كەيىنگى بىرەر جىلداعى وزگەرىستەردى ەل سەزە باستادى. حالىق پەن بيلىك اراسىن ءبولىپ تۇرعان سەنىمسىزدىك سيندرومى سەيىلە باستاعانىن سەزىپ ءجۇرمىز. الدىڭعى ەكى وتىرىستا ەلىمىزدى دامىتۋعا قاتىستى ماڭىزدى باستامالار كوتەرىلدى. ونىڭ ءبىرازى ورىندالدى. جالپى, وزگەرىستەر بارلىق سالادا بايقالا باستادى.
قولعا الىنعان وزگەرىستەردىڭ ناتيجەسىندە حالىق بيلىككە الدەقايدا جاقىنداي ءتۇستى. قۇرىلتاي دالا دەموكراتياسىندا فورمات دەڭگەيىندە تاريح جادىندا ساقتالىپ قالعان. مەملەكەتتىلىكتىڭ تاعدىرى سىن تەزىندە قالعان كەزدە اتا-بابامىز ورتادان حالىق وكىلدەرىن سايلاپ, كەلەلى ماسەلەلەردى وسىنداي قۇرىلتايلاردا شەشتى. اۋزى دۋالى, ءسوزى ءۋالى ازاماتتاردىڭ وي-پىكىرىن, جوبا-ۇسىنىسىن تالقىلاپ, ورتاق جانە وڭتايلى ءپاتۋا جاساستى. بۇگىن بابادان قالعان ءداستۇر جالعاسىپ جاتىر. مەملەكەت باسشىسى ايتىپ وتكەندەي, قۇرىلتايدى ەرەكشەلەندىرەتىن سيپات – ونىڭ كەڭ اۋقىمدىلىعىندا, جۇمىستىڭ ساپاسى مەن تيىمدىلىگىنە تىكەلەي اسەرى بار ازاماتتاردىڭ باسقوسۋى, حالىقتىڭ ءۇنىن, مۇڭ-مۇقتاجىن, تالاپ-تىلەگىن شىنايى جەتكىزە الۋىندا. بۇگىندە وتانداستارىمىز ۇكىمەتتىڭ, جالپى مەملەكەتتىڭ جوسپارلارىن جۇزەگە اسىرۋعا اتسالىسىپ كەلەدى. جۇرگىزىلىپ جاتقان رەفورمالار ولاردىڭ سۇرانىسىن ەسكەرە وتىرىپ جۇرگىزىلۋدە. مىسالى, پارلامەنت پەن جەرگىلىكتى اۋىل اكىمدەرىنىڭ سايلاۋى ءوتتى. ەندىگى كەزەكتە – اۋدان, قالا اكىمدەرىن سايلاۋ. مۇنىڭ ءبارى مەملەكەتتىڭ اشىقتىعىن جانە ەلدى باسقارۋعا ءوز ۇلەسىن قوسۋ مۇمكىندىگىن كورسەتەتىن ەلەۋلى وزگەرىستەردىڭ بەلگىسى.
مەملەكەت باسشىسى العاشقى قۇرىلتايدا قازاق ازاماتى ءوز ويىن ايتا الاتىنداي پلاتفورما قالىپتاستىرۋ كەرەكتىگىن ايتقان بولاتىن. ناتيجەسىندە, بۇگىندە جۇزدەن استام قۇرىلتاي مۇشەسى حالىق پەن بيلىك اراسىنداعى وزىندىك كوپىرگە اينالدى. قازاق جەرىندەگى تاريحي جادىگەرلەردىڭ ءبىرازى ۇلتتىق قۇندىلىق رەتىندە يۋنەسكو تىزىمىنە ەندى. بۇل تەك قازاقستاندا ەمەس, بۇكىل ورتالىق ازيادا عىلىمنىڭ دامۋىنا سەرپىن بەردى. تاريحي مۇرامىزدى ساقتاۋ جۇمىستارى جالعاسىپ كەلەدى.
شايماردان نۇرىموۆ,
ۇلتتىق قۇرىلتاي مۇشەسى
الماتى