دانا حالقىمىزدا «كەڭەسكەن ەل كەمدىك كورمەيدى» دەگەن ءسوز بار. قۇرىلتاي شاقىرۋ – ەرتەدەن كەلە جاتقان اتا ءداستۇرىمىز. حالقىمىز ءوزارا اقىلداسا وتىرىپ, ءبىر توقتامعا كەلگەن. مۇنداي شەشىمدەر بۇكىل ەلدى بىرىكتىرگەن.
ءتول تاريحىمىزدا ۇلت تاعدىرىن شەشكەن قۇرىلتايلار بولعان. ونىڭ كوبى حالقىمىز ءۇشىن ماڭىزدى كەزەڭدە وتكىزىلگەن. ۇلتتىق قۇرىلتايدىڭ ەل تاريحىندا ايرىقشا ورنى بار, ايگىلى سارايشىق قالاسىندا اتاقتى حاندارىمىز ورداسىن تىككەن – شەجىرەلى اتىراۋ وبلىسىندا ءوتۋى جانە ونىڭ وسى وڭىردە ساقتالىپ قالعان كورىسۋ كۇنىمەن تۇسپا-تۇس كەلۋى كەزدەيسوقتىق ەمەس.
قۇرىلتايدىڭ ءۇشىنشى وتىرىسىندا پرەزيدەنت قاسىم-جومارت توقاەۆ ءتىل ماسەلەسىنە تاعى دا توقتالدى. مەملەكەت باسشىسى ءتىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالا بەرەتىنىن ايتتى. «بۇل – ءبىز ءۇشىن مىزعىماس ۇستانىم. ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق», دەدى پرەزيدەنت.
مەملەكەت باسشىسى قۇرىلتايدا قازاق قوعامىنداعى زيالى قاۋىمنىڭ ورنىنا باستى نازار اۋداردى. «ىنتىماعى جاراسقان, ورتاق ماقساتقا ۇيىسقان ۇلت ەشقاشان ۇتىلمايدى. ەشتەڭەدەن قۇر قالمايدى. بۇل ىستە زيالى قاۋىم ايرىقشا ءرول اتقارادى. اسىرەسە ەلگە ءسوزى وتەتىن اعا بۋىننىڭ ورنى بولەك. ولار – قازاقتىڭ قايماعى, ۇلتتىڭ ماقتانىشى», دەگەن پرەزيدەنت ەلدىڭ تۇتاستىعى زيالى قاۋىمنىڭ بىرلىگىنەن باستالاتىنىن تاعى ءبىر مارتە ەسكە سالدى.
پرەزيدەنت: ء«اربىر قازاق اتا-باباسىن قۇرمەتتەيدى, رۋحىنا تاعزىم ەتەدى. سوندىقتان شەجىرە ءبىزدىڭ مادەني كودىمىزدىڭ اجىراماس بولىگىنە اينالعان. بىراق ءبىز تەك وسى تۇسىنىكپەن شەكتەلىپ قالماۋىمىز قاجەت. ەڭ باستىسى, بۇل ماسەلەنى ەشقاشان ساياساتپەن ارالاستىرۋعا بولمايدى» دەي كەلە, جەكە مۇددەسىن ەمەس, ەل مۇددەسىن بارىنەن بيىك قوياتىن ازاماتتار ۇرپاققا ۇلگى بولۋى قاجەت ەكەنىن ەسكەرتتى. اسىرەسە قازىرگى گەوساياسي جاعدايدا بۇل مىندەت اسا ماڭىزدى ەكەنىن اتاپ كورسەتتى.
ءۇنزيلا شاپاق,
ءماجىلىس دەپۋتاتى