مال سۇمەسىمەن كۇن كورگەن مالساق قاۋىم قاتال قىستىڭ تەزىنە ازەر شىداپ, اۋپىرىمدەپ شىقتى. قىس ىشىندە جاڭبىر جاۋىپ, ونسىز دا تار, جۇدەۋ جايىلىمداعى ولىقاۋعا اۋزى جەتپەگەن جىلقى جارىقتىقتا شىعىن كوپ. «جىعىلعانعا – جۇدىرىق» دەگەندەي, بىرەۋدىڭ اق ادال مالىن وڭاي ولجا كورەتىندەر قاتارى سيرەمەي تۇر.
ەرەيمەنتاۋ اۋدانىنىڭ پوليتسيا قىزمەتكەرلەرى شارۋاعا 8,5 ميلليون تەڭگە شىعىن كەلتىرگەن ۇرىلاردى ۇستادى. ولار 13 باس جىلقى ۇرلاعان. تەبىندە جۇرگەن جىلقىنى «گازەل» اۆتوكولىگىنە ارتىپ, ىزدەرىن سۋىتىپ كەتپەك بولعان. پوليتسيا قىزمەتكەرلەرىنىڭ جەدەل ءىز كەسىپ, شيراق قيمىلداعاندارىنىڭ ارقاسىندا ۇرىلار قولعا ءتۇستى. 11 باس جىلقى يەلەرىنە قايتارىلدى. از عانا ۋاقىتتىڭ ىشىندە باۋكەسپەلەر سەمىز ەكى جىلقىنى سويىپ, ساتىپ ۇلگەرگەن. قازىر بۇل ءىس بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
وڭاي ولجاعا قۇنىققاندار ءبىر بۇل ەمەس. بۇل تاراپتاعى زاڭ قاتايىپ, جازا اۋىرلاعانىمەن, «داندەگەن قارساق قۇلاعىمەن ءىن قازادى» دەگەندەي, شارۋانىڭ اقادال مالىن يەسى جوق دۇنيەدەي كورەتىندەر وكىنىشكە قاراي كەزدەسىپ قالادى. تاياۋدا تاعى ءبىر ۇرلىق اشكەرە بولدى. بۇل جولى ۇرىلار ەكى جىلقىنى قولدى قىلعان. مال يەسىنە كەلگەن شىعىن 800 مىڭ تەڭگەنىڭ كولەمىندە.
بۇل قىلمىسقا قاتىسى بارلاردىڭ ۇستىنەن ءىس قوزعالىپ, بۇرىن-سوڭدى وسى توڭىرەكتە تىركەلگەن مال ۇرلىعىنا قاتىسى بار-جوعى تەكسەرىلىپ جاتىر. وبال دەگەن ۇعىمنىڭ ديدارى وڭسا, جان-جاعىن ومىرا وقساتاتىندار باس كوتەرمەك. ايتسە دە, باۋكەسپەگە بۇعالىق سالاتىن قۇقىق قورعاۋ ورگاندارىنىڭ قىزمەتكەرلەرى ەل اقىسىن جىبەرمەۋگە تىرىسادى. قورعان بولماق. ەڭ ۇلكەن قورعان اركىمنىڭ ار-ۇياتى شىعار, بالكىم.
اقمولا وبلىسى