قازاقستان ۇلتتىق بانكى الاياقتىق جيىلەپ كەتكەنىن ەسكەرتىپ وتىر. ولار ءوزىنىڭ «قۇزىرەتىن» دالەلدەۋ ءۇشىن جالعان قۇجات ىستەپ, تۇتىنۋشىلارعا كورسەتەدى ەكەن.
«الاياقتار ازاماتتاردى الداپ, اقشا جىمقىرۋ ماقساتىندا ءوزىن ۇلتتىق بانكتىڭ قىزمەتكەرى رەتىندە تانىستىرىپ جۇرگەنىن ەستەرىڭىزگە سالامىز. سونىمەن قاتار بۇل سحەمادا «قۇقىق قورعاۋ نەمەسە ارنايى ورگانداردىڭ قىزمەتكەرلەرى» دە ايتىلادى. «ارنايى وپەراتسيا» نەمەسە تەكسەرۋ جۇرگىزۋدى سىلتاۋ ەتكەن الاياقتار ءىس-ارەكەتىنىڭ زاڭدى ەكەنىن راستاۋ ءۇشىن قوڭىراۋ جەلىسىن «ارنايى جانە قۇقىق قورعاۋ ورگاندارىنىڭ, ۇلتتىق بانكتىڭ قىزمەتكەرلەرىنە» جالعايدى, جالعان قىزمەتتىك كۋالىكتەردى, نۇسقاۋلىقتارى بار حاتتاردى, سونداي-اق «قاراجاتتى ساقتاندىرۋ» جانە بانك اۋدارىمدارىن جۇزەگە اسىرۋ تۋرالى دەرەكتەمەلەردى جىبەرەدى», دەپ حابارلايدى ۇلتتىق بانكتىڭ ءباسپاسوز ورتالىعى.
مۇنداي قۇجاتتاردا, كوبىنە نەسيە قارىزى نەمەسە ونىڭ وتەلۋى, سونداي-اق قاراجات اينالىمى تۋرالى ەگجەي-تەگجەيلى اقپارات بولادى. قوسىمشا قۇجاتتاردا قازاقستان رەسپۋبليكاسى مەملەكەتتىك ورگاندارىنىڭ «ۋاكىلەتتى تۇلعالارىنىڭ» قولى, اتى-ءجونى, ءمورى جانە باسقا دا راستايتىن دەرەكتەر كورسەتىلەدى.
بانك حابارلاماسىندا ايتىلعانداي كەي جاعدايدا الاياقتار «WhatsApp» مەسسەندجەرىندەگى پروفيلدەردى بۇزىپ, ونى ءوز مۇددەسى ءۇشىن پايدالانادى. مىسالى, ولار مەسسەندجەردى بۇزۋ ءۇشىن قىزىقتى ءارى سەندىرە بىلەتىن ۇتىس ويىندارى, الەۋمەتتىك ماڭىزى بار تاقىرىپتار تۋرالى ساۋالناما, داۋىس بەرۋ سياقتى ءتۇرلى سىلتاۋمەن تاراتىلاتىن قاۋىپتى سىلتەمەلەر جىبەرەدى. حابارلامانى العان ادام سىلتەمەنى باسقان كەزدە, الاياقتار «WhatsApp» مەسسەندجەرىندەگى ءپروفيلدى بىردەن يەمدەنىپ الادى.
ءارى قارايعى ءىس-ارەكەت وڭاي جالعاسادى. مەسسەندجەردى بۇزعان الاياقتار پروفيل يەسىنىڭ اتىنان ونىڭ جاقىن تۋىستارىنان, تانىستارىنان, دوستارىنان نەمەسە ارىپتەستەرىنەن ءارتۇرلى سىلتاۋمەن قارىزعا اقشا سۇرايدى. قارجىنى بانك كارتاسىنا نەمەسە ءۇشىنشى تۇلعالاردىڭ شوتىنا اۋدارۋدى سۇراپ, جاپپاي سمس-حابارلاما تاراتادى.
«بۇل رەتتە اڭگىمە نەمەسە حات الماسۋ كەزىندە الاياقتار باستان-اياق پسيحولوگيالىق قىسىم كورسەتەدى, قوڭىراۋ جەلىسىن «قازاقستان رەسپۋبليكاسى مەملەكەتتىك ورگاندارىنىڭ قىزمەتكەرلەرىنە» جالعايدى, قىلمىستىق كودەكستىڭ باپتارىنا سىلتەمە جاسايدى جانە قۇپيانى ساقتاۋ كەرەكتىگىن ەسكەرتەدى. سونداي-اق اڭگىمە كەزىندە قاسكويلەر ۇيالى تەلەفونعا كەلىپ تۇسكەن حابارلامالاردى وزدەرىنە جىبەرۋدى, قاۋىپتى سىلتەمەگە ءوتۋدى, قانداي دا ءبىر قوسىمشانى جۇكتەۋدى, مەسسەندجەردە جاڭا فۋنكتسيالاردى ىسكە قوسۋدى, پارول, PIN-كود نەمەسە باسقا دا قۇپيا جانە جەكە دەرەكتەردى ايتۋدى سۇرايدى», دەلىنگەن قوسىمشا ءباسپاسوز حابارلاماسىندا.
سونىمەن قاتار الاياقتار ءموبيلدى بانكينگتىڭ كومەگىمەن ويدان شىعارىلعان تاۋاردى ساتۋ ارقىلى, سالىق (قىزمەت) تولەۋ نەمەسە بانك شوتىنا شەكتەۋ قويۋ ارقىلى اقشانى ونلاين ۇرلايدى. بۇل حابارلامالار «ەلەكتروندى تۇزاق» بولىپ شىعادى جانە ايتىلعان شوتقا وتكەن كەزدە, ءموبيلدى قوسىمشاداعى شوتتان اقشا ۇرلانادى.
وسىعان بايلانىستى ۇلتتىق بانك «قۇقىق قورعاۋ ورگاندارىنىڭ ء(ىىم, ۇقك) قىزمەتكەرلەرىنەن, ۇلتتىق بانك قىزمەتكەرلەرىنەن» قوڭىراۋ كەلىپ تۇسسە, اڭگىمەلەسپەۋ كەرەگىن جانە قانداي دا ءبىر ماسەلەنى رەتتەۋگە, الاياقتارعا قارسى «ارنايى وپەراتسيا» جۇرگىزۋ ءۇشىن قانداي دا ءبىر وزىندىك ارەكەت جاساماۋعا كەڭەس بەرەدى. ال الاياقتاردىڭ تۇزاعىنا تاپ بولعان جاعدايدا, قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋ كەرەك. سونداي-اق قوسىمشا كەڭەس الۋ ءۇشىن 1477 قىسقا ءنومىرى ارقىلى ۇلتتىق بانكتىڭ بايلانىس ورتالىعىنا دا حابارلاسۋعا بولادى.