كەشە ءماجىلىستىڭ الەۋمەتتىك-مادەني دامۋ كوميتەتىنىڭ ۇيىمداستىرۋىمەن «مەملەكەتتىك اقپاراتتىق ساياساتتى جەتىلدىرۋ جانە وڭىرلىك بۇقارالىق اقپارات قۇرالدارىن, ونىڭ ىشىندە باسپا باسىلىمدارىن مەملەكەتتىك قولداۋ» اتتى دوڭگەلەك ۇستەل ءوتتى.
كوميتەت توراعاسى اسحات ايماعامبەتوۆتىڭ جەتەكشىلىگىمەن وتكەن دوڭگەلەك ۇستەلگە ءماجىلىس دەپۋتاتتارى, مادەنيەت جانە اقپارات ۆيتسە-ءمينيسترى قانات ىسقاقوۆ, ونلاين نەگىزدە رەسپۋبليكالىق جانە ايماقتارداعى اقپارات قۇرالدارىنىڭ باسشىلارى, ۇكىمەتتىك ەمەس ۇيىمدار جەتەكشىلەرى, وبلىس, قالا اكىمدەرىنىڭ ورىنباسارلارى قاتىستى.
– بۇگىنگى اقپاراتتىق داۋىردە باق-تىڭ ماڭىزى زور. وزدەرىڭىزگە بەلگىلى, بۇگىندە اقپاراتتىق كەڭىستىكتە فەيكتەر مەن ديپفەيكتەر قاپتاپ تۇر. كەيبىر ساراپشىلار بۇل قۇبىلىستى پوستشىندىق ءداۋىرى دەپ تە ايتا باستادى. سوندىقتان جاساندى ينتەللەكتىنىڭ دامۋىمەن قوسا فەيكتەر مەن ديپفەيكتەردىڭ سالدارىنان ينفودەميا دەگەن ۇعىم دا كەڭ تارالىپ كەلەدى. وسىعان وراي مەملەكەتتىك اقپاراتتىق ساياساتتىڭ, جەرگىلىكتى بۇقارالىق اقپارات قۇرالدارىنىڭ ءرولى ەرەكشە بولماق. سول سەبەپتى ءبىز بۇل ماسەلەنى كۇن تارتىبىنە ارنايى شىعارىپ وتىرمىز, – دەگەن اسحات ايماعامبەتوۆ اقپارات قۇرالدارىنداعى كەيبىر كەلەڭسىز جايتتار مەملەكەتتىك اقپاراتتىق تاپسىرىستىڭ تيىمدىلىگىن ارتتىرۋ ماسەلەلەرىن قايتا قاراۋعا ماجبۇرلەپ وتىرعانىن جەتكىزدى. سونداي-اق ول ايماقتارداعى, اسىرەسە اۋداندىق گازەتتەرگە نەوليبەرالدىق پاراديگما اياسىندا قاراۋعا بولمايتىنىن اتاپ ءوتتى.
– ويتكەنى جەرگىلىكتى باسىلىمدار ەشقاشان قارجىلىق تابىس اكەلمەيدى. سوندىقتان ولاردىڭ پايداسىن قارجىلىق كورسەتكىشتەر ارقىلى باعالاماي, يدەولوگيالىق تيىمدىلىگىن باسىمدىققا الۋىمىز كەرەك, – دەدى ا.ايماعامبەتوۆ.
جيىندا بايانداما جاساعان مادەنيەت جانە اقپارات ۆيتسە-ءمينيسترى ق.ىسقاقوۆ ءسوزىن سالاداعى كوكەيكەستى ماسەلەدەن باستادى. ول قازىر مەرزىمدى باسىلىمداردىڭ جاعدايى جاقسى ەمەس ەكەنىن اتاپ ءوتتى.
– كوپ اۋدان باسىلىمدارىن بىرتىندەپ جوعالتا باستادىق. ءتىپتى رەسپۋبليكالىق گازەتتەر دە جابىلىپ جاتىر. كەيىنگى جىلدارى جابىلۋ ۇدەرىسى ازداپ باسەڭسىگەنىمەن, بولاشاقتا ءالى دە ۇلكەن تاۋەكەلدەر بار. 1991 جىلى باق سانى 350 بولعان. بۇگىندە ولاردىڭ قاتارى 4 مىڭعا جۋىق. سونىڭ ىشىندە 70 پايىزى, ياعني باسىم بولىگى مەرزىمدى باسىلىمدار, – دەگەن ۆيتسە-مينيستر بۇلاردىڭ كوبى تۇراقتى جارىق كورمەيتىنىن دە, اقپاراتتىق ساياساتقا تولىققاندى ارالاسپايتىنىن دا ايتىپ ءوتتى. سونداي-اق ول 20 ميلليون حالىقتىڭ ىشىنەن 400 مىڭ عانا وقىرمان گازەت-جۋرنالعا جازىلعانىن قىنجىلا جەتكىزدى.
جيىرماعا جۋىق ادام سويلەگەن دوڭگەلەك ۇستەلدە «ماسس-مەديا تۋرالى» زاڭنىڭ تەتىكتەرى, اقپاراتتىق تاپسىرىس تۇيتكىلدەرىن جويۋ, مەديا حولدينگتەردىڭ تيىمدىلىگىن ارتتىرۋ توڭىرەگىندە ۇسىنىستار ايتىلدى.
ماسەلەن, ۆيتسە-مينيستردەن كەيىن بايانداما جاساعان جامبىل وبلىستىق ءماسليحاتىنىڭ دەپۋتاتى, «Jasyn» اقپاراتتىق سايتىنىڭ باس رەداكتورى ورالحان ءداۋىت ايماقتارداعى مەدياحولدينگتەردىڭ قۇرىلۋىندا ەشقانداي بىرىزدىلىك جوق ەكەنىن العا تارتتى. ياعني قۇرىلتايشىلار ءتۇرلى مەكەمەلەردەن قۇرالعان. قۇددى ءبىر ءار وبلىس باسشىلىعى حولدينگتەردى قۇرعان كەزدە ءارتۇرلى زاڭنىڭ نەگىزىنە سۇيەنگەن سياقتى.
ال ءماجىلىس دەپۋتاتى رينات زايىتوۆ مەملەكەتتىك اقپاراتتىق تاپسىرىستى رەتتەمەس بۇرىن قوعامداعى قۇردىمعا كەتكەن گازەت وقۋ مادەنيەتىن قايتا قالىپتاستىرۋ كەرەكتىگىنە ەرەكشە نازار اۋداردى. دەپۋتات جاناربەك ءاشىمجان بۇگىنگى قازاق ءباسپاسوزىنىڭ ءحالىن مۇشكىل ەتىپ, قيىن جاعدايعا قالدىرعان مەكەمە «قازپوشتا» ەكەنىن اشىق ايىپتادى. ۋاقتىلى شىعىپ جاتقان گازەتتى ايلاپ ەلدىڭ قولىنا جەتكىزبەي وتىرعان ءمونوپوليستى تەزگە سالاتىن تەتىك پەن ءتارتىپتىڭ ءالى كۇنگە تابىلماي كەلە جاتقانىنا قىنجىلدى.
جيىندا جۋرناليستەردىڭ مارتەبەسىن ناقتىلاۋ جونىندە دە پىكىرلەر ايتىلىپ, بارلىق ۇسىنىس ءتيىستى مينيسترلىكتىڭ قۇزىرىنا جولداندى.