كورنەكتى جازۋشى جۇسىپبەك ايماۋىت ۇلى (1889 - 1931) پەداگوگيكا, پسيحولوگيا سالاسىنان قۇندى وقۋ قۇرالدار جازىپ قالدىرعان. سونىڭ ءبىرى – 1924 جىلى ورىنبوردا 3500 تيراجبەن جارىق كورگەن, 186 بەتتىك «تاربيەگە جەتەكشى» (بالا وقىتۋشىلارعا) اتتى كىتابى. بۇل ەڭبەككە بيىل 100 جىل تولىپ وتىر.
اۆتور اتالعان ەڭبەگiندە: «ادام مiنەزiنiڭ, اقىل-قايراتىنىڭ ءارتۇرلi بولۋى – تاربيەنiڭ ءتۇرلi-ءتۇرلi بولۋىنان… ادام بالاسىنىڭ ۇرلىق iستەۋi, وتiرiك ايتۋى, كiسi توناۋى, ءولتiرۋi سياقتى بۇزاقىلىقتاردى جاساۋى – تاربيەنiڭ جەتiسپەگەندiگiنەن», دەي كەلە, بالا تاربيەسiندە تۋعان ەلدiڭ ادەت-عۇرپى مەن سالت-ءداستۇرiنiڭ بەلگiلi مولشەردە قالاي اسەر ەتەتiنiن عىلىمي تۇرعىدان دالەلدەي تۇسكەنى اڭعارىلادى.
شىعارما ءتورت بولىمنەن, 29 تارماقشادان تۇرادى. كىتاپتىڭ «ديداكتيكا» اتتى بولىمىندە, تاربيەنىڭ پسيحولوگيالىق نەگىزدەرى (ىنتالى وقىتۋ, ۇيرەتۋ ادىستەرى, ماشىقتانۋ جولدارى, وقىتۋداعى كورنەكىلىك, وقىتۋ تۇرلەرى, ت.ب.) وتكەن عاسىردىڭ 20-جىلدارىنداعى قازاق مەكتەپتەرىنىڭ ومىرىنەن الىنعان ناقتىلى مىسالدارمەن تەرەڭ تالدانادى. ەڭبەكتىڭ ءتورتىنشى بولىمىندە, پەداگوگيكالىق, پسيحولوگيالىق كەيبىر ماسەلەلەر ءسوز بولادى. ۇستاز بەن شاكىرت ىنتىماقتاستىعىنىڭ باستى بەلگىلەرى قازاق مەكتەبىندە ساباق وتكىزۋدىڭ وزىندىك ەرەكشەلىكتەرى ايتىلادى. كىتاپ سوڭىندا تەرميندەر بەرىلگەن. مىسالى, مۋزىكانى – اۋەز ونەرى, ەتيكانى – ادەمىلىك ءپانى دەگەن ەكەن...
كىتاپ تۋرالى كەزىندە ءبىزدىڭ گازەتىمىزدىڭ باستاۋى «ەڭبەكشى قازاقتا» (1925 جىلى) بىلاي دەپ باعا بەرىلگەن: «جۇسىپبەكتىڭ «تاربيە جەتەكشىسى» كىتابى – جىل قۇسى. بۇل كىتاپتىڭ ءتىلى وتە جەڭىل, جاڭا سارىنمەن جازىلعان. كىتاپ ءار وقۋشىنىڭ ۇستەلىنىڭ ۇستىندە جاتۋى كەرەك».
سونداي-اق بۇل تۋىندى تۋرالى اكادەميك سەرىك قيراباەۆ: «جۇسىپبەكتىڭ ارتىندا ءبىرتالاي عىلىمي مۇرا قالدى. ول حالىق اعارتۋ كوميسسارياتىندا پەداگوگيكالىق وقۋ ورىندارىندا قىزمەت ىستەي ءجۇرىپ, جاس ۇرپاقتى جاڭا رۋحتا تاربيەلەۋگە, عىلىمنىڭ ءار سالاسىندا جان-جاقتى ءبىلىم الۋىن كوزدەگەن ەڭبەكتەر, وقۋ قۇرالدارىن جازدى. ولاردىڭ ىشىندە «تاربيەگە جەتەكشى» (بالا وقىتۋشىلارعا) كىتابى ەلەۋلى ءرول اتقارادى. بۇل تۋىندى ارينە, بۇگىنگى پەداگوگيكا مەن پسيحولوگيانىڭ مەتودولوگياسى تۇرعىسىنان ءالسىز كورىنسە دە, ءوز ءداۋىرى ءۇشىن اسا پايدالى قىزمەت اتقاردى. قازاق جاستارىنا وسى عىلىمدار نەگىزىندە العاشقى مالىمەت بەردى, عىلىمي تەرميندەردىڭ تۋىنا نەگىز بولدى» («قايتا ورالعان قالامگەر»: قۇراست. ۆ.كۇزەمباەۆ. الماتى – 2003. 24-ب) دەپ جازسا, فيلولوگيا عىلىمدارىنىڭ دوكتورى تۇرىسبەك راقىمجان: «بۇل كىتاپتا ديداكتيكا مەن پەداگوگيكالىق پسيحولوگيالىق عىلىمي استارلى, ۇلت تىلىندەگى ءتالىم-تاربيەلىك تەرميندەر جۇيەسى ءسوز بولادى. سونىمەن قاتار بالانى وقىتۋدىڭ ەرەجەلەرىن, زاڭدارىن باياندايتىن دۇرىس جۇيەسىن كورسەتۋگە تالپىنعان», دەپ وي ءتۇيىپتى.