالاسىنىڭ ىرگەسىندەگى كيرپيچنىي تۇرعىن الابىندا ورنالاسقان «Green Land» دەمالىس ايماعىنا جاقىن جەردە ەلەك وزەنىنىڭ بەتىندەگى مۇز قاتپارلارىن جارۋ جۇمىستارى جۇرگىزىلدى. وعان ۇلتتىق ۇلاننىڭ «بۇركىت» ارنايى ماقساتتاعى بولىمشەسىنىڭ 3 ساپەرى مەن 4 تەحنيكاسى قاتىستى. بۇدان بولەك قاۋىپسىزدىك ءۇشىن ايماقتى قورشاۋ شارالارىنا 29 جاۋىنگەرى بولىنگەن, دەپ حابارلايدى Egemen.kz.
سىرەسپە مۇزدىڭ كوبەسىن سوگۋ جۇمىستارىنا ۇلتتىق ۇلاننىڭ «بۇركىت» ارنايى ماقساتتاعى بولىمشەسىمەن بىرگە قورعانىس مينيسترلىگىنىڭ 30238 اسكەري ءبولىمىنىڭ 3 ساپەرى مەن 1 تەحنيكاسى اتسالىستى. سونىمەن قاتار مۇز جارۋعا جەدەل-قۇتقارۋ جاساعىنىڭ 8 ادامى, 2 بىرلىك تەحنيكاسى مەن 2 قايىعى جانە تجد-نىڭ 4 ادامى, 1 تەحنيكاسى, 1 درونى جۇمىلدىرىلعان. سونداي-اق پد-نىڭ قىزمەتكەرلەرىمەن قاتار وقۋ جاتتىعۋ روتاسىنان 3 ادام مەن 1 تەحنيكا تارتىلعان.
اۋدانى 16 مىڭ شارشى مەتر بولاتىن اۋماقتا جۇرگىزىلگەن جۇمىس كەزىندە 88 كگ اممونيت, 1000 مەتر دەتوناتسيالىق سىم, 50 دانا ەلەكترودەتوناتور, 1000 مەتر ماگيسترالدىق سىم پايدالانىلدى. قولعا الىنعان جۇمىس ءساتتى اياقتالدى.
ايتا كەتەيىك, سۋ تاسقىنى كەزىندە وزەن بەتىندەگى مۇزدىڭ قوزعالماي جاتۋى سۋدىڭ ەرنەۋىنەن اسىپ كەتۋىنە اكەلەدى. سوندىقتان دا اسكەريلەر سۋ تاسقىنىنىڭ ىقتيمال قاۋىپ-قاتەرلەرىنىڭ الدىن الۋ جۇمىستارىن اتقاردى.