قىزىلجار تۇرعىنى كەنجەبەك تاڭاتوۆقا اعاشتان ءتۇيىن تۇيگەن ونەر ارعى اتا-باباسىنان دارىعان. اعاشقا ويۋ-ورنەك سالا وتىرىپ, ءتۇرلى بۇيىم جاساۋ – ءسۇيىپ اينالىساتىن جۇمىسى.
ارينە, ونى كاسىپكە اينالدىرىپ, تاماق اسىرايمىن دەپ ويلاعان جوق-تى, الايدا بۇيىمدارىنا قىزىعۋشىلىق تانىتىپ, ساتىپ الۋشىلار پايدا بولا باستاعاندا, بۇل ءىستى تابىستى بيزنەسكە اينالدىرۋعا بولاتىنىنا كوزى جەتتى.
قازىر كەنجەبەك ارنايى ستانوك ساتىپ الىپ, تۇتاس ءوندىرىس كەشەنىن قۇرىپ وتىر. ءسويتىپ, 2020 جىلى «Creativ kz» كاسىپورنىن تىركەتەدى. الدىمەن ءوز ۇيىندە تاپسىرىس قابىلداپ, اسەمدەلگەن قايىڭ تاقتايدان ويۋمەن جاسالعان اياق-تاباقتار, ءاسۇيدىڭ جاراقتارى, ەسكەرتكىش تاقتالار جاساپ ءجۇردى. ودان ءارى ۇسىنىسقا بايلانىستى ءتور شەجىرەسىن اسەمدەپ جاساپ بەرەتىن بولدى. وسى بۇيىم جەرلەستەردىڭ قىزىعۋشىلىعىن ءتىپتى ارتتىرا ءتۇستى. تاپسىرىس بەرۋشى كليەنتتەر كەزەككە الدىن الا جازىلاتىن بولدى.
بيزنەسىن دامىتۋدى ويلاعان كەنجەبەك «بيزنەس باستاۋ» باعدارلاماسى بويىنشا ۇسىنىلعان 48 جوبانىڭ ءبىرى بولىپ كونكۋرسقا قاتىسىپ, 500 مىڭ تەڭگەنىڭ قايتارىمسىز گرانتىن جەڭىپ العان. 2021 جىلى تسەح اشىپ, ءىسىن ودان ءارى دوڭگەلەتتى. شيكىزاتتىق ماتەريالداردى كەنجەبەك نەگىزىنەن استانا مەن الماتىدان الاتىن كورىنەدى.
«اعاشتان ىستەلگەن بۇيىمداردىڭ كوپتەگەن ارتىقشىلىعى بار. الدىمەن ولار ەكولوگيالىق تۇرعىدان تازا. قۇرامىندا ەشقانداي زياندى توكسيندەر جوق. ءۇي-ىشىندەگى بالا-شاعا دا, ۇلكەندەر دە ەش قاۋىپتەنبەي ۇستاي بەرەدى. ەكىنشىدەن, شيكىزات كوزى جاقىن بولعاندىقتان جاساعان بۇيىمدارىمنىڭ باعاسى جوعارى ەمەس, ول بارلىق تۇرعىنعا قولجەتىمدى. ۇشىنشىدەن, مەن تاپسىرىس بەرۋشىنىڭ بارلىق قالاۋىن اعاشتان جاساي بەرەمىن. كەيبىرەۋلەر توي ءۇشىن ارنايى تاپسىرىس بەرەدى. جالپى, باعالى اعاشتان جاسالعان زاتتار كەز كەلگەن ينتەرەرگە ءسان بەرەدى», دەيدى كەنجەبەك تاڭاتوۆ.
2022 جىلى كەنجەبەك «كاسىپكەرلىكتى دامىتۋدىڭ 2021-2025 جىلداردا ارنالعان ۇلتتىق جوباسى» مەملەكەتتىك باعدارلاماسى بويىنشا «بانك تسەنتركرەديت» اق ارقىلى 5 ملن تەڭگە نەسيە الدى. ونىڭ جىلدىق ءوسىمى 23 پايىز بولعانىمەن «دامۋ» قورىنىڭ سۋبسيديالاۋىمەن ءوسىمنىڭ 6 پايىزىن عانا تولەيدى. سونىمەن قاتار نەسيە بويىنشا ەشقانداي كەپىلدىك زات تالاپ ەتىلمەيدى. وسى نەسيەنىڭ ارقاسىندا قازىر كەنجەبەك اعاش سۇرگىلەيتىن, ويۋلايتىن لازەرلىك باعدارلامالىق ستانوك, 3D پرينتەر ساتىپ الىپ, IT تەحنولوگيالارى ارقىلى تاقتايعا سۋرەت سالۋدى جاسايتىن بولعان. قازىر ءبىزدىڭ وبلىس قانا ەمەس, وعان تاپسىرىس بەرۋشىلەر كورشىلەس وڭىرلەردەن دە كەلەتىن بولدى.
توي ءسانىن كەلتىرىپ, تاقتايعا ويۋلاپ جازىلعان ادەمى تىلەكتەر, فوتولارعا ارنالعان ورنەكتى جاقتاۋلار, تويباستار تاباقتارى, استاۋلار, دەكوراتيۆتىك قوراپتار كوزدىڭ جاۋىن الادى.
اعاشتان ءتۇيىن تۇيگەن شەبەردىڭ تسەحىندا قازىر 5 ادام ناپاقاسىن ايىرىپ وتىر.
سولتۇستىك قازاقستان وبلىسى