قاسىم-جومارت توقاەۆ ۇلتتىق قۇرىلتايدىڭ ءۇشىنشى جيىنىندا ەل تاعدىرى ءۇشىن وزەكتى ماسەلەلەرگە توقتالدى. پرەزيدەنت قازاق ءتىلىنىڭ قولدانىس اياسىن كەڭەيتۋ - مەملەكەتتىڭ باستى باعىتى, مىزعىماس ۇستانىمى ەكەنىن ايرىقشا نۇسقادى, دەپ جازادى Egemen.kz.
«ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق.
قازىر ءىرى كىتاپ دۇكەندەرىندە قازاق تىلىندەگى تۋىندىلاردىڭ ۇلەسى ارتا ءتۇستى. سوڭعى كەزدە باسپاگەرلەردىڭ جاڭا بۋىنى الەمدىك بەستسەللەرگە اينالعان شىعارمالاردى اۋدارىپ ءجۇر. كوپتەگەن كىتاپتاردى شىعارىپ جاتىر. اۋدارىلعان كىتاپتاردىڭ ىشىندە كوركەم ادەبيەت قانا ەمەس, ىسكەرلىك باعىتتاعى تۋىندىلار دا كوپ. مەملەكەتتىك ساياساتتىڭ ءمانى – وسىندا», دەدى ق.توقاەۆ.
مەملەكەت باسشىسى ءتىل تاعدىرىنا كەلگەندە قۇر ءسوز ەمەس, كۇندەلىكتى قارىم-قاتىناستا قازاقشا سويلەۋدىڭ ماڭىزىنا توقتالدى.
«وسى تۇستا, حالىقارالىق «قازاق ءتىلى قوعامى» تۋرالى ەرەكشە اتاپ وتكىم كەلەدى. قازىر ۇلتتىق قۇرىلتايدىڭ مۇشەسى راۋان كەنجەحان ۇلى باستاعان جاڭا بۋىن وكىلدەرى ۇيىم تىزگىنىن قولعا الدى. مەن قوعامنىڭ «Qazaq tili» ەنداۋمەنت قورىن قۇرۋ تۋرالى ۇسىنىسىن قولدادىم. وسى جاقسى باستامانى قولىندا قارجىسى بار ازاماتتار جالعاستىرىپ اكەتتى. تىلىمىزگە قامقورلىق تانىتقان جاندارعا ەرەكشە ريزاشىلىعىمدى بىلدىرەمىن. قالتالى, جاناشىر ازاماتتار قوردى ۇلعايتۋعا ۇلەس قوسادى دەپ سەنەمىن.
مەن ەكونوميكانى دامىتۋ ءۇشىن «كرەاتيۆتى يندۋستريانىڭ» ءمان-ماڭىزى زور ەكەنىن ۇنەمى ايتىپ ءجۇرمىن. بۇل مەملەكەتتىك ءتىلدىڭ بولاشاعى ءۇشىن دە وتە ماڭىزدى. قازاق ءتىلىن دامىتامىز دەسەك, قازىرگى زامانعى ءادىس-تاسىلدەردى بارىنشا ءتيىمدى پايدالانعان دۇرىس», دەدى پرەزيدەنت.