19-21 ناۋرىز ارالىعىندا ليۆاننىڭ باس شاھارى بەيرۋتتە ۇستەل تەننيسىنەن «WTت Feeder Beirut 2024» دەپ اتالاتىن حالىقارالىق ءتۋرنيرىنىڭ جالاۋى جەلبىرەيدى.
20 مەملەكەتتەن كەلگەن 120-عا تارتا سپورتشىنىڭ قاتىسۋىمەن وتەتىن ءدۇبىرلى دودادا قازاقستاننىڭ 10 ورەنى ونەر كورسەتەدى. ولار – ايدوس كەنجەعۇلوۆ, سارۆينوز مىرقادىروۆا, ۆلاديسلاۆ زاحاروۆ, زاۋرەش اقاشەۆا, سانجار جۇبانوۆ, انەل باقىت, ەسكەندىر حاركي, انگەلينا رومانوۆسكايا, ىرىسبەك ارتىقمەتوۆ, اراي اشكەەۆا. ەسىمدەرى اتالعان جەرلەستەرىمىزدىڭ دەنى بىرقاتار حالىقارالىق دوداعا قاتىسىپ, ۇلكەن تاجىريبە مەكتەبىنەن ءوتتى. سوندىقتان دا جانكۇيەرلەر تاياۋ شىعىستاعى تۋرنيردەن وتانداستارىمىز ولجالى ورالادى دەپ ۇمىتتەنىپ وتىر.
دەسەك تە ءبىزدىڭ ۇستەل تەننيسشىلەرىمىزدىڭ قارسىلاستارى دا ازۋلى. وزگەلەردى ايتپاعاندا, بەيرۋتتەگى باسەكەدە وليمپيا ويىندارىنىڭ كوماندالىق ەسەپتەگى قولا جانە التى دۇركىن الەم چەمپيوناتىنىڭ جۇلدەگەرى دۋ حويكەم (گونكونگ), الەم چەمپيوناتىنىڭ ءۇش دۇركىن قولا جۇلدەگەرى, ازيا چەمپيونى ان دجە حيون (وڭتۇستىك كورەيا), ازيا چەمپيوناتىنىڭ ون دۇركىن جۇلدەگەرى چۋان چي-يۋان (تايپەي), ازيا چەمپيوناتىنىڭ كوماندالىق ەسەپتەگى قولا جۇلدەگەرلەرى حارميت دەساي, ماناۆ تاككار, ساتيان گناناسەكاريان ء(ۇندىستان) سىندى ساڭلاقتار باق سىنايدى.