اقش-تىڭ مايامي قالاسىندا ءوتىپ جاتقان «ماستەرس» تۋرنيرىندە قازاقستاننىڭ تەننيسشىلەرى – يۋليا پۋتينتسەۆا مەن ەلەنا رىباكينا تابىستى ونەر كورسەتىپ, شيرەك فينالعا شىقتى.
جۇلدە قورى 8 995 555 دوللاردى قۇراعان جارىستىڭ العاشقى اينالىمىندا يۋليا پۋتينتسەۆا (الەمدىك رەيتينگتە 68-ورىن) يسپانيالىق كريستينا بۋچۋدان (№74) باسىم ءتۇستى – 6:2, 3:6, 6:4. كوپ كەشىكپەي WTA تىزىمىندە وزىنەن الدەقايدا جوعارى تۇرعان رەسەيلىك ليۋدميلا سامسونوۆاعا (№15) سان سوقتىردى – 6:1, 4:6, 6:3. ودان كەيىن بەلگيالىق گرەت ميننەندى (№79) ۇتتى – 6:2, 2:6, 6:4. ءتورتىنشى كەزەڭدە پۋتينتسەۆا ۋكراينالىق انگەلينا كالينينانى (№36) قاپى قالدىردى – 6:4, 7:6.
العاشقى اينالىمدا بوس بولعان ەلەنا رىباكينا (№4) ەكىنشى كەزەڭدە دانيالىق كلارا تاۋسوننان (№91) 3:6 ەسەبىمەن ۇتىلىپ جاتقانىنا قاراماستان, ەكىنشى جانە ءۇشىنشى سەتتەردى ءوز پايداسىنا شەشتى – 7:5, 6:4. ودان كەيىن ول امەريكالىق تەيلور تاۋنسەندى (№72) تىزە بۇكتىردى – 6:3, 6:7, 6:4. 1/8 فينالدا مەديسون كيزدەن (№18) ايلاسىن اسىردى – 6:3, 7:5.
وكىنىشكە قاراي, ەلىمىزدىڭ ەرلەر قۇراماسىنىڭ مۇشەلەرى ايشىقتى ونەرىمەن كورەرمەندەرىن قۋانتا المادى. اتاپ ايتساق, الەكساندر شەۆچەنكو (№58) كولۋمبيالىق دانيەل-ەليان گالاندى (№84) قاپى قالدىرعانىمەن, ىلە-شالا پولشالىق حۋبەرت حۋركاچقا (№9) جول بەردى. ال الەكساندر بۋبليك (№18) يتاليالىق ماتتەو ءارنالديدىڭ (№38) وسال تۇسىن تابا المادى.