بۇگىندە ەلىمىزدىڭ ىشكى تىنىشتىعىنىڭ كەپىلى – ۇلتتىق ۇلاننىڭ قاتارىندا جاۋىنگەرلىك قىزمەت اتقارىپ جۇرگەن وزگە ەتنوس وكىلدەرى كوپ. ولاردىڭ ءتۇرى مەن ءتىلى بولەك بولعانىمەن, جانى مەن رۋحى ءبىر, ەلىمىزدىڭ كەڭ-بايتاق جەرىندە تاتۋلىق پەن بىرلىكتىڭ تۋىن كوتەرىپ, تۋعان وتاندى قورعاۋدا ءبىر ءۇيدىڭ بالاسىنداي قىزمەت ەتىپ كەلەدى.
سولاردىڭ ءبىرى – 6698 اسكەري ءبولىمى 2-اتقىشتار روتاسىنىڭ قاتارداعى جاۋىنگەرى راشات اردافيلوۆ. ول 2023 جىلدىڭ جەلتوقسان ايىندا ۇلتتىق ۇلان قاتارىنا مەرزىمدىك اسكەري قىزمەتكە شاقىرىلدى. ۇلتى ازەربايجان. قازىرگى تاڭدا 6698 اسكەري ءبولىمنىڭ 2-اتقىشتار روتاسىندا جاۋىنگەرلىك قىزمەت اتقارىپ ءجۇر.
«مەكتەپتى ورىس سىنىبىندا اياقتادىم. الايدا بالا كەزدەن وسكەن ورتام, دوستارىم ءارتۇرلى ەتنوس وكىلى بولدى. بىراق ءبارىمىز قازاق تىلىندە سويلەيتىنبىز. مەن ءوز انا تىلىمدە دە, قازاق تىلىندە دە ەركىن سويلەيمىن. ءبىر اۋداندا, ءبىر كوشەدە قانشاما ەتنوس وكىلدەرى تۇرامىز: وزبەك, تۇرىك, ۇيعىر, ورىس. مەرەكەلەردى بىرگە تويلايمىز. اسىرەسە ناۋرىز ءبارىمىز ءۇشىن ورتاق, ۇلكەن مەرەكە ەدى, وتە قىزىقتى بولاتىن. ءار ۇلت ءوزىنىڭ داستۇرىمەن ەرەكشە اتاپ وتەتىن», دەيدى راشات. – ءبىز دەمالىستاردا وتانىمىز ازەربايجان ەلىنە بارىپ تۇرامىز, الايدا تۋعان جەرىمىز قازاقستاننان كوشىپ كەتپەيتىنىمىزدى اتام سانامىزعا قۇيىپ قويعان. اتام وتستاۆكاداعى پولكوۆنيك, ول مەنىڭ دە اسكەري جولدى تاڭداۋىمدى قالادى, بولاشاقتاعى ارمانىم – بىلىكتى وفيتسەر بولۋ.
1-اتقىشتار روتاسىنىڭ قاتارداعى جاۋىنگەرى راۆيل اۆاكريەۆ 2005 جىلى الماتى وبلىسىنىڭ ۇيعىر اۋدانىنا قاراستى شونجى اۋلىندا دۇنيەگە كەلگەن. ۇلتى ۇيعىر. اتا-اناسى – قاراپايىم شارۋا ادامدارى. 9-سىنىپتى اياقتاعان سوڭ ورتا ارنايى ءبىلىم الۋ ماقساتىندا كوللەدجگە وقۋعا تۇسەدى. مەكتەپتە ۇيعىر تىلىندە ءبىلىم الدى, ال كوللەدجدە قازاق توبىندا وقىدى.
– ءبىز ءۇشىن تۇرىك, وزبەك, قازاق, ازەربايجان سياقتى تۇركىتىلدەس ەلدەردىڭ تىلىندە سويلەۋ تاڭسىق ەمەس. ءسوز يىرىمدەرى ۇقساس بولعاندىقتان, وڭاي ءارى تەز ۇيرەندىك. 2023 جىلدىڭ جاز ايىندا اسكەر قاتارىنا كەلدىم. كوزدى اشىپ جۇمعانشا 8 ايدان اسا ۋاقىت ءوتتى, – دەيدى راۆيل. – بۇگىنگى تاڭدا ەلىڭ ءۇشىن قىزمەت ەتسەڭ, بارلىق جاعداي جاسالعان. سونىڭ ءبىرى – اسكەردەن كەيىن تەگىن ءبىلىم گرانتتارىنىڭ سەرتيفيكاتتارىن الۋ. وسى سەرتيفيكاتتىڭ بىرىنە يە بولۋ ءۇشىن بارىمدى سالىپ قىزمەت اتقارىپ ءجۇرمىن. تۋعان جەرىمنىڭ تىنىشتىعىن كۇزەتۋ مەن ءۇشىن – ابىرويلى ءىس. قاسيەتتى قىزمەتتىڭ ارقاسىندا جوعارى ءبىلىمنىڭ كىلتىن قولىمىزعا ۇستاتاتىن ۇلتتىق ۇلانعا ۇلكەن ريزاشىلىعىمدى بىلدىرەمىن.
