سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ دەپۋتاتتارى «انالار جۇرەگى» ساربازدار انالارى كوميتەتى» رەسپۋبليكالىق قوعامدىق بىرلەستىگىنىڭ وكىلدەرىمەن كەزدەستى. كەزدەسۋگە قاتىسۋشىلار اسكەري قىزمەت جاعدايىن ودان ءارى جاقسارتۋ ماسەلەسىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت مۇشەسى عالياسقار سارىباەۆ وتاندى قورعاۋ جولىنداعى اسكەري قىزمەتشىلەردىڭ امان-ەسەن جانە دەنى ساۋ قالپىندا ۇيلەرىنە قايتۋىنىڭ ماڭىزدىلىعىن اتاپ ءوتتى.
«سوڭعى ۋاقىتتا ارمياداعى جاعىمسىز قۇبىلىستاردىڭ الدىن الۋ شارالارى قابىلدانۋدا. جاستار اراسىندا اسكەري بورىشىن ورىنداۋعا ىنتالاندىرۋدى ارتتىرۋ ءۇشىن بىرقاتار جەڭىلدىك جۇزەگە اسۋدا. الدا ءالى تالاي جۇمىس بار. جاستارعا اسكەري-پاتريوتتىق تاربيە بەرۋ, قازاقستان ارمياسىنىڭ ابىروي-بەدەلىن كوتەرۋ مىندەتى كەزەك كۇتتىرمەيدى. بۇل ماسەلەلەر بويىنشا بىرلەستىك اتقاراتىن جۇمىس اۋقىمدى», دەدى عالياسقار سارىباەۆ.
«انالار جۇرەگى» رەسپۋبليكالىق قوعامدىق بىرلەستىگىنىڭ وكىلدەرى اسكەري قىزمەت كەزەڭىندە ادام قۇقىقتارىنىڭ بۇزىلۋىن, قىزمەتشىلەردىڭ قازا بولۋى مەن جاراقات الۋىن بولدىرماۋ ماقساتىندا اسكەري ورگاندار مەن اسكەري بولىمدەردىڭ باسشىلىعىمەن بايلانىس ورناتۋداعى كومەگى تۋرالى ايتىپ بەردى. كوميتەت زاڭدا بەلگىلەنگەن تارتىپپەن ادام قۇقىقتارىن ساقتاۋ ماقساتىندا شاقىرۋ كوميسسيالارىنىڭ جۇمىسىنا قاتىسادى, سونداي-اق اسكەري قىزمەت وتەتىن جاعدايلاردى جاريالاۋ ءۇشىن بۇقارالىق اقپارات قۇرالدارىمەن بىرلەسە ارەكەت ەتەدى.