كەشە, 2 ءساۋىر, استانا قالاسىندا بيشىمباەۆ ءىسى بويىنشا كەزەكتى سوت وتىرىسى وتكەن ەدى, دەپ جازادى Egemen.kz.
كەشكە دەيىن جالعاسقان پروتسەستە بيشىمباەۆقا ءسوز بەرىلىپ, ەكس-مينيستر نۇكەنوۆامەن وتكەن ءبىر جىلدىق وتباسىلىق ومىرىندەگى بارلىق جايسىز وقيعاعا مارقۇم ايەلىن كىنالاپ, ءوزىن «سول قورلىققا شىداعان قۇربان» رەتىندە كورسەتۋگە تىرىسقان.
سوت وتىرىسىنان كەيىن الەۋمەتتىك جەلىلەردە بيشىمباەۆتىڭ قوعامعا, سوت وتىرىسىنداعى القابيلەرگە مانيپۋلياتسيا جاسالىپ جاتقانى تۋرالى كوپتەگەن جازبالار تارادى. بيشىمباەۆتىڭ بۇرىنعى ايەلى دە بۇل تاقىرىپتان شەت قالمادى.
«كەلىسەمىن, ول (بيشىمباەۆ – رەد.) مانيپۋلياتسيا شەبەرى. تاعى دا (سوت زالىندا – رەد.) توقتاماي بالالار تۋرالى ايتا بەرەدى. نەگە ەكەنىن, مەن تۋرالى دا «سالتاناتقا جازدى» دەپ ايتىپ جاتىر. مۇنىڭ ءبارى وتىرىك», دەپ جازدى نازىم قاھارمان.