2-اتقىشتار روتاسىنىڭ قاتارداعى جاۋىنگەرى يمران كاريموۆ 2000 جىلى تۋعان. ۇلتى تۇرىك. ماماندىعى – ءتىس دارىگەرى. اسكەر قاتارىنا جاقىندا عانا كەلدى. ازاماتتىق بورىشىن ويداعىداي اياقتاپ شىققان سوڭ, كەلىسىمشارت بويىنشا اسكەري قىزمەتتى جالعاستىرۋ ويىندا بار.
– اتامنىڭ اڭگىمەسىنەن ەستىپ-بىلگەنىم – ولار 1945 جىلدارى, سوعىستان كەيىنگى الماعايىپ كەزەڭدە كاۆكاز حالىقتارىمەن بىرگە قازاقستانعا قونىس اۋدارىپ, الماتى وبلىسىنداعى ەسىك قالاسىنا جايعاسقان ەكەن. ۇلكەندەردىڭ ەستەن كەتپەس ەستەلىكتەرىنىڭ ءبىرى – سول ءبىر قيىن ۋاقىتتا قازاق حالقىنىڭ «وزگە ەلدەن كەلگەن» دەپ وزەكتەن تەپپەي, باۋىرىنا باسىپ, بارىمەن بولىسكەندىگى. دالاداي دارقان قازاق ەلىنىڭ شەكسىز مەيىرىمى مەن قايىرىمدىلىعى ارقاسىندا ءبىر قاۋىم ەل بولىپ وركەن جايدىق دەپ, سول كەزدەگى بالا, بۇگىن سەكسەننىڭ سەڭگىرىندەگى قاريالار قازاق حالقىنا ءالى كۇنگە العىستارىن جاۋدىرىپ وتىرادى, – دەدى يمران. – سول تۇرعىدا تاۋەلسىز قازاق ەلىنىڭ اسكەرى قاتارىندا قىزمەت ەتۋ مەن ءۇشىن – ۇلكەن جاۋاپكەرشىلىك, زور مىندەت. بىزگە بەيبىت زامان, جارقىن بولاشاق سىيلاعان باتىر بابالارىما شەكسىز العىس ايتامىن. بىرلىك, بەرەكە, ىنتىماق مەرەكەسى – ناۋرىز قۇتتى بولسىن.
1-اتقىشتار روتاسىنىڭ قاتارداعى جاۋىنگەرى الماس سىرىمبەتوۆ 2005 جىلى كيەلى تارازدىڭ شۋ وڭىرىندە دۇنيەگە كەلگەن. ۇلتى تاتار. ماماندىعى – اسپازشى. اناسى دا كونديتەرلىك ىسپەن اينالىسادى. اناسىنىڭ قاسىندا اسپازدىقتىڭ قىر-سىرىن ۇيرەنە ءجۇرىپ, وسى ماماندىقتىڭ يەسى بولامىن دەپ شەشىپتى. اسكەر قاتارىنا وتكەن جىلدىڭ جەلتوقسان ايىندا كەلدى.
– مەنىڭ اسكەرگە دەيىن دە قازاق دوستارىم كوپ بولدى. اكەم ەرتە قايتىس بولعاندىقتان, انامنىڭ قاسىندا ەر ازامات رەتىندە ءۇيدىڭ بار اۋىر تىرلىگىن قولىما الۋعا تىرىستىم. اكەمنىڭ جوقتىعىن بىلدىرتپەي ءۇيدىڭ بولسىن, ءتۇزدىڭ بولسىن اۋىر جۇمىسىن اتقارۋعا ۇنەمى قولۇشىن سوزاتىن دوستارىم ەدى. اسكەرگە كەتىپ بارا جاتىپ, انامنىڭ جالعىز قالعانىن ۋايىمداعانىم راس. الايدا دوستارىمنىڭ ورنىمدى بىلدىرمەي, ءۇيىمنىڭ تىرشىلىگىنە, اناما قارايلاساتىنى – كوڭىلگە مەدەۋ. اسكەرگە كەلىپ تە جارقىن مىنەز, جاناشىر دوستار تاپتىم, – دەدى الماس. – ءوزارا جاۋاپكەرشىلىك پەن قامقورلىقتىڭ, رۋحاني جاقىندىقتىڭ بەلگىسى – دوستىق دەگەن ۇلى سەزىمدى قادىرلەي بىلگەن, جانىما جاقىن جاندارعا, ادال دوستارىما ايتار العىسىم كوپ.
ۇلىس كۇنى قورعانىس كۇشتەرى قۇرىلىمدارىندا دا بىرلىك, تاتۋلىق, تۋىستىق, وتباسىنى قاستەرلەۋ سياقتى ادامزاتتىق قۇندىلىقتارعا نەگىزدەلىپ اتاپ وتىلەدى. ەلىمىزدەگى بارشا حالىقتارعا ورتاق مەيرام قوعامدا ساياسي تۇراقتىلىقتى, بەيبىتشىلىك پەن تىنىشتىقتى, دوستىق پەن كەلىسىمدى نىعايتۋدىڭ تەتىگىنە اينالا تۇسەدى.