اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى «ادال ادام – ادال ەڭبەك – ادال تابىس» ۇعىمدارىنا قاتىستى ساليقالى وي ايتىپ, تىڭ تاپسىرمالار جۇكتەدى. پرەزيدەنتتىڭ باستاماسىمەن جاڭاشىل يدەيالار تۋىنداپ وتىر. ونىڭ كەيبىرى يدەولوگيالىق تۇرعىدا جۇزەگە اسا باستادى. الايدا بيلىك پەن قوعام اراسىنداعى قارىم-قاتىناستى جەتىلدىرە ءتۇسۋ كەرەك.
وسى ورايدا كۇشتىك قۇرىلىمدار مەن قۇقىق قورعاۋ ورگاندارىنىڭ قىزمەتكەرلەرى قوعام وكىلدەرىنىڭ پىكىرلەرىمەن ساناسىپ, بىرلەسە جۇمىس ىستەۋى كەرەك دەپ ەسەپتەيمىن. ويتكەنى «بيلىك. قوعام. ديالوگ» دەگەن ءۇش ماڭىزدى ۇستىندى ىسكە اسىرۋدى قولعا الساق, ەلدى وركەندەتۋ ءۇشىن ءتيىمدى تۇستارى بار. بۇل ۇشەۋى ءسوز جۇزىندە عانا قالماۋى كەرەك.
ارينە, بارىمىزگە ورتاق, ورىندالۋى قاجەت زاڭدار بار. قوعامنىڭ باسىم بولىگى پرەزيدەنتتىڭ جۇرگىزىپ وتىرعان ادىلەتتى قازاقستان قۇرۋ ساياساتىن ەندى-ەندى ءتۇسىنىپ, دەموكراتيالىق قاعيداتتاردى قولداپ جاتقانى بايقالادى. دەگەنمەن قوعام بولعان سوڭ سىني پىكىرلەر ايتىلادى. بۇل – قالىپتى جاعداي. بىراق بەتكە باسار قياناتى بولماسا دا پىكىرىن ەركىن ءبىلدىرىپ, قوعامعا وي تاستاعان, ادىلدىكتىڭ ۇستەمدىك قۇرۋىن قالايتىن كەيبىر ازاماتتاردى زاڭ الدىندا جاۋاپتى ەتىپ, سەندەلتىپ قويۋ فاكتىلەرى بار. بىراق ولار دا قولعا الىنعان باعدارلامالاردىڭ جۇيەلى تۇردە ورىندالىپ, ەلدىڭ يگىلىگى ءۇشىن جۇزەگە اسقانىن قالايدى.
سوندىقتان بيلىك وكىلدەرى حالىقپەن ءجيى ارالاسىپ تۇرۋى قاجەت. بۇل جۇمىستاردىڭ ءبىر ىزگە تۇسۋىنە بارلىعىمىز ءبىر كىسىدەي اتسالىسۋىمىز كەرەك. مۇنى پرەزيدەنت تە تالاپ ەتىپ وتىر.
ەرمۇرات باپي,
پارلامەنت ءماجىلىسىنىڭ دەپۋتاتى