اياق استىنان شەتىن ءبىر شارۋانىڭ ىڭعايىمەن تاكسي شاقىرۋعا تۋرا كەلگەن. كوزدى اشىپ-جۇمعانشا جەتىپ كەلدى. تۇسكە دەيىن ءمۇيىز, تۇستەن كەيىن كيىز بولىپ جاتقان كوكسالپاق ۋاقىت. اياق استىنداعى شىنىداي جالتىراعان كوك مۇزدان قورعالاپ تاياقتاستام جەردەگى تاكسيگە جەتە السامشى. جۇرگىزۋشى – ەلۋلەر شاماسىنداعى قازاقتىڭ جىگىتى. كەشىكتىرگەنىمە رەنجىمەسىن دەپ كوڭىلىن اۋلاپ جاتىرمىن. ءتىل قاتقان جوق. قولىنداعى تەلەفونعا جازىلعان مەن تاپسىرىس بەرگەن مەكەنجايدى كورسەتتى. «جۇرەيىك پە؟» دەپ ىمدادى. باس شۇلعىدىم. كولىگى تاپ-تازا ەكەن, ۇقىپتى قولدىڭ تابى انىق بايقالىپ تۇر. ىسىنە مىعىم, تىندىرىمدى جاننىڭ ءبىرى بولعانى دا.
دىتتەگەن جەرىمە جەتكەن سوڭ تەلەفونعا جازىپ ءجون سۇراستىم. تسەلينوگراد اۋدانىنىڭ تۋماسى. اتى-ءجونى – جومارت بايقوشقاروۆ. ۇزاق جىلداردان بەرى كوكشەتاۋ قالاسىنىڭ تۇرعىنى. كاسىبى – 2010 جىلدان بەرى تاكسي جۇرگىزۋشىسى. وعان دەيىن ەتىكشى, كوشە سىپىرۋشى دا بولعان. پويىزدا ءجۇرىپ گازەت-جۋرنال دا ساتىپتى. كۇنكورىس قامى دا. وتباسىن اسىراۋ ءۇشىن. قىزى بوي جەتىپ, تۇرمىسقا شىققان, ۇلى – 16-دا. قارا قازان, سارى بالانىڭ قامى ءۇشىن جانىن جالداپ جۇمىس ىستەگەندە كوكسەگەنى – سولاردىڭ قامى. قاتارىنان كەم قىلماي وسىرسەم دەگەن ىزگى نيەت, اكەلىك اق پەيىل. قولىنان كەلەر جۇمىستىڭ ەشقايسىسىنان تارتىنىپ كورگەن ەمەس. تاعدىردىڭ سىناعىنا دا كوندىككەن. ىم مەن يشارادان ۇققانىمىز, باسقا تۇسكەننىڭ بارىنە ەمەننىڭ ءيىر بۇتاعىنداي شىدامدى بولۋى كەرەك. ودان باسقا نە ىستەرسىڭ؟
سالدەن سوڭ تەلەفون ارقىلى سۋردواۋدارماشىسىمەن تىلدەستىك. ىم مەن يشارادان كوپ ءتاۋىر. ادەتتە جولاۋشىلار تاكسي قىزمەتىنە وكپە-ناز دا ايتىپ جاتادى ەكەن. كوپتىڭ كوڭىلىن كىم تاپقان؟! ال جومارتقا شاعىم ايتىلماپتى.
الەۋمەتتىك جەلىدەگى تاكسي جۇرگىزۋشىسى مەن جولاۋشىنىڭ اراسىنداعى كيكىلجىڭ ءتۇسىرىلىپتى. ورتا جاستان اسقان, ءپىشىمدى ايەل جۇرگىزۋشىنىڭ يت تەرىسىن باسىنا قاپتاپ جاتىر. ءوزى دە ادۋىن ادام ەكەن, ءتىپتى ۇدەتىپ بارادى. ءبىر عانا كورىنىستەن بۇل جۇمىستىڭ وڭاي ەمەس ەكەنىن تۇسىنۋگە بولادى. نەشە قيلى بولمىس بار. تويدان تويىپ شىققاندار دا, كىمگە سوقتىعارىن بىلمەي جۇرگەن سوتقارلار دا تاكسي شاقىرۋى ابدەن مۇمكىن عوي.
– اكەم جۇمىسى قانشالىقتى قيىن بولسا دا, ۇيگە كەلگەندە قاباعىن ءبىر شىتىپ كورمەپتى, – دەيدى قىزى اسەم. – وتپەلى كەزەڭنىڭ وكپەك جەلى توڭدىرعاندا ساۋدا-ساتتىقپەن دە اينالىستى. ءتىلسىز تىرلىك ەتۋ ارينە, قيىن. بىراق سول تاۋقىمەتتىڭ بارىنە ءبىز ءۇشىن توزگەنىن جان-دۇنيەمىزبەن سەزەمىز. سوندىقتان اكەگە دەگەن قۇرمەت شەكسىز. قاي ۋاقىتتا بولسىن ارقاسۇيەر اسقار تاۋداي اكەمىزدىڭ بار ەكەنىنە ىشتەي شۇكىرشىلىك ايتىپ, پەرزەنتتىك پارىزىمىزدى وتەۋگە تىرىسىپ جۇرەمىز.
قىزىنىڭ ايتۋىنا قاراعاندا, اكەسى مەيلىنشە ۇستامدى, وتباسىنا شۋاق توگەتىن مەيىرىم-شاپاعاتى مول, ارا-تۇرا ادەمى ازىلىمەن دە كوڭىلدەرىن باۋراپ قوياتىنى بار. ەڭ باستىسى, جارىق كۇننىڭ ءبىر شوكىم ساۋلەسىنە دەگەن ءمولدىر ماحابباتى توڭىرەككە اراي شاشىپ تۇرادى. ەرتەڭگى كۇنگە دەگەن سەنىمىنە سەلكەۋ تۇسكەن ەمەس. ەڭ باستىسى دا سول ەمەس پە؟!
كوكشەتاۋ قالاسى