وتكەن سەنبى, ياعني 12 ماۋسىم كۇنى الماتى وبلىستىق “جاسىل ەل” شتابىنىڭ ۇيىمداستىرۋىمەن “ۋاقىت ونبەس تىرلىكسىز, باقىت كەلمەس بىرلىكسىز. جاستار قىزىلاعاشتىقتارمەن بىرگە” اتتى اكتسيا وتكىزىلدى. اكتسيا اياسىندا “جاسىل ەلدىڭ” 60 ەڭبەك جاساقشىسى قىزىلاعاش اۋىلىنداعى 15200 ءتۇپ اعاش كوشەتىن سۋارىپ, تازالىق جۇمىستارىن جالعاستىردى. تاسقىننان زارداپ شەككەن ايماقتى كوگالداندىرۋ مەن كورىكتەندىرۋ ماقساتىندا وتىرعىزىلعان بۇل اعاش كوشەتتەرى قازىرگى كەزدە ءتىرشىلىگى قايتا جاندانعان اۋىلمەن بىرگە كوگەرىپ, كوكتەپ كەلەدى. جاسىلەلدىكتەر بۇدان باسقا قۇرىلىس, ساياباقتى قورشاۋ جۇمىستارىنا دا بەلسەنە ارالاسۋدا.
“نۇر وتان” پارتياسى مەن “جاس وتان” جاستار قاناتىنىڭ, “جاسىل ەل” جاستار ەڭبەك جاساقتارى رەسپۋبليكالىق شتابىنىڭ باستاماسىمەن, الماتى وبلىسىنىڭ اكىمدىگى جانە الماتى وبلىستىق “جاسىل ەل” شتابىنىڭ ۇيىمداستىرۋىمەن قىزىلاعاشتىقتارعا كومەكتەسۋ ماقساتىندا ارنايى قۇرىلعان جاسىلەلدىكتەردىڭ قۇراما ەڭبەكشى جاساعى ءوز جۇمىسىن 2010 جىلدىڭ 15 ساۋىرىندە باستاعان بولاتىن. سول ۋاقىتتان بەرى جاسىلەلدىك 160 سارباز قىزىلاعاش اۋىلىن قالپىنا كەلتىرۋ, اباتتاندىرۋ جانە كوگالداندىرۋ جۇمىستارىمەن اينالىسىپ كەلەدى. ناقتىراق ايتاتىن بولساق, ولار وسى ۋاقىتقا دەيىن 15,5 گەكتار اۋماقتى الاتىن ساياباققا ەمەن, تەرەك, قايىڭ, قاراعاش كوشەتتەرىن وتىرعىزدى. جاساقشىلار “قاپشاعاي قۇرىلىس” جانە “قاپشاعاي ينجينيرينگ” قۇرىلىس كومپانيالارىمەن بىرگە 3 تۇرعىن ءۇي سالۋعا كومەكتەستى. قۇرىلىس الاڭىنا اكەلىنگەن 34000 دانا كىرپىشتى ءتۇسىرىپ, جيناۋ جۇمىسىمەن دە نەگىزىنەن وسى جاستار اينالىستى.
ەسەلى ەڭبەك ەتىپ جاتقان جاستار ەڭبەكاقى ماسەلەسىنە دە كوپ باس اۋىرتا قويمايدى. اتقارىلعان جۇمىسقا وراي جالاقى ۋاقىتىندا تولەنەدى. ولار جۇمىس كيىمى, ءنارلى تاعام جانە جاتىن ورىنمەن دە تولىقتاي قامتاماسىز ەتىلگەن. اۋىرىپ-سىرقاي قالعاندارعا مەديتسينالىق جاردەم دە ۋاقىتىندا كورسەتىلەدى.
اۋىل شەتىندەگى شاتىرلى قالاشىققا قونىستانعان جاساقشىلاردىڭ ءونىمدى ەڭبەك ەتىپ, دەمالۋىنا بارلىق جاعداي جاسالعان. دەمالىس ورنىنا تەلەديدار, DVD قويىلىپ, ينتەرنەت جەلىسى ىسكە قوسىلعان. ساربازداردىڭ بوس ۋاقىتىن ءتيىمدى ۇيىمداستىرۋ ءۇشىن ارنايى مادەني-دەمالىس ورتالىعى جۇمىس ءىستەيدى. جاستار جۇمىستان بوس ۋاقىتتا گازەت-جۋرنالدار وقيدى, شاحمات, دويبى ويناپ, سوزجۇمباق شەشەدى. كەشكى مەزگىلدە شاتىردان گيتارا, دومبىرا سەكىلدى مۋزىكالىق اسپاپتاردىڭ ءۇنى دە ءجيى ەستىلەدى.
جاسىلەلدىك ەڭبەك جاساقشىلارى جەمىستى جۇمىستارىن الداعى ۋاقىتتا دا جۇيەلى جالعاستىرماق نيەتتە.
كۇمىسجان بايجان.
الماتى وبلىسى.