ءدىنتانۋشى نۇرلان بايجىگىت ۇلى «وتىز كۇن ورازاداعى وتىز امالعا» توقتالىپ, كورەرمەننىڭ سان ءتۇرلى ساۋالىنا جاۋاپ بەرەدى, دەپ حابارلايدى Egemen.kz.
Kazinform جازعانداي, ورازا ۇستاپ, اۋىز بەكىتۋ توڭىرەگىندە ەلدى تولعاندىرعان ساۋال كوپ. بۇل جولى JIBEK JOLY تەلەارناسىندا «ورازا قابىل بولسىن» تىكەلەي ەفيرىىندە ءدىنتانۋشى «رامازان – عيبادات ايى» تاقىرىبىن كەڭىنەن تالقىلادى.
«رامازان ايى مەن ورازانىڭ قاسيەتى جايىندا حالىق نە بىلەدى؟», «رامازاننىڭ بولمىسىن قانداي ارەكەتتەر بۇزادى؟», «ورازانىڭ باستى قۇندىلىعى نەدە؟» دەگەن ساۋالدار توڭىرەگىندە اڭگىمە ءوربىتتى. ءار سۇراققا ومىرلىك مىسالداردى كەلتىرە وتىرىپ جاۋاپ بەردى. اسىرەسە, ۋاقىتتى باعالاماي, ۋاقىتتى بوس وتكىزۋدىڭ زيانى تۋرالى ايتتى. بۇل ايدا كومپيۋتەرلىك ويىندار ويناپ, سان ءتۇرلى سەريالدار كورۋ رامازاننىڭ قادىرىن كەتىرەتىنىن تىلگە تيەك ەتتى.
ال, ورازا ۇستاعان ادام ۋاقىتىن ۇيقىمەن وتكىزسە, ساۋابىنىڭ از بولاتىنىن «ورازانى ۇيقىمەن وتكىزسەڭ, ساۋابىن «تۇسىڭدە» كورەسىڭ» دەگەن ادەمى ازىلمەن جەتكىزدى. سونداي-اق ءدىنتاۋنشى ورازادا تاماقتى كوپ ويلاۋ, كۇنى بويىنا «اۋىزاشارعا نە دايىندايمىن» دەگەن ويعا بەرىلۋ, سوعان ۋاقىتىن جۇمساۋ جانە «تاماقتى كوپتەپ جەسەم, ەرتەڭ قارنىم اشپايدى» دەگەن جاڭساق ويمەن شامادان تىس تاماقتانۋ دا ورازانىڭ باعاسىن تۇسىرەتىنىن ايتتى.