بيىلعى ناۋرىز مەرەكەسى ورال قالاسىنداعى 80 وتباسىنىڭ ەسىندە قالاتىن بولدى. زاشاعان كەنتىندە 9 قاباتتى جاڭا تۇرعىن ءۇي پايدالانۋعا بەرىلدى. پاتەر كىلتىن تاپسىرۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ قاتىستى.
ايتۋلى ءىس-شارا ناۋرىزنامانىڭ ىنتىماق كۇنىمەن قاتار كەلدى. ءوڭىر باسشىسى جينالعانداردىڭ بارلىعىن ناۋرىز مەيرامىمەن قۇتتىقتاپ, جاڭا قونىس يەلەرىنە باقىت تىلەدى.
– مەملەكەت باسشىسى قاسىم-جومارت توقاەۆ حالىقتىڭ ءال-اۋقاتى مەن ءومىر ءسۇرۋ ساپاسىن ارتتىرۋ باستى مىندەت ەكەنىن ءاردايىم ايتىپ كەلەدى. سونىڭ ىشىندە ءار وتباسىن تۇرعىن ۇيمەن قامتاماسىز ەتۋگە باعىتتالعان باستامالار ەرەكشە ماڭىزعا يە. بۇگىندە ورال قالاسىندا مەملەكەتتىك باعدارلامالار ارقىلى 14 كوپپاتەرلى ءۇي سالىنىپ جاتىر. مەملەكەتتىك باعدارلاما اياسىندا سالىنعان كوپقاباتتى تۇرعىن ۇيلەر «وتباسى بانك» ارقىلى كەزەكتە تۇرعاندارعا جەڭىلدەتىلگەن پايىزدىق نەسيەمەن بەرىلەدى. بۇگىن دە وسى باعدارلاما ارقىلى كەزەكتە تۇرعان 80 وتباسى باسپانالى بولدى. جاڭا پاتەر يەلەرىن قۇتتىقتايمىن, – دەدى ءوڭىر باسشىسى.
پرەزيدەنت تاپسىرماسى بويىنشا ەلىمىزدە «قۋاتتى وڭىرلەر – ەل دامۋىنىڭ درايۆەرى» جوباسى قولعا الىنعان ەدى. جاڭا تۇرعىن ءۇي قۇرىلىسى وسى جوبا اياسىندا جۇزەگە اسقان. باتىس قازاقستان وبلىسى اكىمىنىڭ ءباسپاسوز قىزمەتى حابارلاعانداي, باسپانالى بولعانداردىڭ كوپشىلىگى – مۇمكىندىگى شەكتەۋلى, سونداي-اق پاتەر كەزەگىندە تۇرعان جاندار.
– كوپ جىل كەزەكتە تۇردىق. ەندى, مىنە, ارمانىمىز ورىندالدى. مەملەكەتكە ريزامىز. بيىلعى ناۋرىز مەيرامىن جاڭا پاتەردە قارسى الاتىنىمىزدى ويلاساق, قۋانىشىمىزدا شەك جوق, – دەدى جاڭا پاتەر يەسى نۇرگۇل ەسەناليەۆا.
ايتا كەتەيىك, ورال قالاسىندا بيىل 1400-دەن اسا جاڭا پاتەر پايدالانۋعا بەرىلمەك.
باتىس قازاقستان وبلىسى