ءوڭىر كاسىپورىندارى سالانىڭ قاجەتىن وتەپ وتىر

وبلىستىق كاسىپكەرلەر پالا­تاسىنىڭ سالالىق دامۋ جانە جوبالاردى سۇيەمەلدەۋ ءبولىمىنىڭ باسشىسى نۇرلان قۇساەۆتىڭ ايتۋىنشا, وڭىردەگى مەكتەپتەر مەن بالاباقشا­لار­عا جانە مەديتسينالىق مەكەمەلەرگە جيھازدار مەن قۇرال-جابدىقتار ساتىپ الۋدا جەرگىلىكتى كاسىپورىندار ونىمدەرىنە تاپسىرىس بەرۋگە ىقپال ەتۋ ءۇشىن مونيتورينگ جۇرگىزۋ باستالدى.

«وسىعان دەيىن مۇناي كومپانيا­لارى­نا جەرگىلىكتى كاسىپورىندار جۇ­مى­سىن تانىستىرىپ كەلسەك, بۇل جولى ءبىلىم بەرۋ ۇيىمدارى مەن مە­دي­تسي­نا مەكەمەلەرى وكىلدەرىن شاقىر­دىق. اقتوبە وبلىسى وندىرىستىك ءوڭىر بول­عان­دىقتان, وسى جەردەگى ورتا ءون­دىرىس ءىرى كاسىپورىندارعا قاجەتتى بۇ­يىم­­­دار­دى شىعارۋعا ماماندانعان. ءبىز­دىڭ تالداۋىمىز بويىنشا, مەتالل قۇراس­تىر­­مالارىمەن اينالىسىپ, اعاش­تان تۇر­مىستىق بۇيىمدار جاسايتىن سەرىك­تەس­تىكتەر ءبىلىم جانە دەنساۋلىق ساقتاۋ مەكەمەلەرى سۇرانىسىنا وراي قاجەتتى جيھازدار شىعارا الادى», دەيدى ول.

15 جىلدان بەرى جەرگىلىكتى نارىقتا مە­تالل قۇراستىرما بۇيىمدارىمەن تا­­نى­­مال «ستالليت» جشس-دا 30-دان اسا ادام ەكى اۋىسىمدا ەڭبەك ەتەدى.

بىزگە ەلىمىزدىڭ باسقا وڭىرلەرىنەن تاپسىرىس ءجيى تۇسەدى. قازىر تۇركىستان وبلىسىنان تۇسكەن تاپسىرىس – 50 دانا مەتالل شكافتى دايىنداپ جاتىرمىز. نەگىزىنەن سپورت مەكتەپتەرى ءۇشىن كيىنىپ-شەشىنۋگە ارنالعان مەتالل شكافتار, ءدارى-دارمەكتەر ساقتايتىن شكاف پەن ۇستەلدەر, مەتالل قورشاۋلار, سەيفتەر دايىندايمىز. قاجەتتى شيكىزاتتى «مەتاللينۆەست» كوم­پا­نيا­سىنان ساتىپ الامىز. كوكتەم تۋا تاپسىرىس كوبەيىپ كەلە جاتقاندىقتان, الداعى ايدا ءۇشىنشى اۋىسىمدى قوسقالى وتىرمىز. وعان جاڭادان دانەكەرلەۋشىلەر مەن قۇراستىرۋشىلار كەرەك. جۇمىسىن جاڭادان باستاعانداردى ۇيرەتەتىن تاجىري­بەلى نۇسقاۋشىلارىمىز بار. ولار بىزدە ۇزاق جىلدان بەرى جۇمىس ىستەپ كەلەدى. جۇمىسكەرلەرىمىزدىڭ ءجيى اۋىساتىنىن جاسىرا المايمىن. سونىڭ ىشىندە جۇمىسقا جاڭادان كەلگەن جاستار ءجيى اۋىسادى. جالپى, اقتوبەدەگى كاسىپورىنداردىڭ بارىندە وسىنداي جاعداي قالىپتاسقان. مۇنىڭ ناقتى سەبەبىن بىلمەيمىن. دەگەنمەن وندىرىستە دانەكەرلەۋ مەن قۇراستىرۋدى مەڭگەرىپ العاندار جالاقىعا ەمەس, ءوز قالاۋىمەن جۇمىس ىستەگىسى كەلەدى. وندىرىستە ءتارتىپ قاتاڭ, العان مىندەتتەمەڭدى ۋاقتىلى, ساپالى اياقتاۋ كەرەك. بۇل جەردە كىدىرىس جوق. وندىرىستە جۇرگەن ادامنىڭ باسقاعا الاڭداۋعا ۋاقىتى بولمايدى. بىزدە جالاقى جاقسى, ارنايى جۇمىس كيىمدەرىمەن قامتاماسىز ەتىلگەن جانە جۇمىسكەرلەرىمىز ءۇشىن ىستىق تاماق دايىندايتىن اسحانا دا بار», دەيدى «ستالليت» جشس وندىرىستىك توبىنىڭ جەتەكشىسى ارتۋر باراكباەۆ.

