«فاراب» وبلىستىق امبەباپ عىلىمي كىتاپحاناسىندا مەرزىمدى اسكەري قىزمەتكە شاقىرىلۋشىلاردى سالتاناتتى تۇردە شىعارىپ سالۋ ءراسىمى ءوتتى. بۇل كۇنى وبلىستان 50 بالا الماتى قالاسىنىڭ دەسانتتىق-شابۋىلداۋ بريگاداسىنا اتتاندى, تاعى 30 بالا شەكارا قىزمەتىنە جىبەرىلەتىن كوكتەمنىڭ سوڭعى كوماندا قۇرامىنا كىردى, دەپ جازادى Egemen.kz.
سالتاناتتى ءىس-شاراعا تۇركىستان وبلىسى اكىمىنىڭ ورىنباسارى بەيسەن تاجىباەۆ, قورعانىس ىستەرى جونىندەگى دەپارتامەنتى مەن باسقارماسىنىڭ باسشىلىعى, قر قارۋلى كۇشتەرىنىڭ ارداگەرلەرى, باسقا مەملەكەتتەر اۋماعىنداعى اسكەري قيمىلدار ارداگەرلەرى, «انالاردىڭ جۇرەگى «سارباز انالار كوميتەتى» رقب وكىلى شاريفا مۋمينوۆا, «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى, سونداي-اق اسكەرگە شاقىرىلۋشىلاردىڭ تۋىستارى مەن جاقىندارى قاتىستى.
وبلىس اكىمىنىڭ ورىنباسارى بەيسەن تاجىباەۆ اسكەرگە شاقىرىلۋشىلار مەن قوناقتارعا ارناعان سوزىندە وڭىردە تۇراتىنىن 2,2 ميلليوننان استام ادامنىڭ 630 مىڭعا جۋىعى جاستار ەكەنىن اتاپ ءوتتى.
«بۇگىن ءبىز وبلىسىمىزدان اسكەرگە شاقىرىلۋشىلاردىڭ ەكى كومانداسىن اتتاندىرىپ جاتىرمىز. وسى ساتتە باۋىرجان مومىش ۇلىنىڭ «ەشكىم ىشتەن باتىر بولىپ تۋمايدى: باتىرلىق تا, مىنەز سەكىلدى وسكەن ورتا, كورگەن تاربيەگە بايلانىستى قالىپتاسادى» دەگەن سوزدەرىن ەسكە العىم كەلدى. بۇگىن اسكەرگە اتتانعان جىگىتتەر اسكەري سالانىڭ قىر-سىرىن مەڭگەرىپ, ايتۋلى ازاماتتارعا اينالادى دەپ سەنەمىن. بۇل وڭاي سالا ەمەس, ۇلكەن جاۋاپكەرشىلىكتى تالاپ ەتەدى. ءبىزدىڭ جىگىتتەر مىندەتتى ابىرويمەن اتقارادى دەگەن ويدامىن. بارشاڭىزعا ءساتتى ساپار, دەنساۋلىق تىلەيمىن», دەدى بەيسەنباي تاجىباەۆ.
قورعانىس ىستەرى دەپارتامەنتىنىڭ باستىعى پولكوۆنيك نۇرماحانبەت دۇيسەباەۆ اسكەرگە شاقىرىلۋشىلاردى وسىناۋ جاۋاپتى جانە ماڭىزدى كەزەڭمەن قۇتتىقتاپ, بۇل تاجىريبە ولارعا مىندەتتى تۇردە پايدالى بولاتىنىن اتاپ ءوتتى.
«قىزمەت بارىسىندا دەنەلەرىڭىز شىنىعىپ قانا قويماي, سونداي-اق جاۋاپكەرشىلىك پەن تارتىپكە نەگىزدەلگەن ناعىز ازاماتتىڭ ۇلگىسىنە اينالاسىزدار. بارلىعىنا ساتتىلىك پەن اماندىق تىلەيمىن», دەدى نۇرماحانبەت دۇيسەباەۆ.
كوكتەمگى اسكەرگە شاقىرۋ ناۋقانى كەزىندە وبلىستان 2500-گە جۋىق ادامدى شاقىرۋ جوسپارلانعان. بۇگىنگى تاڭدا شەكارا قىزمەتىنە 320-دان استام ەر-جىگىت جىبەرىلدى, ناۋرىز ايىنىڭ سوڭىنان باستاپ قر قارۋلى كۇشتەرىنىڭ اسكەري بولىمدەرىنە شاقىرۋ باستالدى. ءىس-شارا سوڭىندا تۇركىستان قالاسىنىڭ مادەنيەت ءۇيىنىڭ وكىلدەرى كونتسەرتتىك باعدارلاما ۇيىمداستىردى.