ەجەلدەن قۇرىلتاي ەلدىكتىڭ ۇلكەن ماسەلەسىن شەشەتىن جيىن رەتىندە بەلگىلى. ويتكەنى وسىنداي وتىرىس بابالار ءداستۇرىن جاڭعىرتۋعا جول اشىپ, جاڭا يدەيالاردىڭ قالىپتاسۋىنا, قوعامداعى كەلەلى ىستەردىڭ جۇزەگە اسۋىنا سەپتىگىن تيگىزىپ وتىرعان. كەيىنگى جىلدارى بابالار ۇستانعان وسى جولدى قايتا جاڭعىرتتىق.
اتىراۋدا وتكەن باسقوسۋدا ەلىمىزدى دامىتۋعا قاتىستى ماڭىزدى باستامالار كوتەرىلىپ, جاڭا يدەيالار قالىپتاسىپ, جاڭا باعىتتار ايقىندالادى. قۇرىلتايدىڭ ەرەكشەلىگى دە سول, ايتىلعان ءسوز ايتىلعان جەردە قالمايتىنىن كورسەتىپ كەلەدى.
ۇلىتاۋداعى قۇرىلتايدا 42 باستاما, تۇركىستانداعى وتىرىستا 100 ۇسىنىس نازارعا الىندى. قۇرىلتايدىڭ ءۇشىنشى باسقوسۋىندا پرەزيدەنتىمىز ولاردىڭ 80 پايىزدان استامى جۇزەگە اسىرىلعانىن مالىمدەدى. سونىڭ ىشىندە ەرەكشە اتاپ وتەرلىگى, «اۋىل – ەل بەسىگى» مەن بالالار كىتاپحاناسىن قۇرۋ, ياساۋي مۇراجايىنا ۇلتتىق مارتەبە بەرۋ, «قازاقستاننىڭ حالىق جازۋشىسى» اتاعىنىڭ قايتا ورالعانى دەر ەدىم.
كەشە عانا التىن وردانىڭ باعزى استاناسىنىڭ ءبىرى – سارايشىقتا, قازىرگى اتىراۋدا ءۇشىنشى قۇرىلتاي ءوتتى. مۇندا دا قۇرىلتاي مۇشەلەرى وي-پىكىرلەرىن ورتاعا سالىپ, مەملەكەتىمىزگە پايدالى دەگەن ماڭىزدى ماسەلەلەردى تالقىلادى. بۇل جولعى قۇرىلتايدا پرەزيدەنت بايانداماسىندا نازارعا ۇستايتىن وزەكتى ماسەلە – ەلدى ۇيىتاتىن ۇلكەن رۋحاني-مادەني جوبالاردى قولعا الۋمەن قاتار, حالىقتىڭ بەرەكە-بىرلىگىنە باسا نازار اۋدارىلدى. ەلگە ءجون كورسەتىپ, سوزگە توقتاتاتىن اعا بۋىن, زيالى قاۋىم مەن قالامگەرلەر, ونەر ادامدارىنىڭ ەل ىشىندە ىرىتكى تۋدىراتىن ەمەس, اۋىزبىرلىككە ۇندەيتىن ءسوز ايتىپ, جول كورسەتۋى كەرەكتىگىن اتاپ ءوتتى. «وسپەيتىن ەلدىڭ بالاسى بولىپ, ونبەيتىن داۋدى قۋمايىق, ەل بىرلىگىن نىعايتاتىن اڭگىمە ايتقان ءجون», دەدى.
مەملەكەت باسشىسى وسى سوزدەردى قازاقستان جازۋشىلار وداعىنىڭ مۇشەلەرىنە قاراتىپ ايتقانداي اسەر ەتتى. بىلتىردان بەرى قالامگەرلەردىڭ قوعامدا قايتادان مەرەيى ءوسىپ, جازعان ەڭبەكتەرى وقىرمانىنا جەتىپ, ورتالارىنا ۇلكەن وي سالىپ, حالىقتىڭ نازارىن اۋدارىپ ءجۇر.
پرەزيدەنت ەل نازارىندا جۇرگەن قازاق ءتىلىنىڭ بيزنەس پەن تەحنيكانىڭ تىلىنە اينالىپ كەلە جاتقانىن, ءتىلىمىزدىڭ اياسىن كەڭەيتۋ جولىن سوزبەن ەمەس, ىسپەن اتقارۋ كەرەگىن ەسكەرتىپ, بىلتىر قۇرىلعان «Qazaq tili Endowment» قورىنا كومەك قولىن سوزعان كاسىپكەرلەرىنە ريزاشىلىق ءبىلدىردى.
ۇلتتىق قۇرىلتايدا پرەزيدەنت ءاردايىم كىتاپ ءىسى, كىتاپ وقۋ, كىتاپحانا تۋرالى وزەكتى ويلارىن ايتىپ وتىرادى. تۇركىستاندا بالالار كىتاپحاناسىن جاساۋدى قولعا الۋدى تاپسىرسا, بيىل الماتى مەن استانادا كوپ ۇزاماي تاۋلىك بويى جۇمىس ىستەيتىن كىتاپحانالار سالىناتىنىن ايتىپ قۋانتتى. تۇركيا ەلىندە ستۋدەنتتەرگە ارنالعان پرەزيدەنت كىتاپحاناسىنداعى كورپۋستارىنىڭ الدىنان تەگىن اۆتوبۋستار قاتىنايدى ەكەن. تۇسكى, كەشكى استى تەگىن ءىشىپ, تۇنگە دەيىن قالىپ ىزدەنىپ وقىپ جۇرگەن جاستار ءوز ءبىلىمىن جەتىلدىرىپ, ىزدەنىپ, بولاشاققا ۇمتىلادى. قايتاردا دا كىتاپحانا الدىندا تۇرعان تەگىن اۆتوبۋسقا ءمىنىپ جاتاقحاناسىنا بارادى. وسىنداي ۇلگىنى پرەزيدەنت بىزگە دە قولعا الۋ كەرەكتىگىن ايتتى.
«كىتاپ كۇنى» اتتى مەرەكە بەلگىلەنەتىنى دە ۇلكەن مىنبەردەن ايتىلدى. قوعامدا كىتاپ وقۋ مادەنيەتىن قالىپتاستىرۋدى تاپسىردى. قازىر كىتاپ وقىمايدى دەيتىندەر كوپ. الايدا اتا-انالاردىڭ بالالارىمەن بىرگە كىتاپ دۇكەندەرىندە جۇرگەنىن ءجيى كورەمىن. «اۋىلدان شىققان ميلليونەر», ء«بىرتۋار» كىتاپتارىم وقىرماننان وڭ باعاسىن الدى. سوندىقتان بالاعا تازا, اق كوڭىلمەن شىعارما جازساق, وقيدى. مەملەكەت باسشىسى قازاقستاننىڭ زايىرلى مەملەكەت ەكەنىن باسا ايتىپ, ەلدىڭ جاڭارۋ قاعيداتتارىن ۇسىندى.
ساۋلە دوسجان,
ۇلتتىق قۇرىلتاي مۇشەسى