كاسىپورىنداردىڭ تاۋارىن كورۋگە كەلگەن مەكەمە وكىلدەرىنىڭ اراسىندا ەستۋ جانە كورۋ قابىلەتى ناشار بالالارعا ارنالعان ارنايى مەكتەپ-ينتەرنات-كوللەدج كەشەنى وكىلدەرى دە بولدى. وسى ارنايى ءبىلىم بەرۋ ۇيىمى ديرەكتورىنىڭ وقۋ ءىسى جونىندەگى ورىنباسارى ەلۆيرا قوبىلاش بالالارىمىزدىڭ قۇلاپ-سۇرىنبەۋى ءۇشىن ەرەكشە جۇمساق, ىڭعايلى جيھازدار كەرەك دەيدى.

«جاقىندا اسحانا ۇستەلدەرى مەن ورىندىقتارىن, وقۋشى پارتالارىن, كيىم سالاتىن شكافتار مەن كەرەۋەتتەردى ساتىپ الۋعا مەملەكەتتىك تاپسىرىس جاريالايمىز», دەيدى ول.

وسى مەكتەپ-ينتەرناتتا بۇگىندە 131 بالا تاربيەلەنىپ جاتىر. مۇندا بالدىرعاندار 3 جاستان باستاپ قابىل­دانىپ, ودان كەيىن ارنايى مەكتەپتە وقىپ, ونى بىتىرگەن سوڭ جەرگىلىكتى كوللەدجدە شاشتاراز جانە تىگىنشى ماماندىعىن قاتار الىپ شىعادى. بالالار اپتاسىنا بەس كۇن ينتەرناتتا جاتىپ وقيدى دا, سەنبى كۇنى ۇيلەرىنە جىبەرىلەدى.

كەلەسى بارعان نىسان – «Vega-جيھاز» سەرىك­تەستىگى. وسى كاسىپورىننىڭ اعاش تسەحىندا كەڭسەلىك جانە تۇرمىستىق جيھاز­دار, وقۋشى پارتالارى مەن ورىن­دىق­تار جاسالسا, وندىرىستىك تسەحىندا ءتىس ەمدەۋ ەمحانالارىنا ارنالعان جيھازدار, وپەراتسيادان كەيىنگى ناۋقاستارعا ارنالعان مەديتسينالىق كەرەۋەتتەر جاسالادى. بۇل تسەحتا ىستەلگەن پارتالاردى جەرگىلىكتى ءبىلىم بەرۋ ۇيىمدارى ءجيى سا­تىپ الادى. «Vega-جيھاز» بۇيىم­دارىنا قىزىلوردا مەن شىمكەنت قالا­لا­رىنان ءجيى تاپسىرىس ءتۇسىپ جاتادى ەكەن. تىعىزدالعان اعاش ۇنتاقتارىنان جاسالعان تاقتايلار – رەسەيدەن, قاپتاۋىشتار – گەرمانيادان, اعاش تاقتايلار ريددەر قالاسىنان جەت­كىزىلەدى.

كەلەسى نىسانىمىز – ۇيالى تەلەفوندار ساقتاۋعا ارنالعان ۇياشىقتارى بار مەتالل شكافتار, پوشتا جاشىكتەرى, ءورت سوندىرۋگە ارنالعان قالقان, مەتالل سەيفتەر, باسسەيندەردە كيىنىپ-شەشىنۋگە ارنالعان شكافتار جاساۋمەن اينالىساتىن «FERROM» جشس. سەرىكتەستىك جەرگىلىكتى نارىقتا 2016 جىلدان بەرى جۇمىس ىستەيدى.

