ءاۋ باستا باتىس جۇرتىندا عانا اتالىپ وتەتىن وسى ءبىر يگى شارانىڭ قازىر كەڭ ەتەك الۋى قۋانتادى. بۇگىندە ەل بولىپ باۋىرمالدىققا ۇندەيتىن وسى ءداستۇردى جاپپاي تويلاۋعا كوشتىك. «بۇل – باتىستاعىلارعا ءتان مەرەكە» دەيتىن جاداۋ پىكىر دە الىستادى. كەيىنگى جىلدارى قازاقىلىقتىڭ ءيسى اڭقيتىن كورىسۋ كۇنىن استانالىقتار دا اتاپ ءوتىپ ءجۇر.
بۇل كۇندى امال دەپ تە اتايدى. بۇرىنعىنىڭ كونەكوزدەرى «توقسان شىقپاي, توڭ جىبىمەس» دەپ ساقالىن ساۋلاپ وتىراتىن. قىستىڭ قىرتىس قاباعىن كۇن رايىنا قاراپ باعامدايتىن بابالار ساۋەگەيلىگى بەكەر ەمەس ەدى. ناعىز ناۋرىز ايى ەندى تۋىپ, جىل باسىنىڭ جاڭارۋ رەتىندە تويلاناتىن مەرەكەنى رەسپۋبليكا بولىپ قارسى الدىق.
جوعارىدا ايتقانداي, امال كۇنىن تويلاۋعا جينالعان استانالىقتارعا اقساقالدار مەن ەل ۇلكەندەرى اتاۋلى كۇننىڭ ۇلت ءۇشىن ماڭىزدىلىعى, بابالاردان قالعان ءداستۇردىڭ جاڭعىرۋى تۋرالى ايتىپ, ەل مەن ەلدى جاقىنداستىراتىن كۇننىڭ ەرەكشەلىگى تۋرالى ايتىپ بەردى.
– قاسيەتتى رامازان ايىمەن قاتار كەلگەن – امال كۇنىنىڭ جالپىحالىقتىق سيپات العانى قۋانتادى. بۇل – قاردىڭ كوبەسى سوگىلىپ, كوكتەم لەبىن الا كەلەتىن كۇن. وسىناۋ مەيرامدا جەردىڭ توڭى جىبىگەندەي ادامدار اراسىنداعى وكپە-رەنىش تە ۇمىتىلىپ, باۋىرمالدىق ارتا تۇسەدى. ۇلكەنگە سالەم بەرىپ, باتا الۋ جورالعىسى جاندانىپ, ساعىنعان اعايىن كورىسىپ, ماۋقىن باسىپ, اماندىعىن ءبىلدىرىپ, ءوزارا ءبىر-بىرىمەن قاۋىشادى. ەل پرەزيدەنتى قاسىم-جومارت توقاەۆ بۇل كۇننىڭ مارتەبەسى زور ەكەنىن ايتىپ ءوتتى. قازىر جەر-جەردە امال كۇنى تويلانىپ, مۇنى جۇرت ىقىلاسپەن قولداپ جاتىر, – دەيدى عالىم, مەملەكەت جانە قوعام قايراتكەرى ومىرزاق وزعانباەۆ.
كەشتە اۋىز بەكىتكەن اعايىنعا ارنايى داستارقان جايىلىپ, باتا بەرىلدى. سونداي-اق ۇلتتىق كيىم كيىپ كەلگەن قوناقتار اراسىندا سايىس وتكىزىلىپ, وعان ارنايى جۇلدە تىگىلىپتى. جاس جىگىتتەر گىر تاسىن كوتەرىپ, كۇش سىناستى. داستارقان باسىندا ءداستۇرلى ءان مەن تەرمە ايتىلىپ, قاريالاردىڭ تانىمدى اڭگىمەسى دە ۇزىلمەدى.
– استانادا كورىسۋ ءداستۇرىن 2010 جىلدان بەرى باستادىق. بۇل مەرەكەنىڭ تەك باتىس وڭىرلەردە تويلانعانى بەلگىلى عوي. باسىندا ون شاقتى وتباسى ەدى, بۇگىندە 70-كە جۋىق وتباسى وسى مەرەكەنى بىرلەسە اتاپ ءجۇرمىز. مۇنىڭ اعا بۋىن مەن كەيىنگى ۇرپاقتى ساباقتاستىرا وتىرىپ, سالت-ءداستۇردى جاڭعىرتۋ, ەلدى بىرلىككە شاقىرۋ, اۋىزبىرلىككە ۇندەۋدە ماڭىزى زور. ءبىز اتامىزدان جانە اكەمىزدەن كورگەن وسى مەرەكەلىك ءداستۇردى ءوز بالالارىمىزدىڭ, نەمەرەلەرىمىزدىڭ دا بويىنا دا ءسىڭىرىپ كەلەمىز. بۇگىنگى كەشكە دە ارنايى بابالار ءداستۇرىن كورسىن, كوڭىلىنە ءتۇيسىن دەپ ەرتىپ اكەلگەندەردىڭ قاراسى مول, – دەيدى قالا تۇرعىنى داۋلەتباي ءسۇتباي ۇلى.
مادەنيەت جانە اقپارات مينيسترلىگى بيىلعى ناۋرىز مەيرامىن تويلاۋدىڭ تۇجىرىمداماسىن جاريالاعان ەدى. مادەنيەت كوميتەتى توراعاسىنىڭ ورىنباسارى ءسابيت بارلىباەۆتىڭ ايتۋىنشا, وسى جىلدان باستاپ ناۋرىز مەرەكەسى جاڭا فورماتتا تويلانادى. بۇدان بىلاي جىل سايىن 14-23 ناۋرىز ارالىعىندا ناۋرىزناما ونكۇندىگى ءار ءتۇرلى تاعىلىمدى ءىس-شارامەن وتكىزىلەدى.