دامىعان ەلدەردە جارىق پەن سۋعا دەيىن ۇنەمدەپ پايدالانۋ جوعارى دەڭگەيدەگى قوعامدىق مادەنيەتكە اينالعان. پرەزيدەنت قازاقستاندا مۇلدە كەرەعار جاعداي قالىپتاسقانىن ايتتى. وسى تۇستا ميلليونداعان ادامنىڭ ىسىراپشىلدىعى بۇكىل ەلدىڭ بايلىعىن جەلگە ۇشىراتىنىن ايتقان مەملەكەت باسشىسى ەلدەگى سۋ ماسەلەسىن قوزعادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى بۇل – قازاقستان ءۇشىن اسا ماڭىزدى ماسەلە ەكەنىن ايتىپ, ەلىمىزدە سۋ تاپشىلىعى پايدا بولعانىن العا تارتتى.
«بىزدە ماتەريالدىق قانا ەمەس, رۋحاني ىسىراپشىلدىق تا بار. ءوزىڭدى, ەلىڭدى دامىتۋعا قاجەتتى قانشاما التىن ۋاقىت ونبەيتىن داۋ-دامايعا, ەش پايداسى جوق ىسكە جۇمسالىپ جاتىر. ارقايسىمىز ۇنەمشىل ءارى ۇقىپتى بولساق, ەلىمىزدىڭ بەرەكەسى ارتا تۇسەر ەدى. ۇرپاقتىڭ ساناسىنا وسىنى سىڭىرە بەرۋىمىز قاجەت. وسى دەرتتىڭ بارىنەن تۇبەگەيلى ارىلساق, ۇلتىمىزدىڭ ساپاسىن جاقسارتامىز, ونى مۇلدە جاڭا دەڭگەيگە كوتەرەمىز. قوعامعا قاۋىپتى كەسەلدەرمەن كۇرەسۋگە زيالى قاۋىم, اقپارات قۇرالدارى, ۇكىمەتتىك ەمەس ۇيىمدار, بارلىعى ءبىر كىسىدەي جۇمىلۋى كەرەك. مۇنى ءاربىر ازاماتتىڭ جانە بۇكىل قوعامنىڭ مىندەتى دەپ ءتۇسىنۋ قاجەت. سەبەبى بۇل – ۇلتتىڭ بولاشاعىنا تىكەلەي قاتىسى بار ماسەلە», دەدى پرەزيدەنت.