تاەكۆوندودان قىتايدىڭ تايان قالاسىندا وتكەن ليتسەنزيالىق ءتۋرنيردىڭ العاشقى كۇنى باتىرحان تولەۋعالي اقتىق سىنعا دەيىن القىنباي جەتىپ, پاريج وليمپياداسىندا باق سىنايتىن سپورتشىلاردىڭ تىزىمىنە قوسىلدى.
80 كگ سالماقتا سىنعا تۇسكەن 18 جاستاعى قازاقتىڭ قايسار ۇلى قىتاي ەلىندە وتە جاقسى ونەر كورسەتتى. جارىستى شيرەك فينالدان باستاعان باتىرحان بۇل مەجەدە ۇندىستاندىق اكشاي حۋدودان باسىم تۇسسە, جارتىلاي فينالدا ساۋد اربياسىنىڭ وكىلى ءالي-مۋبرۋك ءال-مۋربرۋكتىڭ وسال تۇسىن وڭاي تاپتى. «ەرەسەكتەر دۋىنا قوسىلعانىما كوپ ۋاقىت بولا قويعان جوق. سوعان قاراماستان ۇلتتىق قۇراما باپكەرلەرى ماعان ۇلكەن سەنىم ارتىپ, وسىنداي جاۋاپتى جارىسقا اپاردى. سول سەنىمدى اقتاۋ ءۇشىن بارىمدى سالدىم. شىنى كەرەك, تۇساۋكەسەر كەزدەسۋدە ءبىراز قوبالجىعانىم راس. بىراق دەر كەزىندە ءوز-وزىمە كەلىپ, جەڭىسكە جەتتىم. ەكىنشى مارتە دايانعا شاققان بەتتە قارسىلاسىمنىڭ ۇرەيلەنىپ تۇرعانىن بايقادىم. بۇل كورىنىس مەنى قاناتتاندىرا ءتۇستى. اقىرى ونى دا ۇتىپ, وليمپيا ويىندارىنىڭ جولداماسىنا يەلىك ەتتىم, دەيدى ول.
جاستار اراسىنداعى الەم بىرىنشىلىگىنىڭ قولا جۇلدەگەرى باتىرحان تولەۋعالي بىلتىر قازاقستان رەسپۋبليكاسىنىڭ سپارتاكياداسىندا بىرقاتار ساقا سپورتشىلاردى جولىنان ىعىستىرىپ, باس جۇلدەنى ولجالاعاننان كەيىن قازاقستاننىڭ ۇلتتىق قۇراما كومانداسىنىڭ ساپىنا قابىلداندى. سول ارالىقتا ول ءوزىن جاقسى قىرىنان كورسەتە ءبىلدى. اقپان ايىندا قانداسىمىز بىرىككەن ارابتار امىرلىگىنىڭ ء(باا) فۋدجەيرا قالاسىندا وتكەن حالىقارالىق تۋرنيردە قولا مەدالدى موينىندا جارقىراتتى. مىنە, ەندى, باتىرحان تورتجىلدىقتىڭ باستى دوداسىندا قازاق ەلى نامىسىن قورعاۋعا لايىق ەكەنىن دالەلدى.
كەلەسى كۇنى 20 جاستاعى ساميحون ابۋباكىروۆ ورەلى ونەرىمەن جانكۇيەرلەرىن قۋانتتى. 59 كگ سالماقتا كۇش سىناسقان ول شەشۋشى تۇستا فيليپپيندىك كۋرت كريان باربوسادان باسىم ءتۇستى. ونىڭ الدىندا ساميحون قىرعىزستان مەن تايلاند سپورتشىلارىن جەڭدى. ال ۇلتتىق كوماندا ساپىنداعى ەڭ تاجىريبەلى تاەكۆوندوشى +67 كگ سالماقتاعى جانسەل دەنيز ءۇشىن بۇل سىناق ءساتسىز اياقتالدى. كەزىندە وليمپيا ويىندارىنا قاتىسىپ, الەم كۋبوگى, ازيا ويىندارى, قۇرلىق چەمپيوناتى سەكىلدى ءدۇبىرلى دودالاردا ءبىر ەمەس, بىرنەشە رەت جۇلدە العان جەرلەسىمىز جارتىلاي فينالدا تاجىكستاندىق مۋنيرا ابدۋسولوموۆادان ايلاسىن اسىرا المادى.