اباي ءوڭىرىنىڭ وزىقتارى

ەل ەرتەڭى ءۇشىن مەكتەپ ءىسى – وزەكتى ماسەلە. ونىڭ ىشىندە مەكتەپ-ينتەرنات جاعدايى مەن تاربيەسى ماي شاممەن قارالادى. ال شىعارماشىلىعىمەن جۇرتتى ءتانتى ەتىپ جۇرگەن جەتكىنشەكتەر وقيتىن №3 ارنايى مەكتەپ-ينتەرناتى بۇعان باسا نازار اۋدارادى. ءبىلىم ورداسىندا مۇمكىندىگى شەكتەۋلى وقۋشىلار­دىڭ بويىندا ۇلتتىق قۇندىلىقتارعا نەگىز­­دەلگەن ادامگەرشىلىك تاربيە مەن ادامي سەزىمدى قالىپتاستىرۋ جانە دامى­تۋ ماسەلەسى العا قويىلعان. ءار اپتا­نىڭ جۇما كۇنى ۇلتتىق كيىم كيۋ داستۇرگە اينالعان. وقۋشىلاردىڭ قىزىعۋشىلىقتارىنا قاراي ءارتۇرلى ۇيىرمە دە بار. ۇيىرمە ناشار كورەتىن وقۋشىلارعا قازاقتىڭ ۇلتتىق مۋزىكا ونەرىن ناسيحاتتاپ, ەموتسيالىق سەزىمتالدىعىن قالىپتاستىرىپ, ءبىلىمدى, مادەنيەتتى بولىپ وسۋىنە كومەكتەسەدى.

مەكتەپتە وقۋشىلاردى شىعارما­شىلىققا تاربيەلەۋ ءىسى جاقسى جولعا قويىلعان. مۋزىكا كابينەتى ۇلتتىق مۋزىكالىق اسپاپتارمەن قامتىلعان. مۋزىكا ءپانى بويىنشا مەكتەپ جانىنان «سۇلۋ ساز» ەتنو-فولكلورلىق ءانسامبلى, «سىرعالىم» جەتىگەنشىلەر ءانسامبلى, «ارت لايف» بايانيستەر ءانسامبلى, «اسىل مۇرا» دومبىراشىلار انسامبلدەرى جانە قوبىز, سازسىرناي, باسدومبىرا, شانقوبىز, ساكسافون ۇيىرمەلەرى اشىلعان. بۇل تۋرالى «مۋزىكانىڭ اسەرى جاسوسپىرىمگە دۇنيەنى جان-جاقتى تانىپ-بىلۋگە كومەكتەسەدى, بالانىڭ ويىنا ازىق بەرىپ, كەڭىنەن جانە ادەتتەن تىس ويلاۋعا ۇيرەتەدى, حالىقتىڭ رۋحاني مادەنيەتىنە جاقىنداستىرا وتىرىپ, پاتريوتيزم سەزىمىن تاربيەلەپ, ادامگەرشىلىك جانە ازاماتتىق بەلسەندىلىگىن وياتادى», دەيدى ۇيىرمە قاتىسۋشىسى سماعۇلوۆ داۋلەت.

مەكتەپ تۇلەكتەرى جىل سايىن ۇبت-نى ءساتتى تاپسىرادى. الدىڭعى 2022-2023 وقۋ جىلىندا ورتاشا 92,5 بالمەن تاپسىرىپ, مەملەكەتتىك گرانت يەگەرلەرى اتانىپ, جوعارى وقۋ ورىندارىنا ءتۇستى. №3 ارنايى مەكتەپ-ينتەرنات 1979 جىلى قۇرىلدى. قازىر 25 وقۋ كابينەتى بار. سونداي-اق پاندىك كابينەتتەر, پسيحولوگ كابينەتى, كورۋ قابىلەتىن تۇزەتۋ, ەمدىك دەنەشىنىقتىرۋ, ۇلدار مەن قىزدارعا ارنالعان تەحنولوگيا كابينەتتەرى, ويىن, سالتانات زالى بار. مۇندا 43 مۇعالىم جانە 21 تاربيەشى قىزمەت ەتەدى, 139 وقۋشى ءبىلىم الادى. ناشار كورەتىن جانە زاعيپ بالالار مەكتەپ-ينتەرناتتا 6 جاس­تان باستاپ 18 جاسقا دەيىن ءبىلىم الادى.