مۇناي ەكسپورتتاۋشى ەلدەر ۇيىمى (وپەك) مۇنايعا دەگەن الەمدىك سۇرانىسقا قاتىستى ءوز باعالاۋىن وزگەرىسسىز قالدىردى. بىراق بيىلعى ينفلياتسيانىڭ جانە پايىزدىق مولشەرلەمەلەردىڭ كۇتىلەتىن تومەندەۋى فونىنداعى ەكونوميكالىق بولجامدى ءبىراز جوعارىلاتتى.
ۆەنادا ورنالاسقان كارتەل ءوزىنىڭ اي سايىنعى ەسەبىندە مۇنايعا دەگەن سۇرانىس 2024 جىلى كۇنىنە 2,2 ميلليون باررەلگە جانە 2025 جىلى كۇنىنە 1,8 ميلليون باررەلگە وسەدى دەپ كۇتەتىنىن ايتتى, بۇل ونىڭ بۇرىنعى باعالاۋلارىنان وزگەشە ەمەس.
ء«ىرى ەكونوميكالارداعى وڭ, تۇراقتى ديناميكانى كۇتۋ 2024 جانە 2025 جىلدار ىشىندە جالپى ينفلياتسيانىڭ ودان ءارى تومەندەۋىن كۇتۋمەن قامتاماسىز ەتىلەدى. بۇل كىرىس دەڭگەيىن جاقسارتادى جانە تۇتىنۋشىلاردىڭ شىعىس مۇمكىندىكتەرىن ساقتايدى دەپ بولجانادى», دەپ مالىمدەدى وپەك.
حالىقارالىق ەتالون بولىپ سانالاتىن «Brent» ماركىلى مۇناي قازىر باررەلىنە 82 دوللارعا جۋىق دەڭگەيدە ساتىلىپ جاتسا, WTI مۇنايى باررەلىنە 78 دوللارعا باعالانىپ تۇر.
وپەك پەن ونىڭ وداقتاستارى ەكىنشى توقساندا كۇنىنە 2,2 ملن باررەل كولەمىندە ءوندىرىستى ەرىكتى قىسقارتۋدى ۇزارتۋعا كەلىسكەن بولاتىن. سول ارقىلى جاھاندىق تاپشىلىقتىڭ الدىن الىپ, باعانى قولداماق. ءوندىرىستى ەرىكتى قىسقارتۋ كەلىسىمىنە قازاقستان دا قاتىسادى. بيىل قاڭتاردا رەسپۋبليكادا شيكى مۇناي ءوندىرۋ 6,7 ملن توننانى قۇراعان. بۇل بىلتىرعىدان 3,2%-عا از كورسەتكىش. وندىرىلگەن مۇنايدىڭ ەڭ كوپ كولەمى اتىراۋ وبلىسىنا (4,6 ملن توننا, -2,4%) تيەسىلى. ودان كەيىن ماڭعىستاۋ (1,4 ملن توننا, -1,4%) جانە اقتوبە (360,6 مىڭ توننا) وبلىستارى تۇر. قارجىلاي ەسەپتەسەك, ءوندىرىس كولەمى 1,3 ترلن تەڭگەنى قۇراعان. بۇل 2023 جىلدىڭ قاڭتارىمەن سالىستىرعاندا 9,7%-عا از. وتكەن جىلى قاڭتار-جەلتوقساندا مۇناي ءوندىرۋ 77,6 ملن تونناعا جەتكەن ەدى.
جالپى, قازاقستان ەكىنشى توقساندا مۇناي ءوندىرۋدى تاۋلىگىنە 82 مىڭ باررەلگە قوسىمشا ەرىكتى قىسقارتۋ مەرزىمىن ۇزارتادى. ەنەرگەتيكا مينيسترلىگىنىڭ حابارلاۋىنشا, ءوندىرىستى قوسىمشا قىسقارتۋ مۇناي نارىعىنداعى تۇراقتىلىق پەن تەڭگەرىمدى ساقتاۋ ماقساتىندا وپەك+ ەلدەرى قابىلداعان ساقتىق شارالارىن كۇشەيتۋگە ارنالعان.
ەلدەگى وندىرىلەتىن مۇنايدىڭ باسىم بولىگى, ياعني جالپى كولەمنىڭ 90%-دان استامى ەكسپورتقا شىعارىلادى. بىلتىر قاڭتار-جەلتوقساندا مۇناي ەكسپورتى 8,4%-عا ءوسىپ, 70,7 ملن توننانى قۇرادى جانە ودان 42,3 ملرد دوللار تابىس ءتۇستى.
«تمد ەلدەرىنە (ازەربايجان, وزبەكستان جانە رەسەي) 123,3 ملن دوللارعا 242,8 مىڭ توننا مۇناي جونەلتىلدى. فيزيكالىق ماندەگى ءوسىم 4,1%-دى قۇرادى, اقشالاي ەسەپتەگەندە, كەرىسىنشە, 17%-عا تومەندەۋ بايقالادى. دۇنيەجۇزىنە جىبەرىلگەن مۇناي كولەمىنىڭ ءوسىمى 8,4%-دى قۇرادى, اقشالاي تۇردە 9,8%-عا تومەندەۋ تىركەلدى. قازاقستان مۇنايىنىڭ باسىم بولىگى يتالياعا جەتكىزىلدى», دەپ حابارلادى «EnergyProm».