ەرتەدە قىستان ءدىن-امان شىققان ەل-جۇرت, كورشى-قولاڭ ناۋرىزدا باس قوسىپ, اماندىق, ساۋلىق سۇراساتىن. كوكتەمنىڭ شاپاعاتىن سەزىنىپ, قۋانىسىپ قاۋىشاتىن كوپشىل قاۋىمنىڭ اراسىندا ارازداسقاندار ۇشىراسا قالسا تابىساتىن.
ناۋرىزدىڭ ءمان-مازمۇنى – استا-توك داستارقان جايىپ, اسىر سالۋ ەمەس. سۇرىنگەنگە دەمەۋ بولىپ, تارىققان جاندارعا كومەك قولىن سوزۋ – اتادان دارىعان قاسيەت. قازىر دە قىس قۇرساۋىنان شىققان مەزگىل, جىل باسى قايىرىمدىلىق ءىس-شارالارىمەن جالعاساتىن جاقسى ءداستۇر قالىپتاستى.
مەرەكەگە وراي ەلوردادا 200-گە جۋىق ءىس-شارا وتەدى دەپ الدىن الا جوسپارلاندى. 15 ناۋرىزدا قالادا قايىرىمدىلىق كۇنى ءوز دەڭگەيىندە تويلانىپ, الماتى اۋدانىنىڭ كوممۋنالدىق قىزمەتكەرلەرى ىستىق شاي-باۋىرساق, ناۋرىزكوجەدەن ءدام تاتىپ, شات-شادىمان بولىسقان. سول سەكىلدى «جاناشىر» قارتتار ۇيىندە, №2 كوپشىلىك كىتاپحانادا, قۋىرشاق تەاترىندا, «جاستار» تەاترىندا مازمۇندى جيىن ءوتىپ, قايرىمدىلىق كۇنى ە.راحماديەۆ اتىنداعى مەملەكەتتىك اكادەميالىق فيلارمونيادا «ناۋرىز ايى تۋعاندا» كونتسەرتىمەن تۇيىندەلگەن. وسى كۇنى شاھاردا مىڭعا جۋىق مۇقتاج وتباسىعا ازىق-ت ۇلىك سەبەتى تاپسىرىلعان. قايىرىمدىلىقتان «استانا جاستارى» جاستار رەسۋرستىق ورتالىعىنىڭ ۆولونتەرلەرى دە قالىس قالماي, بەلسەندى جاستار تۇرعىندارعا باۋىرساق پەن ءتۇرلى تاتتىلەر تاراتقان. مەرەكەدە نۇرا اۋدانىنىڭ باستاماسىمەن ەلوردادا «ارماندار شاڭىراعى» الەۋمەتتىك اكتسياسى ءوتتى. اكتسيادا ەلوردالىق مەتسەناتتار, كاسىپكەرلەر نۇرا اۋدانىنداعى 70 بالانىڭ ارمانىن ورىنداپ, ولارعا سىيلىق ۇلەستىردى.
ناۋرىزناما ونكۇندىگىندە «قازاقستان حالقىنا» قوعامدىق قورى 20 مىڭ وقۋشىعا دەمالىس ورىندارىنا جولداما بەرىپ, بالالاردى قۋانتىپ تاستادى. مۇنداي مۇمكىندىككە ەلدەگى بارلىق اۋىل مەكتەبىنىڭ (6 مىڭعا جۋىق اۋىل مەكتەبى) وقۋشىلارى ىلىگىپتى. قور وسى ىزگى باستامانى ابىرويلى ورىنداۋ ءۇشىن 2 ملرد تەڭگەگە شامالاس قارجى جۇمساعان. سونىمەن قاتار بالالار ەلدەگى ەڭ جاقسى دەگەن دەمالىس ورىندارىنا ەكى اپتاعا ساياحاتتايدى.
بالالار ۇيىندەگى بالعىنداردى قۋانتۋعا بارىپ, قايىرىمدىلىق جاساعاندار كوپ. ال جاستار جاعى قارتتار ۇيىندەگى نەمەسە جالعىز ءوزى تۇراتىن قاريالارعا جاردەمدەسىپ, باتاسىن الدى. كوپتى كورگەن, كوپتى تۇيگەن قاريالارعا بارىپ, تاعىلىمعا تولى وقيعالارىن تىڭداۋعا جاستار دا قۇلشىنادى. مۇنىڭ بارلىعى – جۋاننىڭ جىڭىشكەرىپ, جىڭىشكەنىڭ ۇزىلەر شاعىندا جاسالعان يگى ىستەردىڭ ءبىر بولىگى عانا. قالتالى ازاماتتار مەن قاراپايىم تۇرعىنداردىڭ بىلايعى كۇندەرى جاساپ جاتقان قايىرىمدىلىق كومەكتەرىن تىزبەكتەپ شىعۋ مۇمكىن ەمەس. قالاي دەگەندە دە ناۋرىز تويىنان باستالعان ءىس-شارالاردىڭ لەگى جىل سوڭىنا دەيىن جالعاساتىنىنا ەش كۇمان جوق.