ەلوردانىڭ ورتالىق ساياباعىندا وزبەكستان, ازەربايجان, تاجىكستان جانە قىرعىزستان ەلدەرىنىڭ اسپازدارى ءبىر توننادان استام پالاۋ ازىرلەدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ناۋرىز مەيرامى ورتالىق ساياباقتا العاش رەت تويلانىپ جاتىر. مەرەكە حالىقارالىق دەڭگەيدە ءوتىپ جاتىر. ءىس-شاراعا كورشى ەلدەردىڭ اسپازدارىمەن قاتار تاجىكستان مەن يران ەلشىلىكتەرى دە قاتىستى. ولار كيىز ۇيلەرىن تىگىپ, وندا ءوز مادەنيەتتەرىندە ناۋرىز مەرەكەسىنىڭ تويلانۋىنىڭ ايىرماشىلىقتارى تۋرالى اڭگىمەلەپ, ءداستۇرلى تاعامدارمەن ءدام تاتتىردى.
ساياباقتىڭ اللەياسىندا تازى مەن باتىرلار شەرۋى ءوتىپ, دومبىراشىلار ايگىلى حالىق اندەرىن ورىنداپ, ەرەكشە مەرەكەلىك كوڭىل-كۇي سىيلادى.
مەرەكەلىك شاراعا ەلوردالىق «بارىس» كلۋبىنىڭ حوككەيشىلەرى مەن كلۋبتىڭ بويتۇمارى «بارسيك» كەلدى. مۇندا ولار جانكۇيەرلەرىمەن كەزدەسىپ, قولتاڭبا بەرىپ, ەستەلىك سۋرەتكە تۇسەدى.
ورتالىق ساياباقتا كوكتەمنىڭ باستى مەرەكەسى ەكى كۇن بويى تويلانادى. 22 ناۋرىز كۇنى دە ساعات 13:00-دە كونتسەرتتىك باعدارلاما ءوتىپ, ۇلتتىق تاعامدار ازىرلەنەدى.