قازىرگى ۋاقىتتا قارساقباي كەنتىندەگى سۋدىڭ دەڭگەيى قالىپتى. دەسە دە وڭىردەگى احۋالدى ءوز دەڭگەيىندە ۇستاپ تۇرۋ ءۇشىن شتاب كەزەكشىلىگى ۇزدىكسىز جۇمىس ىستەپ تۇر. بۇل رەتتە ۇلىتاۋ وبلىسى اكىمى بەرىك ابدىعالي ۇلى تاراپىنان احۋالدى قاتاڭ باقىلاۋدا ۇستاۋدان بولەك, حالىقتى الدىن الا حاباردار ەتىپ وتىرۋ جۇمىستارى تاپسىرىلدى, دەپ حابارلايدى Egemen.kz اتالعان وبلىس اكىمدىگىنە سىلتەمە جاساپ.
ايتا كەتسەك, قارساقباي كەنتىنىڭ سۋ توعانى مەن «شاۋىپكەل» توعانىندا دا سۋ دەڭگەيى كوتەرىلدى. سالدارىنان كەنتتەگى ەكى اۆتوموبيل وتكەلى ماڭىنداعى جولدى سۋ باستى. جەرگىلىكتى اكىمدىك, مەملەكەتتىك مەكەمەلەر, ۇيىمدار مەن ەرىكتى تۇلعالاردىڭ بىرلەسە اتقارعان ءىس-شارا ناتيجەسىندە تۇرعىن ۇيلەردى سۋ باسۋ دەرەكتەرى تىركەلگەن جوق. كەنتتەگى توعاندا اعىندى سۋدىڭ الدىن الۋ جۇمىستارىنا قارساقباي مەتاللۋرگيالىق زاۋىتىنىڭ قىزمەتكەرلەرى دە تارتىلدى.
تاعى ءبىر ايتا كەتەتىن جايت, 28 ناۋرىزدا وبلىس اكىمى بەرىك ابدىعالي ۇلى جەزدى كەنتىندە باسپاناسىن سۋ باسقان ازاماتتارمەن كەزدەسىپ, شىعىنعا ۇشىراعان وتباسىلار ۋاقىتشا ورىندارعا كوشىرىلەتىنىن, توتەنشە جاعداي اياسىندا قاجەتتى كومەك كورسەتىلەتىنىن جەتكىزدى.
«زارداپ شەككەن وتباسىلار تۇگەل قاۋىپسىز جەرگە كوشىرىلسىن. مەردىگەر انىقتالىپ, ساراپتاما جاسالعان سوڭ بارلىق شىعىن وتەلەدى», دەدى ءوڭىر باسشىسى. جەرگىلىكتى اتقارۋشى ورگاننان 15, توتەنشە جاعدايلار دەپارتامەنتىنەن 50-گە جۋىق, پوليتسيا دەپارتامەنتىنەن 30-دان استام قىزمەتكەر, جالپى سانى 13 تەحنيكا مەن 3 سورعى جۇمىس ىستەپ جاتىر.
ەسكە سالساق, 28 ناۋرىزعا قاراعان ءتۇنى ۇلىتاۋ اۋدانىنا قاراستى جەزدى كەنتىندە 10-عا جۋىق ءۇيدى سۋ باسقان. ىزىنشە سول ۇيلەردەن جانە جاقىن اۋماقتاعى باسپانالاردان باس-اياعى 26 وتباسى ەۆاكۋاتسيالاندى. قازىرگى ۋاقىتتا كەنتتىڭ جاتاقحاناسىنا ورنالاستىرۋ جۇمىستارى جۇرگىزىلىپ جاتىر.