قازاقستاننىڭ بىردە-ءبىر تەننيسشىسى اقش-تىڭ ينديان-ۋەللس قالاسىندا ءوتىپ جاتقان جۇلدە قورى 8 995 555 دوللاردى قۇرايتىن ءدۇبىرلى دودانىڭ ءتورتىنشى اينالىمىنان اسا المادى.
باستاپقى باسەكەلەردە گەرمانيالىق تامارا كورپاچ (№76) پەن رەسەيلىك ەكاتەرينا الەكساندروۆادان (№16) ايلاسىن اسىرعان يۋليا پۋتينتسەۆا (№79) ءۇشىنشى كەزەڭدە مەديسون كيزبەن (№18) كۇش سىناستى. كەزىندە الەمدىك رەيتينگتە جەتىنشى ورىنعا دەيىن كوتەرىلگەن 29 جاستاعى اقش-تىڭ وكىلى US Open دوداسىنىڭ (2017 جىلى) فينالىندا جانە اۋستراليانىڭ اشىق بىرىنشىلىگى (2015, 2022) مەن رولان گارروستىڭ (2018) جارتىلاي فينالىندا ونەر كورسەتتى. سونداي-اق كيز WTA تۋرنيرلەرىندە جەتى رەت توپ جاردى. دەسەك تە بۇل كۇنى دە بابىندا بولعان يۋليا قارسىلاسىنا ەش مۇمكىندىك بەرمەي, جارقىن جەڭىسكە قول جەتكىزدى – 6:4, 6:1.
ءتورتىنشى كەزەڭدە پۋتينتسەۆانىڭ جولى الەمنىڭ ءبىرىنشى راكەتكاسى يگا شۆەنتەكپەن قيىستى. 22 جاستاعى پولشانىڭ ماقتانىشى رولان گارروستا ءۇش مارتە توپ جارىپ, اقش-تىڭ اشىق بىرىنشىلىگىن ءبىر رەت ۇتقان. WTA ساناتىنداعى 18 تۋرنيردە باس جۇلدەنى ولجالادى. بۇل تارتىستا شۆەنتەك شاشاسىنا شاڭ جۇقتىرمادى – 1:6, 2:6.
اتالعان تۋرنيردە تاعى ەكى جەرلەسىمىز باق سىناعان ەدى. الەكساندر شەۆچەنكو (№51) ەكىنشى كەزەڭدە ارگەنتينالىق فرانسيسكو سەرەندۋلودان (№22) ۇتىلسا, الەكساندر بۋبليك (№20) ءۇشىنشى اينالىمدا توپ-10 تەننيسشىنىڭ قاتارىنداعى اۋستراليالىق الەكس دە مينورعا (№10) ەسە جىبەردى. ال جارىستى ەكىنشى كەزەڭنەن باستاۋعا ءتيىس ەلەنا رىباكينا (№4) دەنساۋلىعىنىڭ سىر بەرۋىنە بايلانىستى كورتقا شىقپادى.