مانەرلەپ سىرعاناۋدان كانادانىڭ مونرەال قالاسىندا ەرلەر مەن ايەلدەر اراسىنداعى الەم چەمپيوناتى ءوز مارەسىنە جەتتى. بۇل جارىستا قازاقستاننىڭ ءبىر عانا سپورتشىسى ونەر كورسەتتى. ول – ميحايل شايدوروۆ.
جاستار اراسىنداعى الەم بىرىنشىلىگىنىڭ كۇمىس جۇلدەگەرى دەگەن اتاعى بار 19 جاستاعى الماتىنىڭ تۋماسى ەرەسەكتەر دۋىنا قوسىلعاننان كەيىن ءوزىن جاقسى قىرىنان كورسەتىپ ءجۇر. بيىلدىڭ وزىندە ميحايل «Challenge Cup» دوداسىندا توپ جارىپ, قىتاي مەن حورۆاتياداعى تۋرنيرلەردە جۇلدەگەرلەر قاتارىنان كورىندى. دەسەك تە, جەرلەسىمىز ءىرى دۇرمەكتەردە دارالانۋعا ءالى دە دايار ەمەس ەكەن. ونى ءبىز ۇيەڭكى جاپىراقتار ەلىندەگى جارىستا انىق بايقادىق. قوس باعدارلامانىڭ قورىتىندىسى بويىنشا نەبارى 234,19 ۇپاي جيعان ميحايل شايدوروۆ 14-ورىندا قالىپ قويدى.
ەرلەردىڭ باسەكەسىندە يليا ءمالينيننىڭ (333,76 ۇپاي) مەرەيى ۇستەم بولدى. بىلتىر سايتاماداعا دۇنيەجۇزىلىك دودادا قولا مەدالدى موينىنا ىلگەن 19 جاستاعى اقش-تىڭ مانەرلەپ سىرعاناۋشىسى بۇل جولى التىن تۇعىردان قول بۇلعادى. بەيجىڭ وليمپياداسىندا كۇمىس الىپ, ءۇش بىردەي الەم چەمپيوناتىندا جۇلدەگەرلەر قاتارىنا قوسىلعان جاپونيانىڭ جۇلدىزى يۋما كاگياما (309,65) ەكىنشى ورىندى يەلەنسە, ەۋروپانىڭ ەكى دۇركىن چەمپيونى, فرانتسيالىق ادام سياو حيم فا (284,39) ءۇشىنشى ساتىعا تۇراقتادى. ال كەيىنگى جىلدارداعى بايراقتى باسەكەلەردىڭ بارلىعىندا قارسىلاس شىداتپاي جۇرگەن جاپونيالىق سيوما ۋنو (280,85) كاناداداعى جارىستىڭ ەركىن باعدارلاماسىندا ورەسكەل قاتەلىك جىبەرىپ, قورىتىندى ەسەپتە ءتورتىنشى ورىندى قاناعات تۇتتى.
ايەلدەر سايىسى بەيجىڭ وليمپيداسىنىڭ كۇمىس جۇلدەگەرى كاوري ساكاموتونىڭ (222,96) ايقىن جەڭىسىمەن اياقتالدى. وسىعان دەيىن قاتارىنان ەكى الەم چەمپيوناتىندا قارسىلاس شاق كەلتىرمەگەن كۇنشىعىس ەلىنىڭ ارۋى بۇل جولى دا الدىنا جان سالمادى. امەريكالىق يزابو لەۆيتو (212,16) كۇمىس السا, وڭۇستىككورەيالىق كيم چحەەن (203,59) قولاعا قول سوزدى. جۇپتىق جارىستا كانادا سپورتشىلارى – دياننا ستەللاتو-دۋبەك پەن ماكسيم دەشام جەڭىمپاز اتانسا, بيشىلەر باسەكەسىندە امەريكالىق مەديسون چوك پەن ەۆان بەيتستىڭ باعى جاندى.