ارالاس جەكپە-جەك الەمىندە زور بەدەلى بار قازاقستاننىڭ Naiza جانە رەسەيدىڭ Fight Nights پروموۋشەندەرى 18 مامىردا الماتىدا ءدۇبىرلى دودا ۇيىمداستىرۋدى كوزدەپ وتىر.
اتالعان جارىستا ءۇش بىردەي تيتۋلدىق باسەكەلەر وتەدى. اتاپ ايتساق, كەشتىڭ باستى جەكپە-جەگىندە جەرلەسىمىز فانيل «نوعاي» رافيكوۆ (22-7) پەن ازەربايجاندىق ناريمان «بايراقتار» ابباسوۆ (29-5) ايقاسادى. ەكەۋىنىڭ دە تاجىريبەلەرى ابدەن تولىسقان ساقا سپورتشىلار. ءسابيت ءجۇسىپوۆ (16-3) جارتىلاي جەڭىل سالماقتاعى Fight Nights نۇسقاسىنىڭ چەمپيوندىق اتاعىن قورعاپ قالۋ ءۇشىن كاسپي تەڭىزىنىڭ ارعى جاعالاۋىنان كەلگەن تاعى ءبىر فايتەر ماگەرراما گاسانزادەمەن (9-1) كۇش سىناسادى.
ال Naiza پروموۋشەنى التىن بەلبەۋىنىڭ يەگەرى داعىستاندىق رامازان «گورەتس» گاسانوۆ (10-0) پەن وتانداسىمىز ساماندار «استانالىق گانگستەر» رۋزماتوۆ (6-0) اراسىنداعى ايقاستا انىقتالادى.