«قازىرگى ۋاقىتتا سوڭعى ۇلگىدەگى قوندىرعىلار ساتىپ الىنىپ, ءوندىرىستى قايتا جاراقتاندىرۋدى باستادىق. اقتو­بەنىڭ سپورت مەكتەپتەرى, ءجۇزۋ باسسەينى باسشىلارى بىزگە كيىم شەشەتىن شكاف­تار بۇرىشتارىن دوعالداۋ قىلىپ, جۇمساق ماتەريالدارمەن قاپتاپ جاساۋدى تاپسىرادى. قازىر مەتالل شكافتى قالاي جۇمسارتامىز دەپ باسىمىز قاتىپ وتىر. جاقىندا الماتىداعى 1200-دەن استام وقۋشىسى بار مەكتەپتىڭ تاپسىرىسىن ورىنداپ, دەنەشىنىقتىرۋ ساباعىندا كيىنىپ-شەشىنۋگە ارنالعان 662 شكاف جاساپ جىبەردىك. سوڭعى جىلدارى اشىق بوياۋ رەڭكى بار, ورنىنان قوزعاۋعا جەڭىل شكافتارعا تاپسىرىس بەرەدى. الايدا تەندەر شارتىن جاريالاعاندا الەۋمەتتىك تاپسىرىس بەرۋشىلەر سپورتتىق ۇيىر­مە­لەرگە ارنالعان شكاف بولىكتەرىنىڭ ولشەمىن جانە سەكتسيا سانىن, مەتالل قالىڭدىعىن كورسەتپەيدى. ادەتتە وسى شكافتاردا مەتالل قالىڭدىعى 0,6 سم-دەن كەم بولماۋى كەرەك. ءبىز وسى ولشەم­مەن دايىندايمىز. سىرتتان كەلە­تىن مەتالل بۇيىمداردا قالىڭدىق ساق­تالمايدى, وتە جۇقا مەتالدان ازىر­لەپ, بوياۋىن قالىڭداتا جاعادى. قىس­قاسى, مەتالدى ۇنەمدەيدى. ونىڭ باعاسى ار­زان بولعان سوڭ تەز ءوتىپ كەتەدى. CT-KZ وندىرىستىك سەرتيفيكاتىنىڭ بارلىق تالابى بويىنشا جاسالعان ءبىزدىڭ مەتالل بۇيىمدار ىسىرىلىپ قالادى. الەۋمەتتىك تاپسىرىس بەرۋشىلەر مەملەكەتتىك تاپسىرىستى ۇتىپ العان كاسىپكەرلەردەن كورسەتىلگەن ولشەمدەردى ساقتاۋدى تالاپ ەتۋ كەرەك», دەيدى سەرىك­تەستىك قۇرىلتايشىسى سەرگەي ەنا.

كوپپاتەرلى تۇرعىن ءۇي سالاتىن قۇرى­لىس كومپانيالارى وسى مەكەمەدەن كونديتسيونەرلەرگە ارنالعان مەتالل تورلار, پوشتا جاشىكتەرىن ءجيى ساتىپ الادى. قازىرگى كەزدە عيمارات ىشىندەگى مەتالل ءورت قالقاندارىن جاساۋعا كىرىسكەن. بىلتىر قالاداعى مەكەمەلەر 1,5 دانا ءورت ءسوندىرۋ بۇرىشىنا تاپسىرىس بەرىپتى. ۇلكەن تسەحىندا ءبىر مەزگىلدە 15 ءتۇرلى بۇيىم دايىندالادى. 40 جۇمىسشىسى ەكى اۋى­سىم­دا ەڭبەك ەتەدى. ساتىلىم جۇيەسى جاقسى جولعا قويىلعان. استانا مەن الماتىدا ەكى قويماسى بار, شيكىزاتتى «مەتاللينۆەست» كومپانياسىنان ساتىپ الادى.

«وندىرىستە قۇرال-جابدىقتى جاڭار­تىپ وتىرۋ جۇمىستىڭ تيىم­دى­لىگىن ارتتىرادى. ءبىر ستانوك ىستەن شىقسا, جىگىتتەرىمىز ساتىلىمداعى سوڭعى ۇلگىلەرىن ساتىپ الايىق دەپ ۇسىنىس تاستايدى. جاڭا ستانوكتار مەن قوندىرعىلاردان اقشا اياماۋ كەرەك», دەيدى «FERROM» جشس باس قۇرىلتايشىسى.

ءبىز ارالاعان كاسىپورىنداردا نەگىزىنەن دانەكەرلەۋشى, قۇراستىرۋشى, بوياۋشى, وراۋشى ماماندار ەڭبەك ەتەدى ەكەن. جۇمىسشىلارىنىڭ سانى 15-40 ادامنان اسپايدى ءارى ولار ءبىر تسەح ىشىندە جۇمىس ىستەيدى. قازىرگى كەزدە شاعىن تسەحتار, كوپ ورىن المايتىن جابدىقتار سۇرانىسقا يە كورىنەدى. پاندەميادان كەيىن اۋماعى وتە ۇلكەن عيماراتتارعا قاجەتتىلىك ازايعان. وندىرىستىك عيماراتتاردى جالعا الۋشىلار ارتىق شىعىنعا بارماس ءۇشىن شاعىن ورىنداردى قولاي كورەدى. ونىڭ ۇستىنە, كوممۋنالدىق تاريف باعاسى دا جوعارىلاپ بارادى. ەكونوميكانىڭ باستى قوزعاۋشى كۇشى – شاعىن جانە ورتا ءوندىرىس, وڭدەۋشى سالا بولعاندىقتان, وسى سالاداعى تاۋار وندىرۋشىلەر وڭىر­لىك سۇرانىستارعا ساي ءونىم وندىرۋگە ىقى­لاستى. ولار ءۇشىن ەڭ ماڭىزدىسى –تاۋار­دىڭ ءوتۋى.

اقتوبە وبلىسى