ۇلىستىڭ ۇلى كۇنى قارساڭىندا بەس قۇرلىقتا تانىمال قازاق كۇيلەرى كۇمبىرلەدى. كۇيشى قۇرمانعازى, دايراباي ەرنازار ۇلى مەن تۇركەش قالقا ۇلىنىڭ كومپوزيتسيالارىن 26 ەلدىڭ راديو تىڭداۋشىلارى تىڭدادى.
تىزىمدە تۇركيا, يران, بولگاريا, يسپانيا, ليتۆا, لاتۆيا, ماجارستان, حورۆاتيا, پولشا, گرۋزيا, قىرعىزستان, موڭعوليا, رەسەي, برازيليا, اقش, قىتاي, ءۇندىستان, يندونەزيا, وڭتۇستىك كورەيا, مالايزيا, تايلاند, ماروككو, ەفيوپيا, وڭتۇستىك افريكا راديوستانسالارى بار.
شەتەلدىك راديوستانسالاردا قازاق كۇيلەرىن روتاتسيالاۋ مادەنيەت جانە اقپارات مينيسترلىگى مەن سىرتقى ىستەر مينيسترلىگىنىڭ ۇيىمداستىرۋىمەن ىسكە اسىپ وتىر.
شەتەلدىك راديوستانسالاردا روتاتسيالاۋعا قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ ورىنداۋىنداعى «كوڭىلاشار», «سارىارقا», «بالبىراۋىن», «اداي», «سەرپەر», «دايرابايدىڭ كۇيى» كومپوزيتسيالارى جىبەرىلدى.
«شىعىستان باتىسقا دەيىنگى ءتۇرلى ەلدە بەلگىلى قازاق كۇيلەرىن روتاتسيالاۋ – قازاقستاننىڭ باي مادەني مۇراسىن جاھانعا ناسيحاتتاۋ ءۇشىن جاسالعان شاعىن بولسا دا, ماڭىزدى قادام جانە راديو تىڭداۋشىلاردى دومبىرا ۇنىمەن تانىستىراتىن بىرەگەي مۇمكىندىك», دەدى مادەنيەت جانە اقپارات ءمينيسترى ايدا بالاەۆا.
سونداي-اق سالا باسشىسى راديوستانسالاردىڭ قازاق شىعارمالارىنا دەگەن قىزىعۋشىلىعى وسى باعىتتاعى جۇمىستى جالعاستىرۋ قاجەتتىگىن ايعاقتايتىنىن اتاپ ءوتتى. بۇل ءۇردىس جىل سايىن قايتالاناتىن داستۇرگە اينالىپ, ال شەتەلدىك راديوستانسالار قورى باسقا دا قازاقتىڭ مۋزىكالىق شىعارمالارىمەن تولىعادى دەپ جوسپارلانىپ وتىر.