سىردان سىرتقا جول تارتقان اعايىننىڭ ەلدىڭ ءدامى رەتىندە كۇرىش پەن «قازالى» كامپيتىن قولىنا ىلە كەتەتىنى – بۇرىننان بار ءۇردىس. وسىدان بولار, باسقا ايماق تۇرعىندارى اراسىندا دا وسى كۇنى قازالىدان شىعاتىن ءتاتتىنى اڭساپ وتىراتىندار كوبەيگەن. قىزىلوردادان وزگە وڭىرلەرگە ساپارعا شىققانداردىڭ دا الدىنا جايىلعان داستارقانداعى تاتتىلەر اراسىنان «قازالى» كامپيتىن كوزى شالسا, ەسكى تانىسىن كورگەندەي ەلجىرەي قالاتىنى تاعى راس.
وبلىس ورتالىعىنان جىراقتا جاتقان اۋدانداعى كامپيت تسەحىن 2012 جىلدان باستاپ نۇربەك قازبەرگەنوۆ اتتى ازامات قولعا الىپ, ءىس اياسىن كەڭەيتىپ وتىر. قازىر مۇندا «قازالى» كامپيتىنىڭ 7 ءتۇرى شىعارىلادى. الىس اۋدانداعى تسەح وبلىستا ءتاتتى تۇرلەرىن شىعاراتىن اۆتوماتتاندىرىلعان جالعىز كاسىپورىن ەكەندىگىن دە ايتا كەتەيىك. دايىن ونىمدەر قىزىلوردادان بولەك, اقتوبە, باتىس قازاقستان, ماڭعىستاۋ, اتىراۋ وبلىستارىنا جول تارتادى.
ءتاتتىنىڭ تاريحىنا ۇڭىلسەك, وتكەن عاسىردىڭ ەلۋىنشى جىلدارىنا كەتىپ قالامىز. ءوندىرىس ورىندارىن تۇرالاتىپ كەتكەن توقسانىنشى جىلدارى وسى كاسىپورىننىڭ اينالاسىنداعىلار كامپيتتى ۇيدەن جاساپ, ونىسىن پويىزدا ساۋدا جاسايتىندار كوتەرمە باعامەن ساتىپ الىپ ءجۇردى.
نۇربەك قازبەرگەنوۆ وتباسىلىق كاسىپ رەتىندە تسەحتى جۇرگىزە باستاعاندا دا بارلىق جۇمىس باياعىداي قولمەن اتقارىلاتىن.
قازاندا قايناعان ءشاربات الدىمەن يلەنەدى. ول سۋىعاننان كەيىن بىرنەشە ادام قايشىلاپ كەسىپ, وراۋعا كىرىسەدى. ۋاقىت پەن ادام كۇشى كوپ جۇمسالاتىنىنان بولەك ءتاتتىنىڭ وسى تۇرىندە سىرتى جىلتىراپ, جۇتىنىپ تۇرعان كامپيتتىڭ وزگە سورتتارىمەن باسەكەگە تۇسە المايتىنى دا انىق ەدى. سوندىقتان جاس كاسىپكەر اۋەلى وسى قيىن شارۋانى جەڭىلدەتۋدى ويلادى.
«الدىمەن قىرعىزستان مەن قىتايداعى كونديتەرلىك تسەحتار جۇمىسىمەن تانىستىم. «جۇمىسپەن قامتۋ – 2020» باعدارلاماسى اياسىندا 18 ملن تەڭگە نەسيە الىپ, ءوندىرىستى ءىشىنارا اۆتوماتتاندىرىلعان جۇيەگە كوشىردىك. وسىلايشا, 30 ادامنىڭ تىرلىگىن 4 جۇمىسشى اتقاراتىن بولدى. قىتاي مەن رەسەيدەن كامپيتتەردى سوزىپ, ءبولىپ, تۋرايتىن جانە قاعازىن ورايتىن اپپاراتتار ساتىپ الدىق», دەيدى كاسىپكەر.
وسىنداي جۇمىستار ارقاسىندا 2015 جىلى «قازاقستاننىڭ ۇزدىك تاۋارى» كورمە-بايقاۋىندا «قازالى» كامپيتى جەڭىمپاز اتاندى. ءار جىلعا قويىلعان جوسپاردى ورىنداۋ ارقىلى ءونىم قازىرگى كۇنى ەلىمىزدەگى قاتتى كارامەل وندىرىسىنەن ءوز ورنىن ويىپ تۇرىپ الدى. 2021 جىلدان باستاپ «قازالى» كامپيتى جاڭا ۇلگىدەگى قاپتامامەن شىعىپ كەلەدى.
بۇل ءونىمدى ۇيدەن دايىندايتىندار ءالى دە بار. قازالىدا 15 شاقتى ءۇي, قىزىلوردا مەن ارالدا, قارماقشىدا ازىرلەيتىندەر دە كەزدەسەدى. ال تسەحتاعى ءونىم حالىقارلىق ستاندارتتارعا ساي كەلۋىمەن ەرەكشەلەنەدى. كامپيت دايىنداۋعا كەرەكتى قانت باعاسى دا, ءونىمدى ورايتىن قاپتاما مەن حوش يىستەندىرگىشتەردىڭ باعاسى جىل سايىن ءوسىپ كەلەدى. ءارى ونىڭ بارلىعى سىرتتان اكەلىنەدى. بۇل ەڭ الدىمەن ارينە, ءونىمنىڭ وزىندىك قۇنىنا اسەر ەتەدى.
«استانادا وتكەن «قازاقستاننىڭ ۇزدىك تاۋارى» كورمە-بايقاۋى ءونىمىمىزدى ەل كولەمىندە تانىستىرۋدىڭ مۇمكىندىگى بولدى. بىلتىر وبلىسقا جاساعان ساپارىندا مەملەكەت باسشىسى دا «قازالى» كامپيتىمەن تانىسىپ, وڭ باعاسىن بەردى. وسىنىڭ ءبارى باستاعان ءىسىمىزدى جالعاستىرۋعا ۇلكەن دەمەۋ. بۇگىندە تۇتىنۋشىلار تالابىنىڭ دا كوپ وزگەرگەنىن بايقايمىز. ولاردىڭ سۇرانىسىنا ساي بولۋ ءۇشىن ىزدەنىستى توقتاتپايمىز», دەيدى كاسىپكەر.
اۋداننان وسى ۋاقىتقا دەيىن كۇرىش, بالىق ونىمدەرى جانە قامىس شەتەلگە ەكسپورتتالىپ كەلسە, ەندى ولاردىڭ قاتارىنا «قازالى» كامپيتى دە قوسىلدى. ءوڭىر برەندىنە اينالعان ءونىم كوپ ۇزاماي قىتاي ەلىندەگى ساۋدا سورەلەرىنە تۇسە باستايدى.
قىزىلوردا وبلىسى,
قازالى اۋدانى